Tetanduran ngembang

Saka Wikipédia Jawa, bauwarna bébas abasa Jawa
Tetanduran wiji katutup (Magnoliophyta)
Kalamangsa: Jaman Jurasik-Saiki
Sweetbay1082.jpg
kembang Magnolia virginiana
Klasifikasi ngèlmiah
Karajan: Plantae
Dhivisi: Magnoliophyta
Kelas

.

Tetanduran wiji katutup (Magnoliophyta utawa Angiospermae, diwaca angiosperme kanthi "e" pungkasan diwaca dawa) utawa tetanduran ngembang iku golongan paling akèh jinisé saka tetanduran sing urip ing dharatan. Jenengé dijupuk saka ciriné sing paling khas, ya iku ngasilaké piranti réproduksi wewangun kembang utawa amarga bakal wijiné kabungkus déning karpela utawa godhong woh. Ciri sing paling keri iki mbédaaké saka golongan tetanduran wewiji liyané: Gymnospermae utawa tetanduran wiji kabukak.

Jeneng Angiospermae dijupuk saka panggandhéngan rong tembung basa Yunani kuna: αγγειον (aggeion, "panyangga" utawa "pangreksa") lan σπερμα (spérma, "wiji") sing dikenalaké déning Paul Hermann taun 1690. Ing sabagéan gedhé sistem taksonomi modhérn, golongan iki saiki manggon ing takson minangka divisi lan migunakaké jeneng golongan (ya iku magnolia) sing nunjukaké kabèh ciri-ciri khasé: Magnoliophyta, nanging klasifikasi paling anyar adhedhasar APG mapanaké ing sawijining klade sing ora duwé takson resmi.

Ciri-ciri khas[besut | besut sumber]

Tetanduran ngembang dibedaaké saka golongan liya adhedhasar apomorfi (ciri-ciri kawarisaké) sing khas dikembangaké déning golongan iki. Kabèh ciri-ciri iki ana ing pérangan reproduktif. Ciri-ciriné ya iku:

  • Kembang

Kembang dadi penciri sing paling nyata lan mbédaaké saka golongan tetanduran wewiji liyané. Kembang mbantu golongan tetanduran iki miyaraké kemampuan évolusi lan lungkang (ruang urip utawa niche) ékologisé saéngga marakaké cocog banget kanggo urip ing dharatan.

  • Benang sari

Stamen utawa benang sari adoh luwih énthéng tinimbang organ kanthi fungsi sarupa ing tetanduran wiji kabukak (ya iku strobilus). Benang sari wus ngalami évolusi supaya bisa adhaptasi karo penyerbuk lan kanggo nyegah pembuahan dhéwé. Adaptasi nuju arah iki uga miyaraké jangkauan ruang uripé.

  • Ukuran gametofit lanang karéduksi sanget

Gametofit lanang sing karéduksi sanget (ana ing serbuk sari lan mung kapérang saka telung sèl) mbiyantu sanget ngurangi wektu antarané panyerbukan, nalika serbuk sari tekan ing organ wadon, lan pambuahan. Wektu normal antarané rong tahap mau racaké 12-24 jam. Ing Gymnospermae wektu sing diperloaké kanggo perkara mau bisa nganti setaun.

  • Karpela nutup rapet bakal wiji

Karpela utawa godhong woh rapet mbungkus bakal wiji utawa ovulum, saéngga nyegah pambuahan sing ora dikarepaké. Sel spérma bakal dikontrol déning putik kanggo mbuahi sèl endhog (ovum). Sawisé pambuahan, karpela lan sapérangan jaringan ing sekitaré uga bakal berkembang dadi woh. Woh duwé fungsi adaptif kanthi ngreksa wiji saka perkecambahan sing ora dikarepaké lan mbantu prosès panyebaran nuju wewengkon sing luwih wiyar.

  • Ukuran gametofit wadon karéduksi sanget

Kaya ing gametofit lanang, ukuran gametofit wadon uga sangat berkurang dadi mung pitung sel lan kareksa ing njero bakal wiji. Ukuran sing saya cilik iki mbantu nyepetaké perkembangan urip tetanduran. Mung golongan Angiospermae sing duwé prilaku sausum ing prosès kauripané. Prilaku iki marakaké gampang banget njlajah lungkang sing adoh luwih wiyar.

  • Endosperma

Pawangunan endosperma ing wiji iku ciri khas Angiospermae sing ndhukung banget tumrap adhaptasi amarga nglengkapi embrio utawa thukulan kanthi cadhangan panganan ing perkembangané. Endosperma kanthi fisiologis uga nambah kuwat daya serep wiji tumrap hara sing diperloaké tetanduran enom ing perkembangané.

Klasifikasi[besut | besut sumber]

Thukulan monokotil (kiwa) lan dikotil.

Ing awalé, jeneng Angiospermae dimaksudaké déning Paul Hermann (1690) kanggo kabèh tetanduran sing ngembang kanthi wiji sing kabungkus ing kapsula, lan ditentangaké karo Gymnospermae minangka tetanduran sing ngembang kanthi woh achene utawa duwé karpela kawilah. Ing pangertèné, kabèh woh utawa bagéané dianggep wiji lan "kabukak". Rong istilah iki dipigunaaké déning Carolus Linnaeus kanthi pangertèn sing padha nanging digunaaké minangka jeneng-jeneng saka kelas Didynamia.

Nalika Robert Brown ing taun 1827 nemoaké bakal wiji sing bener-bener kabukak ing sikas lan tetanduran runjung, panjenengané mènèhi jeneng Gymnospermae kanggo rong golongan tetanduran iki. Taun 1851 Wilhelm Hofmeister nemoaké owah-owahan sing dumadi ing kanthong embrio saka tetanduran ngembang (penyerbukan dhobel). Asil panemon iki ndadèaké Gymnospermae minangka kelas sing bener-bener béda saka dikotil, lan istilah Angiospermae wiwit diterapaké kanggo kabèh tetanduran wewiji sing dudu rong golongan sing disebutaké Robert Brown. Pangertèn pungkasan iki sing isih bertahan nganti saiki.

Ing sistem taksonomi modhérn, golongan tetanduran ngembang dipapanaké ing manéka warna takson. Saliyané Angiospermae, golongan iki disebut uga Anthophyta ("tetanduran kembang"). Sistem Wettstein lan Sistem Engler mapanaké Angiospermae ing tingkat subdivisio. Sistem Reveal nglebokaké kabèh tetanduran ngembang ing subdivisio Magnoliophytina, nanging ing èdhisi terusané misahaké dadi Magnoliopsida, Liliopsida, lan Rosopsida. Sistem Takhtajan lan sistem Cronquist nglebokaké golongan iki ing njeron tingkat divisio kanthi jeneng Magnoliophyta. Sistem Dahlgren lan sistem Thorne (1992) migunakaké jeneng Magnoliopsida lan mapanaké ing tingkat kelas. Saiki, sistem klasifikasi sing paling pungkasan, kaya sistem APG (1998) lan sistem APG II (2003), ora ndadèaké manèh minangka sawijining golongan takson dhéwé nanging minangka sawijining klade tanpa jeneng botani resmi kanthi jeneng angiosperms (sistem iki migunakaké jeneng-jeneng basa Inggris utawa diinggrisaké kanggo jeneng-jeneng ora resmi).

Pambagéan internal (taksonomi)[besut | besut sumber]

Klasifikasi internal golongan iki ngalami akèh owah-owahan. Sistem Klasifikasi Cronquist (1981) isih akèh dipigunaaké nanging wiwit dipitakonaké keakuratané saka sisih filogèni mliginé amarga matentangan karo asil-asil panylidikan molekular. Kesepakatan umum bab kepriyé tetanduran ngembang diklumpukaké wiwit tercapai wiwit asil "Angiosperm Phylogeny Group" (APG) diwetokaké taun 1998 lan dianyaraké (update) ing taun 2003 minangka Sistem Klasifikasi APG II.[1]

Sistem Cronquist mbagi tetanduran ngembang dadi rong golongan: Magnoliopsida lan Liliopsida. Jeneng pemeri liya sing diidinaké ing Pasal 16 ICBN iku Dicotyledoneae (dikotil) lan Monocotyledoneae (monokotil) adhedasar sajarah lan nunjukaké sawijining ciri sing cukup gampang kanggo diamati sanajan ora mesthi mangkono: tetanduran dikotil duwé loro godhong lembaga éwadéné tetanduran monokotil duwé siji godhong lembaga.

Sistem APG, sing migunakaké konsèp kladistika lan akèh migunakaké metode panglompokan statistika (clustering) sarta nglebokaké data-data molekular, ngéntuki manawa monokotil arupa golongan monofiletik utawa holofiletik, lan dijenengi monocots (wangun jamak saka monocot), nanging dikotil pranyata ora (sinebut golongan asifat parafiletik). Sanajan mangkono ana golongan gedhé dikotil sing monofiletik sing dijenengi eudicots utawa tricolpates. Jeneng eudicot ateges "dikotil sajati" amarga nunjukaké ciri-ciri sing biyasa dinyataaké minangka ciri khas dikotil, kaya ta kembang kanthi papat utawa lima mahkota kembang lan papat utawa lima kelopak kembang. Sisa saka pamisahan iki, sing tetep parafiletik, biyasa dijenengi paleodicots (paleo- ateges "purba" utawa "kuno") kanggo nggampangaké panyebutan.

Panylidikan migunakaké filosofi filogèni nganti saiki wus nemoaké wolung golongan utama ing tetanduran ngembang, ya iku monocots, eudicots, Amborellales, Nymphaeales, Austrobileyales, Chloranthales, Ceratophyllales, lan magnoliids. Gegandhengan ing antarané siji lan sijiné nganti saiki isih terus dislidiki.

Karagaman jinis lan manfaat[besut | besut sumber]

Manéka warna kembang ing slide

Jinis tetanduran ngembang diprakiraaké watara 250.000 tekan 400.000 [2] [3] [4] sing bisa diklumpokaké nganti paling sithik 402 suku (adhedhasar taksiran ing Sistem APG II). Sistem APG 1998 nelaaké ana 462 suku. Monokotil nyakup sakiwa-tengené 23% saka kabèh spésies lan "dikotil sajati" (eudicots) nyakup 75% saka kabèh spésies.

Sepuluh gedhé suku tetanduran miturut akèhé jinis ya iku:

  1. Asteraceae utawa Compositae (suku keningkir-keningkiran): 23.600 jinis[5]
  2. Orchidaceae (suku anggrèk-anggrèkan): 21.950[5]
  3. Fabaceae utawa Leguminosae (suku polong-polongan): 19.400[5]
  4. Rubiaceae (suku kopi-kopian): 13.183[6]
  5. Poaceae, Glumiflorae, utawa Gramineae (suku suket-suketan): 10.035[5]
  6. Lamiaceae utawa Labiatae (suku nilam-nilaman): 7.173[5]
  7. Euphorbiaceae (suku kastuba-kastubaan): 5.735[5]
  8. Cyperaceae (suku teki-tekian): 4.350[5]
  9. Malvaceae (suku kapas-kapasan): 4.225
  10. Araceae (suku tales-talesan): 4.025

Orchidaceae, Poaceae, Cyperaceae lan Araceae iku monokotil.

Kasepuluh suku ing ndhuwur nyakup manéka warna jinis tetanduran wigati ing kauripan manungsa, ing babagan tetanèn, kahutanan lan indhustri. Suku suket-suketan cetha arupa suku paling wigati amarga ngasilaké manéka warna sumber ènergi pangan kanggo manungsa lan kéwan saka pari, gandum, jagung, jelai, haver, jawawut, tebu, sarta sorgum. Suku polong-polongan manggon ing papan paling wigati nomer loro, minangka sumber protein nabati lan sayuran utama lan manéka warna peran budaya liya (kayu, pewarna, lan racun). Suku nilam-nilaman anggotané akèh tetanduran sing ngasilaké lenga atsiri lan bahan usada.

Sapérangan suku wigati liyané ing kauripan manungsa ya iku

  • Solanaceae (suku terong]-terongan), minangka sumber pangan wigati mliginé sayuran
  • Cucurbitaceae (suku labu-labuan), minangka sumber sayuran wigati
  • Brassicaceae utawa Cruciferae (suku sawi-sawian), minangka sumber sayuran lan lenga pangan wigati
  • Alliaceae (suku bawang-bawangan), minangka sumber sayuran bumbu wigati
  • Piperaceae (suku sirih-sirihan), minangka sumber rempah-rempah wigati.
  • Arecaceae utawa Palmae (suku pinang-pinangan), minangka pandhukung kauripan wigati masarakat agraris tlatah tropika
  • Rutaceae (suku jeruk-jerukan), Rosaceae (suku mawar-mawaran), lan Myrtaceae (suku jambu-jambuan) akèh ngasilaké woh-wohan wigati.

Tetanduran ngembang uga dadi pamasok sumberdaya alam ing wangun kayu, kertas, serat (umpamané kapas, kapuk, lan henep, sisal, serat manila), usada (digitalis, kamfer), tetanduran hias (ruangan utawa tarbuka), lan manéka warna pratélan dawa kagunaan liya.

Réferènsi[besut | besut sumber]

  1. ^ Angiosperm Phylogeny Group (2003). "An update of the Angiosperm Phylogeny Group classification for the orders and families of flowering plants: APG II". Botanical Journal of the Linnean Society 141: 399–436. doi:10.1046/j.1095-8339.2003.t01-1-00158.x. 
  2. ^ Thorne, R. F. (2002). "How many species of seed plants are there?". Taxon 51: 511–522. doi:10.2307/1554864. >
  3. ^ Scotland, R. W. & Wortley, A. H. (2003). "How many species of seed plants are there?". Taxon 52: 101–104. doi:10.2307/3647306. 
  4. ^ Govaerts, R.url=http://www.ingentaconnect.com/content/iapt/tax/2003/00000052/00000003/art00016 (2003). "How many species of seed plants are there?-a response". Taxon 52 (3): 583–584. doi:10.2307/3647457. 
  5. ^ a b c d e f g Stevens, P.F. (2001 onwards). "Angiosperm Phylogeny Website (at Missouri Botanical Garden)".  Priksa gandra date ing: |date= (pitulung)
  6. ^ "Kew Scientist 30 (October2006)" (PDF). 

Pranala njaba[besut | besut sumber]

Wikibooks
Wikibooks Dichotomous Key gadhah kaca kanthi sesirah