Mikha

Saka Wikipédia Jawa, bauwarna mardika basa Jawa
Jump to navigation Jump to search

Katoné kitab nabi Mikha, uga ditulis déning nabi kang asmané padha. Mikha olèhé sugeng sajaman karo nabi Yesaya lan asalé saka siji désa ing Yehuda, ing karaton kidul. Dhèwèké yakin tenan yèn Yehuda bakal ngadhěpi mala pataka kaya kang diumumaké déning Amos bab karaton lor. Mikha uga ngandhani yèn Allah mesthi ya bakal ndendha bangsa Yehuda amarga kejem banget lan ora adil marang wong liya, Nanging ing kotbahing Mikha ya katon ana tandha-tandha kang luwih cetha bab pangarepan ing mangsa ngarep.

Pérangan-pérangan kang menarik digatèaké sajeroning buku iki ya iku: gambaran adem tentrem ing sawewengkoning bumi ing ngisor pimpinaning Allah (Mikha 4:1-4); banjur ana ramalan bab siji Ratu Agung kang bakal muncul saka trahing Dawud lan bakal ngasta pangayeman ing bangsa Yehuda (5:2-4); lan, ing siji padha (6:8), ana ringkesan saka apa kang bakal diomongaké déning para nabi-nabi Israèl, ya iku: "Sing dituntut Allah saka awake dhéwé iku supaya tumindhak adil, tansah ngamalaké sih-tresna, lan andhap asor urip manunggal karo Gusti."