Daniel Carleton Gajdusek

Saka Wikipédia Jawa, bauwarna bébas abasa Jawa
Daniel Carleton Gajdusek
Daniel Carleton Gajdusek
Lair (1923-09-09)Sèptèmber 9, 1923
Yonkers, New York
Pati Dhésèmber 12, 2008(2008-12-12) (umur 85)
Tromsø, Nurwègen
Kabangsan Amérika Sarékat
Babagan Kedhokteran
Misuwur amarga Prion
Notable awards Penghargaan Nobel Kedhokteran (1976)

Daniel Carleton Gajdusek (9 September 1923 - 12 Dhésèmber 2008) inggih punika salah satunggaling virolog lan dhokter Amérika Sarékat ingkang nedahaken bilih lelara kuru, lelara ingkang bebaya sanget ingkang nyerang polo ingkang dipuntandang déning sajumlah penduduk asli wonten ing laladan Papua Nugini, dipunsebabaken déning agen ingkang nular. Panemon punika kagungan relevansi wonten ing sakelompok lelara ingkang dipunkenal minangka lelara degenerasi saraf, ing pundi jaringan saraf ancur, ingkang sapunika kanthi kolektif dipunkenal minangka ensefalopati spongiform menular. Amargi karyanipun, Gajdusek dipunanugrahi Penghargaan Nobel Fisiologi utawa Kedhokteran nalika taun 1976, ingkang dipuntampi kaliyan Baruch S. Blumberg.[1]

Gajdusek miyos saking bapak saking Hongaria lan ibu saking Slowakia. Piyambakipun lulus saking sekolah tinggi nalika taun 1940, nalika yuswanipun nembé ngancik angka 16 taun lan pikantuk gelar sarjana saking University of Rochester ing taun 1943. Piyambakipun mungkasaken pendidikan kadhokteran wonten ing Harvard University, pikantuk gelar dhokter ing taun 1946. Antawis taun 1946-1948, piyambakipun ndhérék pelatihan klinik ing babagan pediatri ing Children's Hospital Boston, Massachusetts, saking taun 1948 dumugi taun 1949 piyambakipun sinau kimia fisika dhumateng kimiawan Linus Carl Pauling ing California Institute of Technology (Caltech). Sakinng taun 1949 dumugi taun 1952 piyambakipun nglajengaken studi pascasarjana wonten ing virologi ing laboratorium kagunganipun mikrobiolog John F. Enders ing Universitas Harvard. Nalika taun 1952 dumugi taun 1953 Gajdusek tugas wonten ing United States Army ing Walter Reed Army Institute of Research wonten ing kutha Washington, D.C. Sadangu 2 taun candhakipun, piyambakipun nindakaken panalitén ing Lembaga Pasteur, Teheran, Iran. Lajeng taun 1955, piyambakipun sinau virologi dhumateng imunolog Sir Macfarlane Burnet ing Walter and Eliza Hall Institute of Medical Research at the Hall Institute ing laladan Melbourne, Australia. Nalika taun 1958 Gajdusek gabung kaliyan National Institutes of Health (NIH) wonten ing Bethesda, Maryland, ing pundi piyambakipun tetep ing mrika dumugi taun 1997, nalika piyambakipun dipundakwa lan dipunkunjara antawis satunggal taun amargi kadakwa nganiaya laré.[2]

Wonten ing taun 1955, sadangunipun sinau virologi wonten ing Hall Institute, Gajdusek nyinaoni kalangsungan lan efek ingkang anéh wonten ing lelara neurodegeneratif ingkang wonten ing suku Fore ing laladan Papua Nugini lan tindakaken wonten ing laladan punika saperlu nyinaoni lelara punika. Éwadéné ingkang kapisanan, dipunprakirakaken bilih lelara punika, ingkang winastan kuru déning penduduk setempat, dipunturunaken kanthi genetik, Gajdusek ugi manggihaken manawi lelara punika dipuntularaken lumantar ritual ingkang nindakaken nedha polo kerabat ingkang séda (kanibalisme). Uji autopsi polo tiyang ingkang sampun séda margi lelara lelara kuru nedahaken karisakan saraf, ananging Gajdusek boten saged manggihaken panyebabipun. Salah satunggaling tiyang panliti ingkang nyinaoni babagn lelara neurodegeneratif wonten ing kéwan gadhah dudutan bilih kuru mirib kaliyan scrapie, lelara neurodegeneratif wonten ing domba. Gajdusek nedahaken bilih kuru panci mirib kaliyan scrapie, makaten ugi lelara Creutzfeldt-Jakob, gangguan neurodegeneratif ing manungsa. Gajdusek nggayutaken lelara punika dhateng "agen menular", ingkang dipunsebut virus ingkang mlampahipun alon.[3]

Séda[besut | besut sumber]

Nalika ngunjungi kolega wonten ing Tromsoe, Norwegia, Gajdusek tilar donya.

Cathetan suku[besut | besut sumber]

Pranala njaba[besut | besut sumber]