Bagong

Tokoh pawayangan Jawa
Paraga:	Punakawan
Ciri-ciri:	Dedege Pendhek, Lemu, Matane Gedhe, Lambe ndower
Kaistimewaané:	suwara ndomble/ndower
Pusaka:	Pethel

Bagong iku dicipta saka wewayangané Semar. Mula saka iku, prejengané ora béda adoh. kaya déné wewayangan, Bagong awaké ireng. Tinimbang anaké Semar liyané, Bagong paling kurang ajar. Basa Jawané ora karuwan. Dhèwèké seneng ngritik apa waé.

Bagong iku asliné jenengé cukuran rambut. Bocah yèn dicukur plonthos kabèh, jenengé gundhul. Yèn sing diturahké mung ngarep thok jenengé kuncung. Yèn sing diturahké ing mburi dijenengi kuncir utawa kucir. Yèn rambut sing sisa ana sisih tengen utawa kiwa jenengé pethek. Nah bagong iku kanggo wong sing rambuté mung ana ing mburi sisih ngisor (cedhak gulu). Cukuran bagong uga karan gombak.

Yèn dideleng saka pawakané, Bagong pancèn memper Semar. Nalika Sang Hyang Ismaya didhawuhi mudhun ing donya déning Sang Hyang Tunggal, Sang Hyang Ismaya jaluk diwènèhi kanca. Kaya déné lumrahé panakawan kang tegesé kanca kang nyeksèni, paling ora punakawan ana loro. Sanghyang Tunggal banjur gawé bagong saka wewayangané Semar.

Bagong nduwé bojo jenengé Dèwi Bagnawati lan urip ing padhepokan Klampis Ireng.

Ing panggonan liya, Bagong sok diganti jeneng. Ana kang diowahi urutan kulawargané. Ing Jawa Tengah, Bagong iku anak ragilé Semar. Déné ing Tlatah Banyumas, paraga kaya Bagong iki dadi pambarepé. Ing panggonan liya iku, Bagong sok diganti dadi Bawor, Carub, Cepot, Lupit utawa Astrajingga

Pranala njaba

• Bagong ing Bausastra Javanese Dictionary Archived 2010-03-14 at the Wayback Machine., 25 Agustus 2008