Annelida

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Annelida
Temporal range: Cambria - Kini
Glycera sp.
Klasifikasi èlmiah
krajan: Animalia
Superfilum: Lophotrochozoa
filum: Annelida
Lamarck, 1809
Kelas

Kelas Polychaeta
Kelas Clitellata
Kelas Myzostomida
Kelas Archiannelida
Kelas Oligochaeta
Kelas Hirudinea

Annelida utawa cacing gelang yaiku klompok cacing kanthi awak awujud sègmèn-sègmèn.[1] Annelida iku kéwan sing wis nduwèni rongga awak sejati (kéwan selomata) sing struktur awaké paling prasaja.[1] Tembung Annelida asalé saka basa Yunani, yaiku tembung annulus sing tegesé cincin lan oidos sing tegesé bentuk.[2] Dadi, Annelida yaiku cacing sing bentuké cincin. Cacing iki urip ing banyu tawar, banyu segara, lan ing dharatan.[2]

Ciri-Ciri Umum[sunting | sunting sumber]

Ciri-ciri umum Annelida, yaiku:

  1. Simetri bilateral, bentuké kaya gelang (anellus = cincin)[3]
  2. Nduwèni rongga awak (Triploblastik Selomata)[3]
  3. Ros awak (segmen) diarani Metameri sing dadi alat ekskresi yaiku nefridium (lubang réprodhuksi), otot, lan pembuluh darah[3]
  4. Sistem pencernaan jangkep utawa sampurna[3]
  5. Sistem peredaran darah tertutup[3]

Ciri-Ciri Awak[sunting | sunting sumber]

Bentuk[sunting | sunting sumber]

Annelida nduwèni awak sing simetris bilateral.[2] Dinding awaké kapérang dadi telu, yaiku endoderm, mesoderm, lan ektoderm.[2] Ing bagéyan jaba awak ditutupi lapisan kutikula sing tipis.[2] Ing lapisan jaba uga ana sèl sensoris utawa sèl panarima rangsang.[2] Awak Annelida simetri bilateral lan awujud sègmèn-sègmèn. Saben sègmèn katon kaya cincin saéngga awak Annelida mèmper kaya rantaman cincin.[1]

Ukuran[sunting | sunting sumber]

Dawa awak Annelida yaiku watara 1 mm nganti 3 m. Tuladha Annelida sing dawané nganti 3 m yaiku cacing lemah sing ditemokaké ing Australia.[1]

Struktur lan Fungsi[sunting | sunting sumber]

Annelida nduwèni sègmèn ing bagéyan jaba lan jero awaké. Antarané sègmèn siji lan sègmèn liyané ana singgetané sing diarani septa. Pembuluh getih, sistem èkskresi, lan sistem saraf ing antarané sègmen duwé gegayutan lan bisa nembus septa.[1] Rongga awak Annelida kaisi cairan sing mrabawani kanggo obahé Annelida.[1] Obahé Annelida uga njalari kontraksi otot. Ototé kawangun saka otot mubeng (otot sirkuler) lan otot ndawa (otot longitudinal). Sistem pencernaan Annelida wis jangkep, yaiku lambé, faring, esophagus, usus, lan anus.[1] Cacing iki wis nduwèni pembuluh getih, saéngga sistem peredaran getihé katutup. Getihé ngandhut hemoglobin sing awerna abang.[1] Pembuluh getih sing ngubengi esophagus nduwèni struktur sing luwih ngotot. Pembuluh getih iki kanggo mompa getih menyang saawak. Sistem saraf Annelida yaiku sistem saraf tangga tali.[1] Ganglia utek dumunung ing ngarepé faring ing bagéyan anterior awak. Ekskresi ditindakaké dening organ ekskresi, yaiku nefridia, nefrostom, nefrotor. Nefridia yaiku organ ekskresi arupa saluran, nefrostom yaiku corong sing ana siliané, lan nefrotor yaiku pori-pori papan metuné regetan.[1]

Cara Urip lan Habitat[sunting | sunting sumber]

Akèh Annelida sing urip bébas, ana uga sing urip parasit kanthi cara nèmpèl ing awak vertebrata kalebu manungsa.[1] Annelida urip ing dhasar segara lan banyu tawar.[1] Sawatara jinis liyané urip ning lemah lan ing papan-papan sing lembab.[1] Ana uga Annelida sing urip ing luwangan lemah sing digawé dhéwé.[1]

Réprodhuksi[sunting | sunting sumber]

Réprodhuksi Annelida yaiku kanthi cara sèksual mbentuk gamèt.[1] Sawatara jinis Annelida bisa réprodhuksi asèksual yaiku kanthi cara fragmèntasi, banjur nindakaké regenerasi.[1] Organ kelamin jantan (testis) lan organ kelamin betina (ovarium) ana sing mapan ing siji individu lan ana sing misah ing individu liya (gonokoris).[1]

Klasifikasi[sunting | sunting sumber]

Annelida kapérang dadi telung kelas, yaiku Polychaeta (cacing rambut akèh), Oligochaeta (cacing rambut sithik), lan Hirudinea.

Polychaeta[sunting | sunting sumber]

Polychaeta (basa Yunani, poly = akèh, chaetae = rambut kaku) yaiku Annelida sing rambuté akèh.[4] Awak Polychaeta dibedakaké dadi bagéyan sirah (prostomium) karo mripat, anténa, lan sensor palpus.[4] Polychaeta nduwèni sepasang struktur kaya dayung diarani parapodia (tunggal = parapodium) ing saben sègmèn awaké.[4] Fungsi saka parapodia yaiku kanggo alat obah lan ngandhut pembuluh getih alus, saéngga bisa uga kaya insang kanggo ambegan.[4] Saben parapodium nduwèni rambut kaku sing diarani seta sing kasusun saka kitin.[4] Habitat Polychaeta ing segara. Tuladha cacing iki yaiku Eunice viridis (cacing wawo) lan Lysidice oele (cacing palolo) sing asring dikonsumsi wong-wong ing Maluku.[3] Tuladha liyané yaiku Sabellastarte indica (cacing kipas), Nereis virens, lan Marphysa sanguinea.[1]

Oligochaeta[sunting | sunting sumber]

Oligochaeta (ing basa Yunani, oligo = sithik, cjaetae = rambut kaku) yaiku Annelida sing rambuté sithik.[4] Oligochaeta ora nduwé parapodia, nanging nduwèni seta ing sègmèn awaké.[4] Tuladha Oligochaeta sing kawentar yaiku cacing lemah.[4] Jinis cacing iki antara liya cacing lemah Amerika (Lumbricus terrestris), cacing lemah Asia (Pheretima), cacing abang (Tubifex), lan cacing lemah raseksa Australia (Digaster longmani).[4] Oligochaeta mangan organisme liya sing urip ing jero lemah kanthi cara ndhudhuk lemah.[4] Cara ndhudhuk lemah iki bisa mawuraké lemah.[4] Mupangat liya saka cacing iki yaiku digunakaké kanggo bahan kosmetik, obat, lan campuran pangan sing ngandhut protein dhuwur kanggo kéwan ingon-ingon.[4] Oligochaeta urip ing dharatan utawa ing banyu tawar, asifat hermafrodit, saéngga ing jero awaké ana ovarium lan testis.[5] Ing sawatara sègmèn, epidermise dadi kandel sing banjur diarani klitellum.[5] Nalika réprodhuksi, ing bagéyan klitellum ngetokaké kokon.[5] Kokon iki sing mengkoné netes dadi individu anyar.[5] Déné respirasi dilakokaké kanthi cara difusi liwat kabèh permukaan awaké.[5]

Hirudinea[sunting | sunting sumber]

Hirudinea yaiku kelas Annelida sing cacahé sithik.[4] Kéwan iki ora nduwé arapodium utawa seta ing sègmèn awaké.[4] Dawa awak Hirudinea manéka werna, saka 1 cm nganti 30 cm.[4] Awaké gèpèng kanthi pucuk anterior lan posterior lancip.[4] Ing anterior lan posterior ana alat kanggo ngisep sing gunané kanggo nèmpèl lan obah.[4] Hirudinea kalebu kéwan ektoparasit ing permukaan awak inangé. Inangé yaiku vertebrata kalebu manungsa.[4]

Hirudinea kalebu cacing sing ngisep getih.[5] Déné sing kalebu kelas cacing iki yaiku bangsané lintah.[5] Tuladhané lintah yaiku (Hirudo medicinalis) lan pacèt (Haemadipsa javanica).[5] Lintah biasané urip ing dhaérah anyep, sadurungé ngisep getih, lintah nyuntikaké zat anastesi utawa bius menyang awak mangsané.[5] Saéngga nalika diisep gatihé, mangsané ora krasa lara.[5] Lintah uga bisa ngasilaké zat antikoagulan (zat anti beku getih) sing diarani harudin.[5] Anané zat antikoagulan iki nyebabaké getih reget sing diisep ora mbeku.[5] Lintah nduwèni alat isep sing cacahé loro ing bagéyan anterior lan posterior.[5] Kanggo nyegah supaya kita ora dicokot utawa nalika dicokot lintah yaiku kanthi cara diwènèhi banyu mbako utawa uyah, bisa uga awaké dilèlèti balsem utawa minyak kayu putih.[5]

Cathetan suku[sunting | sunting sumber]

  1. ^ a b c d e f g h i j k l m n o p q r (id)Phylum Annelida(diundhuh 28 September 2012)
  2. ^ a b c d e f Karmana, Oman.2007.Cerdas Belajar Biologi.Bandung : Grafindo (kaca 216)
  3. ^ a b c d e f Annelida(diundhuh 28 September 2012)
  4. ^ a b c d e f g h i j k l m n o p q r Tentang Annelida(diundhuh 29 September 2012)
  5. ^ a b c d e f g h i j k l m n Klasifikasi Annelida(diundhuh 1 Oktober 2012)


Sumber artikel punika saking kaca situs web: "http://jv.wikipedia.org/w/index.php?title=Annelida&oldid=834630"