Echinodermata

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Echinodermata
Temporal range: Ediacaran
Bulu babi
Klasifikasi èlmiah
Domain: Eukaryota
krajan: Animalia
Subkrajan: Eumetazoa
Superfilum: Deuterostomia
filum: Echinodermata
Klein, 1734

Echinodermata inggih menika salah satunggaling filum saking kéwan avertebrata.[1] Echinodermata asalipun saking basa Yunani inggih menika kawangun saking tembung echin ingkang tegesipun eri kaliyan derma ingkang tegesipun kulit.[1] Dados, Echinodermata menika tegesipun kéwan ingkang kulitipun awujud eri.[1] Tuladha Echinodermata inggih menika bintang laut, bintang ular, bulu babi, teripang, kaliyan lilia laut.[2] Sedaya jinis Echinodermata gesang ing segara kanthi bebas.[2] Spèsiès-spèsiès menika obah kanthi cara mbrangkang alon sanget kaliyan boten wonten ingkang gesang parasitik.[2] Jinis ingkang gesangipun nèmpèl (sesil) namung lilia laut.[2]

Ciri-Ciri[sunting | sunting sumber]

Wangunipun badan Echinodermata dewasa simetri radial, anggadhahi balung njero ingkang arupa zat kapur kanthi brenjolan eri ing permukaan.[1] Déné larvanipun awangun simetri bilateral ingkang anggadhahi lapisan tiga, wonten silia ing organ badanipun, boten gadhah mustaka kaliyan utek.[1] Alat obah Echinodermata arupa sikil tabung ingkang dipunwastani suku ambulakral.[1] Sistem pencernaan taksih prasaja, ugi wonten ingkang boten gadhah anus. Sistem peredaran getih dèrèng cetha lan ugi taksih prasaja.[1] Ambeganipun nganggé insang utawi papula, inggih menika brenjolan ingkang wonten ing rongga badan.[1] Sistem sarafipun kawangun saking saraf inggil arupa bunderan utawa awangun ali-ali ingkang ngubengi tutuk lan saraf radial ingkang tumuju tangan.[1] Réprodhuksinipun kanthi cara generatif, inggih menika leburipun sperma kaliyan ovum ingkang salajengipun ngasilaken zigot.[3]

Klasifikasi[sunting | sunting sumber]

Filum Echinodermata kapérang dados gangsal kelas, inggih menika Asteroidea, Ophiuroidea, Holothuroidea, Echinoidea, kaliyan Crionoidea.

  • Asteroidea (bintang laut), anggadhahi bentuk kados lintang kanthi lengen lima ing badanipun ingkang dipunjangkepi eri. Kéwan menika asring dipunpanggihi ing pantè. Tuladhanipun Astropecten irregularis, Culeitin.[4]
  • Ophiuroidea (bintang ular laut), anggadhahi lengen lima ingkan menawi diobah-obahaken mèmper obahipun ula. Kéwan menika boten gadhah anus saéngga sisa pencernaan diwedalaken saking tutuk. Ophiuroidea asring gesang ing segara ingkang jero utawi cethèk, ugi kathah dipunpanggihi ing sawingkingipun watu karang utawi ngubur badan ing pasir. Panganan kéwan menika urang, kerang, utawi sampah saking organisme sanès.[4]
  • Holothuroidea, minangka pangresik segara amargi mangan regedan kaliyan sisa organisme sanès. Kéwan menika anggadhahi eri ingkang alus saéngga bènten kaliyan jinis Echinodermata sanèsipun. Wangun badanipun kados timun, saéngga saged dipunwastani timun laut utawa teripang (Holothuria Sp.).[4]
  • Echinoidea, wangun badanipun bunder lan eri ingkang kathah, tuladhanipun Diadema (bulu babi) kaliyan Echinus (landak laut).[4]
  • Crinoidea (lilia laut), nèmpèl ing substrat ingkang wonten ing segara. Anggadhahi lengen gangsal kanthi wangun badan kados piala, sarta asring dipunwastani lilia laut. Kéwan menika paling primitif tinimbang jinis sanèsipun. Tuladhanipun, Antedon sp lan Holopus sp.[4]

Mupangat Echinodermata[sunting | sunting sumber]

Echinodermata inggih menika kéwan ingkang mangan bathang, sisa-sisa kéwan, kaliyan regedan kéwan segara sanèsipun. Dados, Echinodermata bisa ngresiki segara amargi mangani sisa-sisa wau.[5] Echinodermata ugi saged dipundadosaken bahan panganan.[5] Tuladhanipun mentimun laut (teripang) ingkang sekéca sanget dipundadosaken sop utawi krupuk.[5]


Catheten Suku[sunting | sunting sumber]

  1. ^ a b c d e f g h i Karmana, Oman.2007.Cerdas Belajar Biologi.Bandung : Grafindo
  2. ^ a b c d (id)Echinodermata(dipunundhuh 25 Oktober 2012)
  3. ^ (id)Ciri-ciri Echinodermata(dipunundhuh 25 Oktober 2012)
  4. ^ a b c d e (id)Klasifikasi Echinodermata(dipunundhuh 25 Oktober 2012)
  5. ^ a b c (id)Peran Echinodermata(dipunundhuh 28 Oktober 2012)
Sumber artikel punika saking kaca situs web: "http://jv.wikipedia.org/w/index.php?title=Echinodermata&oldid=876869"