Bèri biru

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Blueberry
PattsBlueberries.jpg
Vaccinium corymbosum
Klasifikasi ngèlmiah
Karajan: Plantae
Dhivisi: Magnoliophyta
Klas: Magnoliopsida
Ordho: Ericales
Famili: Ericaceae
Génus: Vaccinium
Sèksi: Cyanococcus
Rydb.

Bèri Biru (Blueberry) ya iku salah sawijiné tetuwuhan kang kalebu anggota génus Vaccinium.[1] Tuwuhan iki asalé saka Amérika pérangan lor.[1] Woh blueberry awerna ijo pucet nalika durung mateng, banjur malih dadi ungu nalika wis mateng. Woh mau padatan duwé amba 5–16 mm lan duwé kaya déné makutha ing pérangan ngisoré.[1] Wujud kembangé kaya bèl, awerna putih, abang, utawa jambon pucet, trakadhang uga awerna ijo.[2] Ana sawatara spésies blueberry kang bisa dipangan, antarané Vaccinium angustifolium, Vaccinium virgatum, Vaccinium elliottii, lan Vaccinium corymbosum.[1]

Kandhutan Gizi[besut | besut sumber]

Woh bèri biru ngandhut manéka jinis gizi, tuladhané sawatara mineral kaya ta mangan, kalsium, fosfor, zaét besi, kalium, lan sèng.[1] Bèri biru uga ngandhut vitamin B1, B2, B3, vitamin E, vitamin K, karbohidrat, lan lemak.[1] Kandhutan mangan lan vitamin K ing woh blueberry kang akèh bisa nyukupi kabutuhan padinan kanggo awak ya iku mangan 20% lan vitamin K 24 %.[1] Kejaba iku blueberry uga ngandhut antosianin (sawijiné pigmen tetuwuhan kang asifat antioksidan), proantosianidin, resveratrol, flavonol, lan tanin kang kabukti bisa ngalang-alangi tuwuhé sèl kanker.[1]

Mupangat[besut | besut sumber]

  1. Ngontrol tekanan getih kanggo wong kang kena hipertensi[3]
  2. Nyegah ngrembakané karusakan vaskular ginjel, glomerulus, lan tubulus[3]
  3. Ngudhunaké rèsiko kena lelara stroke[3]
  4. Ngudhunaké ekskresi kalsium banyu uyuh lan ngudhunaké kawentuké watu ginjel[3]
  5. Nyegah osteoporosis[3]
  6. Ngudhunaké rèsiko aritmia ventrikular ing pasien iskemia jantung, gagal jantung[3]
  7. Ngudhunaké kolesterol lan ngayomi ati[3]
  8. Nyegah penuaan lumantar kandhutan antioksidan[3]
  9. Nglancaraké sirkulasi getih lan ngayomi pembuluh getih saka plak ala kang bisa mampetaké iliné getih[4]

Kasil Panalitiyan[besut | besut sumber]

Mbakar Lemak nganti 73%[besut | besut sumber]

Woh bèri biru ora mung apik kanggo kasarasan manungsa amarga kandhutan vitamin lan mineral, nanging uga duwé mupangat kanggo wong sing kepéngin ngudhunaké bobot awaké.[5] Kandhutan zat tartamtu ing blueberry bisa mbantu mbakar lemak ing awak.[5] Panalitiyan paling anyar nemu bilih blueberry bisa mbakar lemak nganti 73% yèn dipangan kanthi dosis dhuwur.[5]

Miturut sawijiné studi kang ditindakaké panaliti ing Texas Woman’s University, blueberry bisa mecah sèl lemak sarta ngendhek pambentukan jaringan lemak anyar ing tikus, saéngga blueberry bisa dadi gegaman ampuh kanggo ngayahi obesitas.[5] Zat kang bisa mecah sèl emak mau ya iku polifenol, ya iku saklompok senyawa kimia kang uga tinemu ing woh-wohan liya.[5] Kasil panalitiyan mbuktèkaké bilih polifenol bisa ngethok sèl-sèl lemak nganti 73 % yèn dosis dhuwur lan 27% yèn dosisé sithik.[5]

Panalitiyan babagan khasiat blueberry kang bisa ngelongi lemak uga ditindakaké déning tim panaliti saka Universitas Michigan, Amérikah Sarékat.[6] Perkawis iku diandharaké sawisé nganakaké pancoban tumrap tikus kang nindakaké diet kanthi mangan blueberry sing akèh.[6] Lemak ing tikus pancoban mau kélong sawisé diet.[6] Lemak kang ana ing weteng iku salah sawijiné sabab kang njalari lelara jantung lan diabetes.[6] Kanthi ngelongi lemak ing weteng uga bisa ngudhunaké kolesterol. Lan salah sawijiné carané ya iku mangan woh blueberry.[6] kandhutan antioksidan kang dhuwur ing woh blueberry uga nuwuhaké sistem nyimpen lemak ing awak dadi malih lan luwih rikat ngéwahi glukosa dadi tenaga.[6] Saéngga lemak ora ngendhek suwé ing awak.[6]

Nguwataké Memori[besut | besut sumber]

Woh blueberry ngandhut unsur kimia mangan kang kalebu zat anti peradangan kang kanthi cara ora langsung bisa nlancaraké ilèn getih lan ngundhakaké kapasitas daya ingat.[3] Kaya kang diandharaké Jeremy Spencer saka Departemen Dinas Makanan Biosains, Inggris kang dilansir déning BBC bilih kasil panalitiyan mbuktèkaké yèn blueberry apik banget kanggo awak lan bisa nguwataké kapasitas memori.[3]

Uga delengen[besut | besut sumber]

Cathetan suku[besut | besut sumber]

  1. a b c d e f g h Blueberry, buah kaya nutrisi(diundhuh 15 Januari 2013)
  2. Bakar Lemak dengan Buah Blueberry(diundhuh 15 Januari 2013)
  3. a b c d e f g h i j Buah Blueberry(diundhuh 15 januari 2013)
  4. Manfaat Buah Blueberry(diundhuh 15 Januari 2013)
  5. a b c d e f Buah yang Dibuktikan Membakar Lemak hingga 73%(diundhuh 15 januari 2013)
  6. a b c d e f g Khasiat buah Blueberry(diundhuh 16 Januari 2013)