Doenjang

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Doenjang

Doenjang menika jinising saos ingkang asalipun saking Korea.[1][2]

Ing cathetan sejarah[sunting | sunting sumber]

Pendamelan doenjang menika ingkang kepanggih dipunsebataken ing teks sajarah Cina ing Buku Wei lan Suku Dongyi sarta teks Sanguozhi ingkang dipunserat déning Chen Shou ing taun 290.[2] Nalika jaman rumiyin, doenjang dipunparingi nama tojang.[2] Tiyang Cina kuno mangertos ambunipun doenjang minangka saos khas Korea.[2]

Proses damel doenjang[sunting | sunting sumber]

Doenjang dipundamel saking dangsul ingkang dipungodhog lan dipunpépé ing panas srengèngé lajeng dipunbentuk dados persegi ingkang dipunwastani mejubap utawi meju.[2] Nalika proses penggaringan menika medal jamur minangka tandha sampun wonten proses fermentasi lan medalaken ambu ingkang khas. Bibar garing meju dipunpindhah dhateng papan ingkang anget supados proses fermentasi kelampahan kanthi cepet.[2] Bibar menika dipunlebetaken wonten ing tempayan ageng ingkang dipunisi kalihan toya mawi sarem. Toya sarem menika damel proses fermentasi ingkang langkung sae malih. Menika ingkang dipunsebat doenjang. Menawi doenjang dipunpisah dipunpisah kalihan toya asiling fermentasi saged ngasilaken ganjang.[2]

Bahan masakan[sunting | sunting sumber]

Padatanipun doenjang dipundamel kanthi manual ing griyanipun tiyang Korea, mliginipun ing padésan. Cara damel doenjang kanthi manual namung ngginakaken toya sarem déné doenjang damelan pabrik dipundamel kanthi nambahaken glepung gandhum. Wonten ing ingkang nambahaken kalihan iwak teri supados langkung écho. Doenjang ingkang dipundhahar mawi bawang, minyak wijen, lan gochujang (pasta lombok Korea) ingkang dipunbungkus mawi janganan menika dipunsebat ssamjang (tanpa sekul) utawi ssambap (kalihan sekul). Doenjang ugi kondhang dipunmasak minangka sup inggih menika Doenjangjjigae (sup doenjang) ingkang padatanipun mawi isi tahu lan bumbu kados bubuk lombok, jamur, panganan laut lan daging. Doenjang kagungan gizi inggil amargi saking proses fermentasi ingkang asipat anti kanker, kejawi menika ugi ngandhut sumber mineral lan flavonoid ingkang asipat antioksidan.

Nilai doenjang[sunting | sunting sumber]

Doenjang kanggé tiyang Korea gadhah nilai 5.[2] Kapisan menika dansim, ateges doenjang kagungan rasa lan aroma ingkang sami sanajan menawi dipuncampur kalihan rasa sanès. [2] Kaping kalih menika hangsim, ateges doenjang boten bakal sayup utawi bosok. Menawi dipunsimpen kanthi leras lan saya dangu saged damel rasa ingkang sansaya kuwat. [2] Kaping tiga menika bulsim, doenjang saged ngicalaken mambu amis daging lan ulam.[2] Kaping sekawan menika seonsim, doenjang saged damel masakan pedes tambah gurih. [2] Kaping gangsal menika hwasim, doenjang saged dados jangkepan jinis samubarang masakan.[2]

Cathetan suku[sunting | sunting sumber]

  1. ^ (id) Doenjang, (dipunakses tanggal 24 Februari 2013)
  2. ^ a b c d e f g h i j k l m (en)Ahn Hong-beum (SPRING 2004). "Ganjang and Doenjang: Traditional Fermented Seasonings". Koreana 18 (1): 72-75. http://koreana.kf.or.kr/pdf_file/2003/2003_SPRING_E072.pdf.

Pranala njawi[sunting | sunting sumber]

Cithakan:Masakan Korea

Sumber artikel punika saking kaca situs web: "http://jv.wikipedia.org/w/index.php?title=Doenjang&oldid=836988"