Guk

Saka Wikipédia Jawa, bauwarna mardika basa Jawa
Guk
Hangul국, 탕
Hanja
Alihaksara Koréa Kang Sinampurnaguk, tang
McCune–Reischauerkuk, t'ang

Guk utawi Tang punika jinising sup khas saking Koréa.[1][2] Wonten manéka variasi guk dhedhasar cara masak saéngga jinisipun ugi manéka warni.[2] Wigatinipun sup wonten ing kuliner Koréa saged dipuntelusur saking buku masak kuna saking jaman Dinasti Joseon (1392-1910) kanthi irah-irahan Joseonmussang sinsikyori jebeop ingkang nyerataken "Guk punika masakan paling wigati angka kalih bibar sekul ing nginggilipun méja dhahar dalu lan kalebet lawuh ingkang paling wigati. Dhahar tanpa sajian guk punika sami kemawon praupan tanpa mata. Boten wonten pista ingkang jangkep tanpa guk".[2]

Variasi guk[besut | besut sumber]

Tteokguk, jinis malgeunguk.
Seolleongtang, jinis gomguk

Wonten kathah jinis guk ingkang dipundamel saking manéka jinis bahan, kados janganan lan daging ugi dipunsajekaken minangka lawuh (lauk) utawi dhaharan utami nalika dipuncampur kaliyan sekul.[2] Padatanipun guk punika dipupérang dados kategori wonten ing ngandhap punika:

Kanggé damel malgeunguk kanthi jumlah ingkang kathah punika mbetahaken kathah daging sapi lan dipunmasak kanthi wekdal ingkang dangu.[2] Supados raos saking sup punika dados gurih daging sapi mau dipuntugel alit-alit rumiyin, lajeng dipunparingi bumbu lan dipunoseng lan dipungodhog ing toya.[2] Malgeunguk padatanipun dipunparingi bumbu sarem lan ganjang (kecap asin).[2]

  • Tojangguk, sup ingkang dipunparingi bumbu doenjang.[2] Tojangguk dipunmasak kaliyan bahan doenjang, saéngga raosipun gurih sanajan sakedhik utawi boten dipuntambah daging. Padatanipun tojangguk dipuntambah kaliyan bubuk lombok (gochugaru) utawi pasta lombok (gochujang) kanggé nambah raos pedes.[2]
  • Gomguk, sup balung sapi kenthel.[2] Gomguk dipundamel kanthi cara daging lan balung sapi dipungodhog sesarengan dumugi gajih (lemak)ipun medal utawi nalika kenthelipun sampu krasa cekap.[2] Bumbu kados sarem lan kecapa asin dipuntambah sadèrèngipun sup dados kenthel. Nanging sarem saged ugi dipuntambah nalika sampun cumawis ing méja dhahar.
  • Naengguk, sup adhem.[2] Bahan naengguk padatanipun wonten timun, rumput laut, lan ganggang coklat, lajeng dipuntambah kaliyan cuka.[2] Naengguk kathahipun dipundhahar nalika mangsa panas.[2]

Bahan-bahan[besut | besut sumber]

Bahan-bahan isi guk punika kathah antawisipun janganan, daging, ulam, kerang, rumput laut ingkang padatanipun cumawis dhedhasar mangsa.

Mangsa Jinis guk
Mangsa semi Tojangguk kaliyan herba alasan kados ssuk (mugwort), lan naengi (horseradish).
Mangsa panas Oi naengguk (naengguk timun), miyeok naengguk (naengguk rumput laut), kkaetguk (sup wijen), yeonggye baeksuk (sup ginseng kaliyan pitik enem), chueotang (sup ulam loach), samgyetang (sup pitik ginseng).
Mangsa palastra Torantang (sup uwi talas), songitang (sup matsutake), baechutguk (sup kol Cina).
Mangsa adhem Gomguk (sup balung), seonjitguk (sup getih sapi), tteokguk (sup kue beras), lan mandutguk (sup mandu)

Bèntenipun guk kaliyan tang[besut | besut sumber]

Tang punika istilah ingkang langkung formal lan kurmat ing kuliner Koréa tinimbang guk.[3] Nanging dhaharan kalih punika saged dipunbédakaken. Tang langkung dados masakan mirunggan déné guk punika sup ingkang dipundhahar wonten ing kagiyatan dhahar umum ingkang dipunsajèkaken kaliyan manéka jinis lawuh sanèsipun.[3]

Ugi pirsani[besut | besut sumber]

Cathetan suku[besut | besut sumber]

  1. Korean Food: Soups, lifeinkorea.
  2. a b c d e f g h i j k l m n o Paik Jae-eun (2008). "Soup (Guk) An Essential Part of the Korean Meal" (PDF). Koreana. 22 (2): 76–79. Diarsip saka sing asli (PDF) ing 2015-01-09. {{cite journal}}: Unknown parameter |month= ignored (pitulung)
  3. a b Enjoy Healthy Torantang during the Chuseok Holiday, Koreana.


Cithakan:Masakan-stub