One Direction

Saka Wikipédia Jawa, bauwarna bébas abasa Jawa
One Direction

One Direction iku grup penyanyi lanang saka Inggris-Irlandia sing digawe ing taun 2010.[1] Anggotanè Grup iki ya iku Niall Horan, Zayn Malik, Liam Payne, Harry Styles lan Louis Tomlinson.[1] One Direction dikontrak déning Syco Records, lèbel rékamanè Simon Cowell, sawisé dadi juwara nomer telu ing acara The X Factor mangsa kaping 7 taun 2010.[1] Sawisé sukses ing Inggris, One Direction banjur dikontrak déning lèbel rekaman saka Amérika Utara, Columbia Records ing taun 2011.[1]

Ing wulan November 2011, One Direction mbabar albumé sing sepisan, judhulé Up All Night.[2] Album mau dadi sing paling rikat payu ing Inggris taun 2011.[2] Isih ing taun sing padha, ing Amérika Sarékat, album iku suksès kalebu ing posisi dhuwur dewe ing Billboard 200.[2] Album Up All Night mlebu ing posisi sepuluh gedhé ing UK Singles Chart mawa lagu What Makes You Beautiful.[2] Mawa lagu iku, One Direction menang Best British Single (lagu Britania paling apik) ing acara BRIT Award taun 2012.[2] One Direction uga suksès ngadol lagu mau mawa gunggung unduhan nganti 2.060.303.[2] Album sing kapindho judhulé Take Me Home diluncuraké tanggal 12 November 2012.[2] One Direction nggawé konsèr tur donya ing taun 2013.[2] Tur iki diwiwiti saka kutha-kutha ing Inggris lan Irlandia banjur diterusaké ing nagara-nagara Amérika Utara lan Australasia.[2]

Amarga suksèse iku, One Direction disebut sing njalari tuwuhé manèh sawenèh boyband Éropah sing sadurungé tau kuncara rikala taun 1990-an.[2] One Direction uga diarani mawi gelombang anyar British Invasion sing ana ing Amérika Sarékat, nututi lelakoné The Beatless ing taun 1960-an.[2] Ing Indonésia, sanajan isih rame boyband Koréa Kidul, nanging tekané One Direction ora kalah raméné.[2]

Lakune karièr[besut | besut sumber]

Kabéntuké One Direction (2010-2011)[besut | besut sumber]

One Direction

Tahun 2010, Niall Horan, Zayn Malik, Liam Payne, Harry Styles lan Louis Tomlinson mèlu audisi The X Factor kaping 7 mawi panyanyi solo kategori Boys, nanging dhèwèké kabèh kalah. Sawisé éntuk saran saka salah sijining juri, Nicole Scherzinger, dhèwèké wong lima nggabung dadi siji lan nggawe boy band.[3] Boy band iki banjur bisa lolos kanggo kategori Groups.[3] Boy band sing nembé dadi iki diwènèhi wektu 5 minggu kanggo gladhèn lan ngakrabake sapadha anggota sadurungé lomba diwiwiti.[3] Banjur wong lima iku sarujuk bakal gladhèn ing vila duwéké bapak tiriné Harry ing Manchester.[3]

Sing duwé idé njenengi grup iku One Direction ya iku Harry.[3] Miturut dhèwèké, bakal kétok apik banget rikala panatacara The X Factor, Petrus Dickson nyebutaké jeneng-jenengé pas giyaran langsung ing TV.[3] Banjur, ana ing babak kualifikasi lan manggung ing pisanan mawa grup ing ruang penjurian, dhèweke kabèh nyanyèkaké lagu Torn mawa akustik.[3]

Sadhawané lomba, One Direction nggawakaké lagu-lagu saka artis kaloka, kaya Pink, Coldply, The Beatles, Elton John, Kelly Clarkson, Snow Patrol, Kim Wilde, Rihanna lan liya-liyané.[3] Sawisé peserta liya kalah lan kudu balik akhiré ninggal One Direction dadi peserta siji-sijiné sing dipilih déning Simon Cowell. Grup iki rikat kaloka ing Inggris.[3] Ana ing pungkasane lomba, One Direction éntuk juwara katelu, ing buriné Rebecca Regguson lan Matt Cardle.[3] One Direction lan sangang peserta The X Factor liyané mèlu ing X Factor Live Tour sing diwiwiti sasi Fèbruari nganti April 2011.[3] Sadhawané tur, One Direction wis manggung ning ngarepane 500.000 wong ing Inggris.[3]

Album Up All Night(2011–2012)[besut | besut sumber]

One Direction

Ana ing sasi Januari 2011, One Direction nandhatangani kontrak rekaman karo lebel duwéke Simon Cowel, Syco Recorfs.[4] Banjur, sasi November 2011, One Direction uga nandhatangani kontrak rekaman karo Columbia Record ing Amérika Utara.[4] One Direction ngrekam album sing pisanane, Up All Night ing Swedia, Amérika Sarékat lan Inggris.[4] Ana ing jero album iku, dhèwèké kabèh direwangi artis-artis kaloka kaya Savan Kotecha, Rami Yacoub, RedOne, Ed Sheern, Kelly Clarkson, Tom Fletcher, Steve Mac, Toby Gad lan Carl Falk. Lagu andalane sing pisanan ya iku What Makes You Beautiful, dientokake tanggal 11 September 2011. Lagu iki bisa manggoni panggonan paling dhuwur ing UK Singles Chart sawisé dibiwara mawa lagu sing paling kerep diputer sadhawane mangsa déné Sony Music Entertainment.[4]

Ana ing tangga lagu Irlandia, What Makes You Beautiful manggoni posisi paling dhuwur suwéné patang minggu urut.[4] Ing Amérika Sarékat, lagu iki dientokake ing sasi Fèbruari 2012, lan bisa dadi urutan nomer 28 ing Billboar Hot 100.[4] Posisi iku ya iku posisi sing paling dhuwur kanggo artis saka Inggris awet taun 1997.[4] Lagu iki munggah terus nganti posisi nomer papat lan tanggal 21 Mèi 2012, 2.060.303 akèhé unduhan digital lagu iki bisa didol ing Amérika Sarékat.[4] Lagune sing nomer loro, Gotta Be You, dientokake ing tanggal 13 November 2011 lan manggoni urutan nomer telu ing tangga lagu Irlandia lan Inggris.[4]

Ing Amérika Sarékat, One Direction tampil ing TV pas acara The To day Show ing Rockefeller Center ing tanggal 12 Maret 2012.[1] Sadurunge, sasi Januari 2012, Melissa Lonner (Produser acara The Today Show) ngundang One Direction kanggo tampil ing studio kaya racaké.[1] Nanging kabar iki bocor, banjur ndadèkaké layang listrik NBC dikebaki déné ewonan layang saka penggemar sing pengen nonton ing studio.[1] Kahanan kaya ngene meksa NBC supaya mindhah panggonan suting ing Rockefeller Plaza lan pengamanane rapet banget nganti direwangi Pulisi New York.[1] Pas One Direction nekani Manhattan tanggal 12 Maret 2012, ana kira-kira 15.000 penggemar ngumpul ing alun-alun kutha, lan mbleber tekan dhalan-dhalan kiwa-tengené.[1] Kaya sing dilaporake déné The Today Show, grombolan penggemar kaya ngono sadurunge mung kadadéan kro Justin Bieber, Lady Gaga lan Chris Brown.[1] The Today Show nggambarake kadadéan kaya ngene mawa kadadéan sing ora umum.[1] Justin Bieber lan Chris Brown pancèn nduwé lakgu-lagu sing wis kaloka ing Amérika Sarékat, nanging yèn One Direction ora dikenal lan pas iku durung duwé lagu kaloka.[1] One Direction dadi sing mara-marai tangine boy band lan nggawe fenomena Invasi Britania sing anyar ing Amérika Sarékat.[1]

Up All Night manggoni urutan nomer loro ing UK Singles Chart, lan bisa kadol 138.631 kopi ing Inggris lan dadi album nomer loro sing bisa kadol paling rikat ing taun 2011.[4] Ing Amérika Utara, Up All Night dientokake sasi Maret 2012 lan manggoni urutan pol dhuwur ing Billboard 20 lan Canadian Albums Chart.[4] Prestasi iki ndadèkaké One Direction mawa grup sing sepisan ing sujarah Inggris sing sukses manggonake album pisanane ing urutan nomer siji ing kaloron nagara mau.[4] Album iku uga bisa manggoni urutan nomer siji tangga lagu ing 14 nagara liyané.[4] Sasi Juni 2012, Music week nglaporake Up All Night wis kadol 608.382 ing Inggris, 739.000 ing Amérika Sarékat lan 2,3 juta kopi ing kabèh nagara sadonya.[4]

Tanggal 6 Januari 2012, One Direction nemtokake One Thing mawa lagu nomer loro ing njaba Inggris lan Irllandia.[4] Ing Inggris lagu iki dikenalake mawa lagu nomer loro ing tanggal 13 Fèbruari 2012. Ing kana, One Thing manggoni urutan nomer 10 ing UK singles Chart.[4] On Thing dientokake ing Columbia Records pas tanggal 22 Mèi 2012 lan dadi lagu nomer loro One Direction ing Amérika Sarékat.[4] Kanggo lagu sabanjure, judhule More Than This wis dientokake dadi lagu nomer papat pas tanggal 25 Mèi 2012.[4]

Tanggal 26 September 2011, One Direction ngumumake bakal nglakoni tur ing Inggris, jeneng tur sing dilakoni ya iku Up All Night Tour.[4] Tur iki diwiwiti ing sasi Dhésèmber 2011, dhèwèké nambahke Australia lan Amérika Utara ing daptar Up All Night Tour kanggo sasi April nganti Juli 2012.[4] Sasuwene nglakoni tur, One Direction uga nyanyekake lagu artis-artis liya, kaya Use Somebody (Kings of Leon), Stereo Hearts (Gym Class Heroes), Valerie (The Zutons), Torn (Natalie Imbruglia) dan I Gotta Feeling (The Black Eyed Peas).[4] Berita ngenani konsere dhèwèké uga disiarake karo media internasiional, kaya Herald Sun, Rolling Stone, The National Post, Jam! Canoe, The Toronto Star, lan The New York Times.[4] Asil rekaman saka tur sing diwènèhi judhul Up All Night:The Live Tour dientokake sasi Mèi 2012 awujud DVD. Ing Amérika Sarékat DVD iki menggoni urutan nomer siji ing jero Billboard DVD chart, bisa didol punjul 76.000 DVD, ngalahake DVD tur duwéke John Mayer sing bisa disol 65.000.[4]

April 2012, One Direction dituntut amarga diarani nglanggar hak merek dagang déning band indie saka California sing jenenge padha.[4] Manut tuntutan iku, band sing nuntu mau ngaggo jeneng band One Direction awet 2009 lan wis nduwé rong album.[4] Band mau ngaku duwé hak nganngo jeneng mau amarga wis didaftarake ing Kantor Paten lan Merek Dagang Amérika Sarékat sasi Fèbruari 2011. Band iku nuntun supaya One Direction ngewenehi kauntungan saka asil didole album lan tur dhèwèké sarta ngganti rugi sakyuta dolar.[4] Nanggepi tuntutan iku, wakil saka One Direction ngomong “Manajeen One Direction wis usaha ngrampungaké masalah iki mawa damai.[4] Nanging awake dhéwé ora duwé pilihan liya kajaba nuntut balik supaya boyband tetep bisa nganggo jeneng iku.[4] Sasi Juni 2012, Nick Gatfielf, CEO Sony Music Entertainment Inggris mbukak kasuksesane global One Direction.[4] Miturut dhèwèké, One Direction wis bisa ngumpulake kaya ngnti $ 50.000.000 lan angka iki bakal terus nambah ing taun-taun sabanjure.[4]

Tanggal 12 Agustus 2012, One Direction nggawakake What Makes You Beautiful ing upacara panutupan Olimpiade Musim Panas 2012 ing London.[4] Banjur, tanggal 16 September 2012, One Direction nggawakake One Thing ing MTV Video Music Awards 2012.[4] Dhèwèké uga pikantuk penghargaan Best New Artist, Best Pop Video lan Most Share-Worthy Video kanggo What Makes You Beautiful.[4]

Take Me Home lan tur donya (2012)[besut | besut sumber]

One Direction

Ana ing sasi Mèi 2012, One Direction wiwit ngrekam album kapindho sing diwènèhi judhul Take Me Home ing Swedia.[5] Kabèh anggota One Direction ngomong, dhèwèké kabèh pengen mèlu nulis lagu ing prosès nggawe album kapindhone iki.[5] Ana ing salah sawijining wawan rembug, Harry ngomong: awake dhéwé mesthi nulis lagi rikala isih ing dhalan, ing hotèl lan ing papan anggegana.[5] Awake dhéwé ora gelem lagu-lagu sing bakal dinyanyekake kaya lagu sing ditulis wong umur 40-an. Louise nambahi: awake dhéwé ngaturake album kapindho iki marang rong zona sing béda.[5] Bakal luwih akèh swara gitar lan grungier.[5] Awake dhéwé seneng ngrukokake suara gitar rikala isih tur.[5] Lan saiki awake dhéwé pengen nguripake manèh mawa cara nggawa ikng album kapindho iki.[5] Album iki manut jadwal bakal metu November 2012.[5]

Tur donya One Diretion dijadwalake bakal diwiwiti ing sasi Fèbruari 2013.[5] Miturut rencanane tur iki bakal dianakake ing 101 kutha sing nyebar ing Inggris, Irlandia, Amérika Utara lan Australia.[5] Tikete wis didol awet Mèi 2012. Ing Inggris lan Irlandia, tikete bisa didol punjul 300.000 iji mung sadina.[5] Déné ing Australia lan Selandia Baru, saka ngedol tiket iku bisa éntuk dhuwit US $ 15,7 yuta, lan total tiket sing wis didol cacahé 190.000 iji kanggo 18 konser sing bakal dianakake ing kutha-kutha nagara mau.[5]

Gaya Lagu[besut | besut sumber]

Genre album sepisan One Direction akèh-akèhé kelebu lagu-lagu pop, sing orientasine dance-ppop, teen pop, pop rock lan power pop sarta sithik-sithik ana unsur elektropop lan rock. Sakabehan saka album iki pikantuk komentar apik saka para kritikus.[5] Up All Night disolu amarga sasarane bocah-bocah rumaja. Robert Copsey saka Digital Spy ngomong manawa Up All Night akèh-akèhé lagu pop rock ewodene The New york Times nganggep album iki genrene rock karo infleksi pop.[5] Jason Lipshutz saka Billboard duwé pamanggih manawa album iki ndemonstrasikake swara asli sing dibutuhake kanggo tangine manèh jaman boy band, uga dibandingake karo harmoni pop dhèwèké karo grup-grup kaya ‘Nsync, Bacstreet Boys lan 98 Degrees. Lagu One Thing lan What Makes You Beautiful diarani duwé genre power pop lan pop rock.[5]

Yèn didelok saka vokal, Erica Futterman saka Rolling Stone nyolu rikala One Direction tampil akustik.[5] Cameron Adams saka Herald Sun duwé pamanggih manawa One Direction duwé swara pop sing kuwat.[5] Sawalike, Chris Richard saka The Washington Post ngomong angèl yèn arep mbayangake dhèwèké wong lima yèn dadi peneruse Justin Timberlake, Ricky Martin utawa Bobby Brown.[5] Ora ana swara sing nonjol.[5] Jane Stevenson saka Canoe nyerat, “aku ora yakin tenanan manawa dhèwèké bisa nyanyi ing jero konser”.[5] Mikes Wass saka situs Idolator nganggep manawa dhasar kasuksesan iku mbuktekake manawa One Direction bisa mundhakake kwalitas swarane.[5] Horan ngomentari One Direction mawa boy band: “Wong-wong mikir manawa boy band ya iku wong-wong lanang sing njoget lan nganggo klambi padha.[5]

Anggota[besut | besut sumber]

Niall Horan[besut | besut sumber]

Niall Horan

Niall James Horan, lair 13 September 1993 asalé saka Mullingar, County Westmeath, Irlandia.[6] Asma ibune Maura Gallagher lan bapake Bobby Hoan.[6] Dhèwèké duwé Mas, jenenge Greg.[6] Wong tuwané pegatan rikala dhèwèké isih limang taun.[6] Ibune krama manèh kaliyan wong lanang sing asmane Chris lan pindah menyang Edgeworthston, County Longford. Pas jamane audisi The X Factor, Niall tau ngomong kaya ngene: “Umurku 16 taun lan aku pengen duwé jeneng gedhé kaya Beyonce lan Justin Bieber.[6] Aku pengen sukses, nggawe album lan kerja bareng artis-artis kaloka ing donya”.[6] Niall iku seneng banget karo Frank Sinatra, Dean Martin lan Michael Buble, The Eagles, Bon Jovi, Ed Sheeran,5 Seconds Of Summer lan The Script.[6]

Louis Tomlinson[besut | besut sumber]

Louis Tomlinson

Louis William Tomlinson, jeneng asline Louis Troy Austin, lair 24 Dhésèmber 1991 asalé saka Doncaster, South Yorkshire, Inggris.[7] Asma ibu lan bapake Johannah Poulston lan Troy Austin.[7] Wong tuwne pegatan rikala dhèwèké isih cilik., banjur ibune krama manèh kaliyan Mark Tomlinson, sing ngewenehi dhèwèké jeneng mburi Tomlinson.[7] Louis duwé adhi wédok lima, ya iku Georgia Austin, Charlotte, Felicite, sarta sing kembar Daisy lan Phoebe Tomlinson.[7] Wiwit cilik Louis wis tau main ing acara televisi lan tau dadi figuran ing filem drama ITV1 sing judhulé If I Had You lan serial Waterloo Road ing BBC.[7] Dhèwèké seneng banget kaliyan Robbie Williams.[7] Saiki, Lois lagi pacaran karo mahasiswi Manchester Universiy, jenenge Eleanor Calder.[7]

Zayn Malik[besut | besut sumber]

Zayn Malik

Zain Javadd “Zayn” Malik, lair 12 Januari 1993 ing Rumah Sakit ST luke, Bradford, Inggris.[8] Asma bapake Yasser sing duwé keturunan Inggris-Pakistan déné ibune, Tricia Malik asli wong Inggris.[8] Dhèwèké duwé telung sedhulur wédok, ya iku Doniya, Waliyha lan Safaa.[8] Zayn digedheke ing East Bowling, ing pérangan kulon kutha Bradford. Rikala audisi The X Factor ngomong dhèwèké pengen mèlu acara The X Factor kanggo nggolèk pengalaman.[8] Miturut dhèwèké musik urban iku perangan sing nemtokake karier musike sing duwé genre R&B lan Rap.[8] Zayn tau pacaran karo kacane ppadha-padha peserta X Factor, Rebecca Ferguson nanging mung patang sasi tok. Saiki, Zayn pacaran karo salah sijining anggota Little Mix jenenge Perrie Edwards.[8] Zayn tau nggawe status tweeter: “La ila ha ill llalla ho muhammed door rasoolalah”.[8]

Liam Payne[besut | besut sumber]

Liam Payne Glasgow

Liam James Payne, lair 29 agustus 1993, asalé saka Wolverhampton, West Midlans, Inggris.[9] Asma bapak lan ibune Karen lan Geoff.[9] Dhèwèké duwé mbakyu loro, ya iku Karen lan Nicola.[9] Liam iku mahasiswa ing City of Wolverhampton College jurusan tèknologi musik.[9] Liam tau mèlu audisi X Faktor musim kaping 5 rikala umuré isih 14 taun.[9] Pas iku, Simon Cowell ngomong yèn Liam durung siyap mèlu lomba, banjur ngongkon mbalik rong taun manèh.[9] Liam iku seneng karo lagu-lagune Justin Timberlake.[9] Miturut dhèwèké, Timberlake duwé prabawa gedhé marang karier musike dhèwèké.[9] Saiki, Liam duwé gayutan karo Danielle Peazer ya iku penarine Jessie J lan tau diancem arep dipateni karo penggemare Liam.[9]

Harry Styles[besut | besut sumber]

Harry Styles

Harry Edward Styles, lair 1 Fèbruari 1994, asalé saka Holmes Chapel, Cheshire, Inggris.[10] Asma bapak lan ibune Des Style lan Anne Cox. Dhèwèké duwé mbakyu jenenge Gemma.[10] Rikala dhèwèké umur pitung taun, bapak lan ibune pegatan, banjur ibune krama manèh karo wong lanang sing asmane Robin Twist.[10] Harry tau dadi penyanyi ing salah sijining band independen sing jenenge White Eskimo.[10] Band iki tau menang lomba band lokal ing Cheshirre.[10] Sadurunge Harry mèlu audisi The X Factor, dhèwèké tau kerja ing toko roti.[10] Harry seneng banget kaliyan Elvis Presley.[10] Dhèwèké ngomong yèn Elvis Presley dadi penyebabe ngapa dhèwèké seneng karo musik.[10] Harry uga seneng karo karo artis-artis liya kaya Foster the People, Coldplay lan Kings of Leon.[10] Kajaba iku The Beatles uga ana prabawané ing karier musike.[10] Saiki dhèwèké lagi nglakoni gayutan karo presenter TV, jenenge Carpline Flack.[10] Hubungan iki nggawe kontroversi amarga umuré kaloron béda adoh, ya iku 15 taun.[10]

Cathetan suku[besut | besut sumber]

  1. ^ a b c d e f g h i j k l m One Direction (dipunundhuh tanggal 24 September 2012)
  2. ^ a b c d e f g h i j k l Biodata One Direction (dipunundhuh tanggal 24 September 2012)
  3. ^ a b c d e f g h i j k l Gadis.go.id (dipunundhuh tanggal 24 September 2012)
  4. ^ a b c d e f g h i j k l m n o p q r s t u v w x y z aa ab ac ad ae af ag Boy Band Jebolah X Factor (dipunundhuh tanggal 24 September 2012)
  5. ^ a b c d e f g h i j k l m n o p q r s t u v Boyce Avenue Akan Eksis di Album ke-2 One Direction (dipunundhuh tanggal 24 September 2012)
  6. ^ a b c d e f g Niall Horan (dipunundhuh tanggal 24 September 2012)
  7. ^ a b c d e f g Louis Tomlinson (dipunundhuh tanggal 24 September 2012)
  8. ^ a b c d e f g Zayn Malik-Profil Selebritis (dipunundhuh tanggal 24 September 2012)
  9. ^ a b c d e f g h i Liam Payne (dipunundhuh tanggal 24 September 2012)
  10. ^ a b c d e f g h i j k l Biodata Harry Edward Styles (dipunundhuh tanggal 24 September 2012)