Musiyum Anak Kolong Tangga

Saka Wikipédia Jawa, bauwarna mardika basa Jawa
Loncat ke navigasi Loncat ke pencarian
Musiyum Anak Kolong Tangga

Musiyum Anak Kolong Tangga punika musiyum ingkang wonten ing Gedung Taman Budaya Yogyakarta lantai 2, Jln. Sri Wedari no.1, Yogyakarta. Musiyum Anak Kolong Tangga taksih satunggal komplèks kaliyan Taman Pintar Yogyakarta lan Shopping center [1]. Musiyum punika namung nyelip ing tengahing gedhong pas ing sangandhaping kolong tangga tumuju Gedung Pertunjukan. Awit saking punika, pihak ingkang ngemunah maringi nama musiyum punika dados Musiyum Anak Kolong Tangga [2].

Sajarah[besut | besut sumber]

Musiyum Anak Kolong Tangga dipunyasa déning Rudi Corens ingkang sampun dumunung ing Yogyakarta wiwit saking taun 1991 [1]. Rudi Corens punika seniman keturunan Bèlgi ingkang damel musiyum punika amargi raos prihatos awit masarakat Indonésia kathah ingkang kesupen kaliyan budayanipun piyambak, mliginipun dhateng dolanan tradhisional asli Indonésia. Awit saking punika Rudi Corens nyumbangaken sadaya kolèksi pribadinipun kanthi cacah 900 item, lajeng tembayatan kaliyan Dyan Anggarini, Kepala Taman Budaya Yogyakarta, ing tanggal 2 Fèbruari 2008 musiyum punika dipunresmekaken. Musiyum Anak Kolong Tangga punika ugi gadhah ancas dados médhia pasinaon kanggé para laré supados langkung mangertos babagan budaya Indonésia piyambak [1][2].

Tokoh-tokoh ingkang gadhah peran dhumateng Musiyum Anak Kolong Tangga inggih punika Dyan Anggraini minangka Kepala Taman Budaya Yogyakarta, Anggi Minarni minangka Kepala Karta Pustaka Yogyakarta, lan Poppy Dharsono minangka perancang budaya senior lan pengusaha ingkang preduli kaliyan pendidikan laré. Sesarengan kaliyan Rudi Corens ndamel yayasan ingkang dipunparingi nama Yayasan Dunia Damai kanthi sesanti Yayasan Untuk Semua Anak. Wonten ing yayasan mau Poppy Dharsono dados présidhèn, déné Rudi Corens dados kurator saha direktur musiyum [2].

Kolèksi[besut | besut sumber]

Kolèksi ingkang wonten ing Musiyum Kolong Anak Tangga punika dolanan anak saking éra Majapahit saéngga dados punjer konservasi. Manéka dolanan anak saking tlatah-tlatah ing nuswantara ugi saking ngamanca wonten ing mriki [3]. Atusan dolanan dipunpajang ing étalasae kanthi jinis dolanan tradhisional. Paling kathah ingkang dipunpajang punika dolanan damelan asta piyambak. Wonten dolanan ingkang sesambetan kaliyan carita rakyat lan kabudayan lokal kados legenda, dongèng, lan mitos[2].

Koleksi musiyum punika ing antawisipun: bonéka kayu lan plastik, miniatur mobil, vespa, lan trek kayu, manéka cèlèngan saking gerabah, sepédha kayu, jaran-jaranan, teater kertas, puluhan miniatur omah-omahan, gasing saking nagara-nagara sanès, topeng, jaran képang saking anyaman pring, lan taksih kathah malih. Kajawi dolanan ing Musiyum Anak Kolong Tangga ugi wonten poster, buku carita, komik, lan foto pérangan donyaning anak terbitan dangu saking 5 bawana (Asia, Éropah, Amérika, Afrika, lan Australia)[2].

Cathetan suku[besut | besut sumber]

  1. a b c [1], (id) Museum Anak Kolong Tangga berbagai permainan anak tradhisional pengingat budaya bangsa (dipun-akses tanggal 29 Dhésèmber 2012).
  2. a b c d e [2], (id) Museum Anak Kolong Tangga (dipun-akses tanggal 29 Dhésèmber 2012).
  3. [3], (id) Museum Mainan Anak Kolong Tangga Yogyakarta(dipun-akses tanggal 29 Dhésèmber 2012).