Abraham Lincoln

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Abraham Lincoln
Abraham Lincoln

Mangsa jabatan
4 Maret 1861 – 15 April 1865
Pejabat sadurungé James Buchanan
Pengganti Andrew Johnson

Lair 12 Februari 1809
Hardin County, Kentucky (sapunika ing LaRue County)
Tilar donya 15 April 1865
Washington, D.C.
Kabangsan Amérika
Partai pulitik Whig, Republik
Pasangan Mary Todd Lincoln
Agama Kristen (umum)
Tapak asma Abraham Lincoln's signature

Abraham Lincoln inggih menika Présidhèn Amérika ingkang kaping enem welas (16), kanthi mangsa jabatan 1861 - 1865.[1]

Panjenenganipun dados présidhèn nalika Amérika ngadhepi perang sadhèrèk.

Présidhèn Lincoln misuwur minangka/dados pancetus Proklamasi Pambébasan ingkang nedahaken bilih sedaya budak belian ing Amérika kidul utawi lér, kedah bebas wiwit 1 Januari 1863. Abraham Lincoln ugi dipunkenal kanthi sebatan Abe Lincoln lan ngginakaken asma julukan (nicknamed) Honest Abe, Rail Splitter, lan Great Emancipator. Panjenenganipun ugi kagungan julukan 'Abe kang Jujur', awit saking integritas lan panyaruwé (argumén) -ipun ingkang tajem.[1]

Sadèrèngipun mangrèh dados Présidhèn, piyambakipun ugi dados Wakil Présidhèn sepisanan saking Partai Républik.

Présidhèn Lincoln dados salah satunggalipun présidhèn Amérika ingkang séda ing mangsa jawatanipun amargi dipunprejaya.

Mangsa alit[sunting | sunting sumber]

Abraham Lincoln miyos (lair) ing satunggaling gubuk alit ing Kentucky tanggal 12 Februari 1809. Tiyang sepuhipun menika sarwa kacingkrangan lan mboten kagungan pendidikan. Lincoln piyambak namung ngraosaken pendidikan dangunipun kinten-kinten satunggal taun, nanging ing wekdal ingkang cekak punika piyambakipun saged maos, nyerat lan ngétang. Nalika piyambakipun nuju diwasa, piyambakipun ngupados kanggé nambah kawruhipun. Piyambakipun ngginakaken sedaya buku ingkang saged dipunwaos saksaé-saénipun, lan ing wusananipun panjenenganipun kasil dados setunggaling ahli hukum ing yuswa 28 taun.

Sadèrèngipun mangreh présidhèn[sunting | sunting sumber]

Nalika taksih timur, Abraham Lincoln nyambut damel ing manéka warna bidang. Piyambakipun naté nyambut damel dados pamilah kayu pager, dados tentara, dados kelasi ing kapal-kapal bengawan, juru serat, ngurus kedai, kepala kantor pos, lan pungkasanipun dados pengacara.

Piyambakipun sregep mbéla hak-hak para budak Afrika. Ing mangsa jabatanipun, kathah budak ing Kidul lan piyambakipun péngin para budak punika dipunbébasaken. Kathah tiyang mboten sarujuk kaliyan rencananipun, lajeng mbentuk Persatuan Kidul lan setunggaling pasukan kanggé perang nglawan pasukan Lèr Lincoln ing Perang Lèr-Kidul. Pasukanipun mimpang ing paprangan punika.

Piyambakipun sepisanan mlebet lapangan pulitik ing taun 1832 nalika yuswa 23 taun. Panjenenganipun mbudidaya supados kapilih dados anggota Dewan Perwakilan Rakyat Daerah nagara bagéyan Illinois, ing bagéyan kilén-tengah Amérika. Nanging piyambakpiun asor nalika pamilihan, kalih taun salajengipun piyambakipun ngupados malih lan mimpang. Salajengipun panjenenganipun kapilih malih ngantos kaping tiga kanthi urut sasampunipun.

Mangsa kaprésidhènan[sunting | sunting sumber]

Ing taun 1847, nalika yuswa 38 taun, panjenenganipun kapilih dados Dewan Perwakilan Rakyat Amérika.

Abraham Lincoln dados tiyang politik misuwur ing saindhenging nagari, amargi perdhebatanipun kaliyan setunggaling lawan Stephen A. Douglas ing kampanyé pamilihan Sénator Amérika ing taun 1858. Sanajan piyambakipun asor ing pamilihan sénator, partai Republik milih Abraham Lincoln dados calon présidhèn ing pamilihan taun 1860. Ing wekdal semanten Amérika Sarèkat sampun mèh kapecah belah amargi perkawis perbudakan.

Ing tanggal 6 November 1860, Lincoln dipunlantik dados Présidhèn Amérika Sarékat ingkang kaping 16 lan setunggal wulan salajengipun, perang sedulur Amérika antawis nagari-nagari bagéyan Lér lan nagari-nagari bagéyan Kidul dumadi. Sanajan piyambakipun sengit kaliyan perang, Presiden Lincoln nampi namung punika setunggaling cara kanggé nylametaken persatuan nagari.

Ing tengahing perang sadhèrèk, Présidhèn Abraham Lincoln ngedalaken Proklamasi Pambébasan ingkang ngéwahi kagesangan kathah tiyang ing Amérika. Proklamasi punika nelakaken bilih sedaya budhak belian ing nagari-nagari bagéyan utawi daérah-daérah nagari-nagari bagéyan ingkang nglawan Amérika Sarékat badhé bébas wiwit 1 Januari 1863. Proklamasi punika nyetusaken semangat sedaya tiyang ingkang merjuwangaken kabébasan, lan dados panyurung dhumateng pambisakan perbudakan ing Amérika Sarékat.

Présidhèn Abraham Lincoln kapilih malih ing taun 1864, ing tengah-tengah kamenangan-kamenangan militer Amérika Sarékat ingkang pinuju wonten ing pungkasaning Perang Sadhèrèk. Salebetipun nggagas perdamaian Présidhèn Abraham Lincoln kagungan sifat flèksibel lan loma. Piyambakpipun ngajak tiyang-tiyang kidul ingkang mbrontak supados nyèlèhaken gegaman lan wangsul ing pangkon Amérika Sarékat. Semangat ingkang dados pedomannipun cetha sami kaliyan semangat pidato pelantikanipun ingkang kaping kalih. Ukaranipun sapunika kaukir ing salah satunggaling tembok tugu péngetan Lincoln (Lincoln Memorial) ing Washington DC ingkang ungelipun;

   
Abraham Lincoln
Kanthi kateguhan manah lan kaleresan ingkang selaras kaliyan titah Allah, mangga kita ngupados kanggé ngrampungaken tugas kita sapunika, inggih punika nyarasaken tatu-tatuning bangsa.
   
Abraham Lincoln

Présidhèn Lincoln katembak ing teater Ford, Washington, AS, tanggal 14 April 1865 lan séda tanggal 15 April 1865 énjing ing yuswa 56 taun. Ingkang nyédani Présidhèn Lincoln inggih punika John Wilkes Booth, setunggaling pemain sandiwara ingkang ngalami gangguan jiwa, ugi salah setunggaling panyengkuyung Konfederasi ingkang nentang panyerahan tentara Konfederasi menyang pamréntah sasampunipun perang sadulur rampung.

Présidhèn Lincoln dipunsarèaken ing Springfield, AS lan dipunkenang déning Amérika lan donya dados pejuwang démokrasi amargi jasa-jasanipun.

Réferénsi[sunting | sunting sumber]

  • Buku Présidhèn - Présidhèn Amerika Sarèkat, dipunterbitaken déning Dinas Panerangan lan Kabudayan Amérika Sarèkat, Jakarta (2003)

Mangga ugi pirsani[sunting | sunting sumber]

Cathetan suku[sunting | sunting sumber]

  1. ^ a b (id)Tim penulis. (2009). Ensiklopedia Sejarah dan Budaya 4. Jakarta: Lentera Abadi

Pranala jawi[sunting | sunting sumber]

Commons-logo.svg
Wikimedia Commons gadhah galeri bab:

Sumber artikel punika saking kaca situs web: "http://jv.wikipedia.org/w/index.php?title=Abraham_Lincoln&oldid=886689"