Kopi
Saka Wikipédia, Ènsiklopédhi Bébas ing basa Jawa / Saking Wikipédia, Bauwarna Mardika mawi basa Jawi
Kopi iku minuman sing digawé saka biji kopi sing dibakar utawa digorèng. Biyasané wijiné iki saka tandhuran coffea arabica utawa coffea canephora (robusta). Kopi sing asalé saka Jawa uga misuwur banget sajagat.Kopi arupa sumber utama kafein.
Saiki kopi dadi komodhitas angka loro sing paling akèh didagangaké sawisé lenga bumi bumi. Total 6,7 yuta ton kopi diprodhuksi watara taun 1998-2000 baé. Diprakirakaké ing taun 2010, prodhuksi kopi donya bakal tekan 7 yuta ton per taun ( saka FAO ).
[sunting] Sajarah
Sajarah kopi bisa ditlusuri jejaké saka watara abad kaping 9, ing dhataran dhuwur Ethiopia. Saka kana banjur nyebar menyang Mesir lan Yaman, lan banjur ing abad limalas saya mawiyar menyang Persia, Mesir, Turki lan Afrika lor.
Ing awalé kopi ora patiya ditampa déning sebagéyan wong. Ing taun 1511, amarga èfèk rangsangan sing ditimbulaké, dilarang panggunaané déning para imam konservatif lan otodhoks ing majelis kaagamaan ing Makkah. Nanging amarga popularitas minuman iki, mila larangan mau ing taun 1524 diilangaké karana titah Sultan Selim I saka Kasultanan Utsmaniyah Turki. Ing Kairo, Mesir, larangan sing sarupa uga disahaké ing taun 1532, ing ngendi warung kopi lan gudhang kopi ditutup.
Saka donya Muslim, kopi nyebar dhateng Eropah, lan minuman iki dadi populèr sakwéné abad kaping 17. Wong Walanda sing sepisanan ngimpor kopi kanthi skala gedhé dhateng Eropah, lan ing sawijining wektu nylundhupaké wijiné ing taun 1690, amarga tanduran utawa wiji mentahé ora diidinaké metu kawasan Arab. Iki banjur diterusaké kanthi pananduran kopi ing Jawa déning wong Walanda.
Nalika kopi tekan kawasan koloni Amérika, ing awalé ora kasil kaya ing Eropah, amarga dianggep kurang bisa nggantèkaké alkohol. Nanging, sakwéné Perang Révolusi, panyuwunan marang kopi ningkat cukup dhuwur, nganti para panyalur kudu mbukak parsedyan cadhangan lan ngundhakaké regané sacara dramatis; sebagéyan perkara iki amarga didhasari déning mudhuné pasedyan tèh déning para pedagang Inggris. Minat wong Amérika marang kopi tuwuh ing awal abad kaping 19, nyusul dumadiné perang ing taun 1812, ing ngendi aksès impor tèh kapedhot sauntara, lan uga amarga ningkaté tèknologi panggawéan minuman, mila posisi kopi minangka komodhitas saben dina ing Amérika saya kuwat.
[sunting] Jinis wiji kopi
Ana rong spesies saka tanduran kopi; Arabika iku kopi tradhisional, lan dianggep paling énak rasané, Robusta duwé kandhutan kafein sing luwih dhuwur bisa dikembangaké ing lingkungan ing ngendi Arabika ora bakal tueuh, lan marakaké dadi pangganti Arabika sing murah. Robusta biasané ora dinikmati dhéwé, amarga rasané sing pait lan kecut. Robusta kwalitas dhuwur biasané dipigunakaké ing sapérangan campuran espresso.
Kopi Arabika biasané dijenengi déning dermaga asal ekspor, loro sing paling tuwa yaiku Mocha lan Jawa. Padagangan kopi modhèrn luwih spesifik ngenani saka ngendi asalé kopi, nglabèlaké kopi kanthi dhasar negara, wilayah, lan kadhangkala ladhang panggawéné.
Sajinis kopi sing ora biyasa lan larang banget regané yaiku sajinis robusta ing Indonésia sing dijenengi kopi luwak. Kopi iki diklumpukaké saka kotoran luwak, sing prosès pancernané mènèhi rasa sing unik.
[sunting] Pirsanana uga
Artikel punika taksih tulisan rintisan (stub). Sinten kémawon ingkang kersa mbenakaken, sumangga kémawon.
