Euro

Saka Wikipédia Jawa, bauwarna bébas abasa Jawa

Euro iku valuta lan unit monetèr resmi Uni Éropah[1] lan utamané dienggo ing Zona Euro.[2] Zona euro iku tlatah nagara-nagara anggota Uni Éropah sing nganggo valuta iki.[2] Ing taun 2011 ana 17 nagara anggota Zona Euro.[2] Sacara giral, Euro wiwit dienggo tanggal 1 Januari 1999.[1] Nanging sacara fisik dhuwit kertas lan koin utawa dhuwit logam lagi dilansir ing tanggal 1 Januari 2002, wiwit tanggal 28 Februari 2002 manten valuta-valuta nagara anggota ora dadi valuta resmi manèh.[1] Valuta Euro iku dilambangaké mawa simbul €.[1]

Asal mulané Euro iku ana ing Prajanjèn Maastricht (1991), sawijining prajanjèn antara 12 anggota Uni Éropah kala iku, ya iku: Britania Raya, Prancis, Jerman, Italia, Irlandia, Belgia, Denmark, Walanda, Spanyol, Portugal, Yunani lan Luksemburg. Kala iku Uni Ekonomis lan Monetèr (EMU utawa ing basa Inggris Economic Monetary Union) uga diadegaké.

Euro iku valuta cadhangan kapindho sing akèh dhéwé sawisé Dolar Amérika Sarékat, saliyané iku Euro uga valuta sing didagangaké akèh dhéwé kapindho sawisé Dolar Amérika Sarékat.

Jeneng Euro iku sacara resmi kapisan dienggo wiwit tanggal 16 Desember 2005. Kala iku, Euro nggantèni ECU mawa kurs 1:1. ECU iku cekakan saka basa Inggris European Currency Unit lan sadhurungé ana Euro, fungsiné ya iku minangka 'kranjang kabèh valuta anggota Komunitas Éropah'.

Wiwit taun 2009, Euro ngalami krisis utang Éropah, sing nyebabaké lembaga Fasilitas Stabilitas Finansial Éropah diadegaké.

Administrasi[besut | besut sumber]

Euro iku diatur lan diurusi déning Bank Sentral Éropah sing dunungé ana ing Frankfurt, lan Eurosystem sawijining klompok bank-bank sèntral nagara-nagara anggota Zona Euro. Minangka sawijining bank sèntral mardika, Bank Sentral Éropah nduwé otoritas kanggo nemtokaké kawicaksanan monetèr.

Prajanjèn Maastricht taun 1992 ngewajibaké mèh kabèh anggota Uni Éropah kanggo ngadopsi Euro. Nalika iku anggota Uni Éropah ana 12 cacahé: Belgia, Britania Raya, Denmark, Irlandia, Italia, Jerman, Luksemburg, Portugal, Prancis, Spanyol, Yunani lan Walanda. Nanging ana nagara loro sing bisa négosiasi supaya ora nganggo Euro, ya iku Britania Raya lan Denmark. Sing liya-liyané kabèh nganggo Euro. Banjur kabèh nagara-nagara anggota anyar wiwit taun 1993 uga kudu nganggo Euro. Kamangka Swédia sing wis dadi anggota UE wiwit taun 1995, nulak Euro ing sawijining referendum taun 2003 lan mungkiri kawajiban ngadopsi Euro, carané ya iku ora netepi prasaratan monetèr lan anggaran.

Euro[besut | besut sumber]

Dhuwit kertas Euro ing ngendi-endi wanguné padha, nanging dhuwit logamé ing bagéyan mburiné béda-béda. Bagéyan ngarepé padha kabèh lan didésain déning Luc Luycx. Dhuwit logam saben nagara diwènèhi lambangé dhéwé-dhéwé.

Sanajan dhuwit kertas Euro wanguné padha, nanging ana bédané sithik, ya iku ing bagéyan nomer, saéngga bisa dimangertèni asalé saka nagara sik ngendi.

Nagara Nomer diwiwiti karo huruf
Jerman X
Irlandia T
Walanda P
Yunani Y
Prancis U
Luxemburg  ?
Austria N
Finlandia L
Belgia Z
Italia S
Portugal M
Spanyol V

Nagara-nagara kang migunakaké valuta Euro[besut | besut sumber]

Simbol valuta Euro

Limalas nagara anggota Uni Éropah kang migunaaké Euro minangka valutané ya iku:

  1. Jerman
  2. Irlandia
  3. Walanda
  4. Yunani
  5. Prancis
  6. Luxemburg
  7. Austria
  8. Finlandia
  9. Belgia
  10. Italia
  11. Portugal
  12. Spanyol
  13. Slovenia (wiwit 1 Januari 2007)
  14. Siprus (wiwit 1 Januari 2008)
  15. Malta (wiwit 1 Januari 2008)
  16. Slowakia (wiwit 1 Januari 2009)
  17. Estonia (wiwit 1 Januari 2011)
  18. Latvia (wiwit 1 Januari 2014)
  19. Lituania (wiwit 1 Januari 2015)

Saliyané iku, ana sapérangan nagara cilik sing uga migunakaké Euro, miturut prajanjèn karo UE ya iku:

  1. Andorra
  2. Monako
  3. San Marino
  4. Vatikan

Banjur ana sapérangan laladan uga antuk migunakaké Euro minangka valuta, tanpa prajanjèn, ya iku laladan:

  1. Montenegro
  2. Kosovo

Cathetan suku[besut | besut sumber]

Delengen uga[besut | besut sumber]

Pranala njaba[besut | besut sumber]

Wikipedia
Artikel punika, artikel dhasar ingkang kedah dipundarbèni sadaya basa.
Sumber artikel punika saking kaca situs web: "https://jv.wikipedia.org/w/index.php?title=Euro&oldid=1097784"