Jenéwa

Saka Wikipédia Jawa, bauwarna bébas abasa Jawa
Jenéwa
Genève
Coat of Arms of Geneva.svg
Info dhasar:
Nagara: Swiss
Kanton: Jenéwa
Dhistrik: Kutha Jenéwa ora dipérang ing dhistrik
Dhuwur: 375 méter sadhuwuring segara
Jembar: 15.86 km²
Padunung: 185.893 (31 Dhésèmber 2006)
Situs wèb resmi: www.ville-ge.ch
Péta
Karte Gemeinde Genève 2007.png

Jenéwa (Prancis: Genève, Jerman: Genf, Italia: Ginevra, Reto-Roman Genevra) ya iku kutha paling padhet kaloro ing Swiss (sawisé Zürich), dumunung ing pinggir Tlaga Jenéwa kang mili menyang Kali Rhône. Kutha iki minangka kutha krajan saka République et Canton de Genève. Kutha iki uga misuwur minangka Kutha Air Mancur ing Nagara Swiss

Géografis[besut | besut sumber]

Kutha Jenéwa iku ana ing nagara Swiss, luwih tepaté ing Kanton Jenéwa. Kanton Jenéwa diwatesi nagara Prancis ing sisih kulon lan sisih kidul. Ing sisih lor lan lor-wétan, Kanton Jenéwa diwatesi déning Kanton Vaud. Ing tengah-tengahé ana tlaga, jenengé tlaga Leman, sing uga dadi duwèké nagara Prancis.

Dhémografi[besut | besut sumber]

Sanadyan kutha Jenéwa kawentar ing ngendi-endi, sajatiné kutha iki kutha cilik, amarga cacahing wong sing manggon ana ing kutha iki ora punjul wong 180.000. Saka cacahé iku, kurang luwih 30% wongé saka nagara liya sing manggon lan nyambut gawé ana ing Jenéwa. Cacahé wong ana ing Kanton Jenéwa uga sithik, ora punjul wong 430.000.

Kutha Banyu Muncrat (Air Mancur)[besut | besut sumber]

Jenéwa kondhang lan cukup kawentar amarga:

  • Kutha kanggo nyimpen dhuwit. Ana akèh bank-bank umum lan bank pribadi ing kutha iki. Bank Umum iku tegesé bank sing nglayani wong sing nyimpen lan utang dhuwit. Bank pribadi iki tegesé bank sing ngurusi dhuwit pribadi, mliginé kanggo urusan invèstasi. Akèh wong sugih sing duwé lan nyimpen dhuwit ing kutha iki, amarga bank-bank ing kéné duwé daya kanggo nyimpen data pribadi pelanggané.
  • Kutha jam tangan. Jam tangan kaya Swatch, Rado, Pathek Philippe, lan mèrek-mèrek liyané padha duwé kantor pusat ing Jenéwa. Jaman ndhisik, pabrik-pabrik jam tangan iku ana ing Jenéwa, nanging saiki ana akèh sing pindhah saka kutha iki kanggo duwé panggonan sing luwih jembar lan uga kanggo nyuda reragatan-reragatan liyané.
  • Kutha banyu muncrat. Ing pinggir tlaga Leman, ana banyu muncrat, sing ing basa Prancis diarani, "Jet d'Eau". Dhuwuré muncratan banyuné bisa tekan 130 mèter. Banyu puncratan iku dijupuk saka banyu tlaga sing diréwangi ngganggo mesin. Banyu iku muncrat mung ing mangsa panas, utawa pas ana srengéngé. Mangsa bediding, mesin sing dienggo muncrataké banyu ora diuripaké mergané, puncratan banyuné bisa adhem banget.
  • Kutha PBB. Kantor Pakumpulan Bangsa-bangsa uga ana ing kéné, amarga kutha Jenéwa iku kutha PBB kaping pindho sawisé New York. Saliyané PBB, ana uga 18 kantor organisasi-organisasi internasional.

Panorama[besut | besut sumber]

Pasawangan Jénéwa.
Pasawangan Jénéwa.
Pasawangan Jénéwa dideleng saka menara Katedral Santo Petrus.
Pasawangan Jénéwa dideleng saka menara Katedral Santo Petrus.

Basa[besut | besut sumber]

Nagara Swiss duwé patang (4) basa sing dienggo, ya iku basa Jerman (60-70 persèn), basa Prancis (18-20 persèn), basa Italia (8-10 persèn) lan basa Romansh, kurang luwih 1-2 persèn. Kanton-kanton sing nganggo basa Prancis dijenengi kanton Romand (aja klèru karo Romash). Jenéwa iku kutha gedhé dhéwé ing Swiss Romand, lan basa utama sing dienggo ya iku basa Prancis. Nanging akèh wong Jenéwa sing bisa ngomong basa Inggris, mergané akèh wong manca nagara sing ora bisa basa Prancis.

Agama[besut | besut sumber]

Agama Kristen Protèstan aliran Kalvin diwiwiti ing kutha iki. Jenéwa uga diarani kutha krajané Protèstan Kalvinis. Gréja utama ing Jenéwa ya iku Katedral Santo Petrus, ndhisiké gréja Katulik, sing saiki dadi gréja Protèstan. Sanadyan, tradhisi protèstan isih kuwat banget, naging gunggung jiwa sing duwé paugeman Katulik luwih akèh tinimbang Protèstan, amarga ing wiwitan abad 20 akèh désa-désa Katulik Prancis sing cedhak karo Jenéwa, mèlu dilebokaké ing kanton Jenéwa. Uga amarga akèh wong-wong Portugal, Spanyol lan Italia sing pindhah saka nagara-nagarané lan netep ing Jenéwa. Saliyané Katulik lan Protèstan, uga gampang ditemoni wong-wong sing paugemané Islam, Hindhu lan Buda. Akèh uga wong-wong enom sing ora perduli manèh karo agama, lan ora duwé agama.

Organisasi Internasional[besut | besut sumber]

Kutha Jenéwa minangka markas saka sawetara organisasi internasional, antarané:

Transportasi[besut | besut sumber]

Kanggo transportasi saka lan menyang kutha Jenéwa, ana Papan Anggegana Internasional Cointrin Jenéwa lan kutha iki uga mlebu sajeroning jaringan utama sepur Swiss, SBB-CFF-FFS lan Prancis ya iku sepur TGV.

Pariwisata[besut | besut sumber]

Obyèk pariwisata utama Jenéwa iku Jet d'Eau (jet-banyu utawa banyu muncrat) sing dhuwuré 140 mèter ing tlaga Jenéwa lan bisa ditonton saka saindhenging kutha. Panggonan wisata liyané antarané: Flower Clock, Art and History Musiyum (Musiyum Seni lan Sajarah), International Red Cross and Red Crescent Musiyum (Musiyum Palang Merah lan Bulan Sabit Merah Internasional), sarta Palais des Nations sing dadi markas PBB ing Éropah.

Pranala njaba[besut | besut sumber]

Resmi