Senbei

Saka Wikipédia Jawa, bauwarna bébas abasa Jawa
Nori senbei

Senbei (煎餅,せんべい?) ya iku jajanan kang digawé saka glepung beras utawa glepung serealia liyané. Jajanan iki wujudé bisa bunder, pesagi, utawa pesagi dawa kang trepes, lan dimatengake kanthi cara dipanggang nganti wernane malih dadi kuning kaya emas. Senbei luwih kandhel saka krupuk, lan luwih gedhé saka okaki atau arare.

Lumrahé, senbei iku rasane asin amarga diwènèhi uyah, nanging ana uga kang rasane legi. Variasi rasa senbei ya iku senbei rasa miso, rasa kecap asin, lan rasa wijèn. Senbei rasa kecap asin kang diungkus déning nori utawa ing ndhuwure diwènèhi nori diarani nori senbei.

Senbei tradhisional dipanggang nganggo areng. Sawisé mateng, senbei diolesi nganggo campuran kecap asin lan mirin. Ing Kanto, bakul senbei manggang dagangane salembar-salembar ing papan panggonan. Déné bakul senbei ing Kansai ngadol senbei kang wis digawé ing papan liya.

Jinis[besut | besut sumber]

Maneka warna senbei: rasa nori, rasa aonori, rasa wijèn, lan rasa lombok

Senbei kapérang miturut bahan nggawéne.

Senbei minangka sesebutan kanggo manéka warna kuweh garing tradhisional ing Kansai lan rasane legi kaya biskuit. Tuladhané kawara senbei (senbei gendhèng) kang wujudé kaya gendhèng lan wernane coklat tuwa. Bahane ya iku glepung, gula pasir, lan endhog pitik. Roti saka Kyoto kang diarani yatsuhashi uga kalebu jinising iki sanajan digawé saka glepung beras.
  • Senbei saka beras (beika senbei)
  • Senbei urang saka glepung kenthang utawa glepung liyané (ebi senbei).