Cithakan:Gapura:Amerika Latin/Artikel pilihan

Republik Federal Brasil (basa Portugis: República Federativa do Brasil) kuwi negara paling gedhé lan paling akèh pedunungé ing Amérika Kidul. Negara iki minangka negara paling wétan ing Bawana Amérika lan wewatesan karo Pegunungan Andes lan Samudra Atlantik. Jeneng Brasil dijupuk saka jeneng kayu brasil, sajinis kayu lokal. Brasil dadi panggonan tetanèn ekstensif lan alas udan tropis. Minangka tilas koloni Portugal, basa resmi Brasil yakuwi basa Portugis. Brasil nggayuh kamardikan saka Portugis ing tanggal 7 September 1822. Negara kang dumunung ing sisih tengah lan wétan Amérika Kidul iki dadi wilayah jajahan Portugis wiwit 1494. Ana ing taun 1889, sistem pamaréntahan Brasil owah saka monarki dadi republik. Brasil diwatesi déning segara ing sisih wétan yaiku Samudra Atlantik. Negara-negara kang wewatesan dharat karo Brasil yakuwi Uruguay, Argentina, Paraguay, Bolivia, Peru, Kolombia, Venezuela, Guyana, Suriname lan département Guyana Perancis; kabèh negara ing Amérika Kidul séjéné Ekuador lan Chili. Ing bagéan lor Brasil ana Alas Amazon lan tansaya mangidul tansaya kabuka kanthi bukit-bukit lan gunung cilik. Daerah kidul dadi pusat populasi lan agrikultur Brasil. Sawetara pegunungan dumunung ana ing pesisir Samudra Atlantik kang dhuwuré nganti 2.900 meter kanthi pucuk paling dhuwur Pico da Neblina sing dhuwuré 2.994 m. Kali-kali kang ana ing Brasil antara liya Kali Amazon, Paraná, lan Iguaçu kang ana grojogané yakuwi Grojogan Iguaçu. Iklim Brasil kuwi tropis amarga dumunung ing khatulistiwa kanthi sethithik variasi. Ing sisih kidul, iklimé luwih sedhengan, nanging kadhangkala ngalami salju. Curah udan dhuwur banget ing daerah Amazon, lan daerah kang luwih garing bisa ditemokaké ing daerah wétan-lor.

Kutha-kutha wigati ing Brasil antara liya Brasília, São Paulo, Rio de Janeiro lan Curitiba. {Tutugé...)