William Hunt Painter

Saka Wikipédia Jawa, bauwarna mardika basa Jawa
William Hunt Painter
Catatan Painter
Lair(1835-07-16)16 Juli 1835
Aston
Pati12 Oktober 1910(1910-10-12) (umur 75)
Shrewsbury
BangsaInggris
Pawéh pakaryanGréja Inggris
Kondhang ingFlora Derbyshire
BojoJane

William Hunt Painter (lair ing Aston, Inggris, 16 Juli 1835 – pati ing Shrewsbury, Inggris, 12 Oktober 1910 ing umur 75 taun) inggih punika juru botani ingkang kathah sumbanganing marang kawruh tuwuhan vaskular Derbyshire. Piyambakipun punika kurator manéka warni spésimèn tuwuhan lan minangka anggota Botanical Exchange Club.[1] Nalika taun 1889 William Hunt Painter mbabar cathetanipun babagan flora Derbyshire.

Gesang[besut | besut sumber]

William Hunt Painter wiyos wonten ing Aston celak kaliyan Birmingham nalika tanggal 16 Juli 1835. William Hunt Painter punika putra mbajeng saking gangsal sadhèrèk saking William, satunggaling panyadé barang klonthong, lan Sarah, garwanipun, ingkang asal Hawkes. Karir wiwitanipun wonten ing bank sadèrèngipun gabung Gréja Inggris.[2] Taun 1861 piyambakipun manggèn wonten ing Chelsea, ing mriku piyambakipun tinanggenah asistèn pangutbah.[3] Painter mlebet ing Islington Missionary College lan gadhah kekajengan supados dipunkintun dhateng jaban rangkah déning Yeyasan Misi Gréja nanging kapungkasan minangka kurator ing Barbon ing Westmoreland. Ing riku William Hunt Painter kapanggih kaliyan Robert Woo ingkang mulang babagan ngèlmu botani.

Taun 1865, Painter ndhapuk kurator ing High Wycombe. Ing riku piyambakipun pepanggihan James Britten, ingkang sampun mbabar seratan ilmiah pisananipun lan nyambut damel wonten kaliyan hèrbariyum Taman Kew. Sanajan Britten nggilut agami Katulik, kakalihipun kersa mlampah lan rembagan sesarengan dalah ngumbar-umbar karenanipun babagan tetuwuhan.[1] Painter krama kaliyan Jane Stamps nalika 1871.[4] Taun 1881 William Hunt Painter lan garwanipun manggèn wonten ing Bedminster, Somerset mawi pakaryan dados kurator.[5]

Gréja St James ing Stirchley déning James Holmes Smith k. 1850

Painter nggarap kathah pérangan ingkang migunani kanggé tuwuhan saking Derbyshire. Lajeng mbabar karya seratan ilmiah ingkang dawa taun 1881 kanthi cathetan tambahan ing taun 1889. Kalih seratanipun dados dhasar Kontribusi marang Flora Derbyshire,[6] ingkang dipunrembag déning ahli lumut James Eustace Bagnall[7]. Painter mbabar cathetan awit saking pakaryanipun ing The Naturalist minangka pratandha bilih piyambakipun kersa ngembangaken. Bagnall ingkang ingaran ahli babagan lumut godhong ugi mbabar karya ingkang sami kaliyan karyanipun Painter ing Flora of Warwickshire. Ing taun 1891, Painter ndhapuk kurator ing Biddulph, Staffordshire. Lajeng ing taun 1894 piyambakipun kapatah Rèktor Stirchley ing Shropshire. Rèktorat dipunyasa modhèren tumrap lenggahipun William Hunt Painter. Piyambakipun langkung kapènget awit pangupajiwanipun ngupakara gréja lan yasan-yasan.[8]

Nalika mapan wonten ing Falmouth taun 1898, Painter nyinau babagan lumut godhong. Babagan punika dados punjering kawigatosanipun ing babagan botani. Kanthi ngadani lelampah lan lelintu spésimèn, piyambakipun saged nyerat karya ilmiah babagan lumut godhong Derbyshire, Brecon, Falmouth, lan Cardiganshire. Painter dumunung wonten ing Stirchley dumugi taun 1909, nalika spésimèn botani lan géologinipun kaprèjèngaken wonten ing Universitas Aberystwyth sadèrèngipun pènsiyun saking Shrewsbury. Painter tilar donya ing taun salajengipun lan kasarèkaken wonten ing gréjanipun ing Stirchley.

Cathetan suku[besut | besut sumber]

  1. a b "William Hunt Painter". Herbaria@Home.
  2. 1851 census, (Registration district: Birmingham, St Mary’s)
  3. 1861 census, (Registration district: Chelsea NE district, 4)
  4. Members of the Moss Exchange Club, Mark Lawley, Royal Botanical Gardens, Edinburgh
  5. 1881 census, Bedminster, Somerset
  6. William Hunt Painter, A Contribution to the Flora of Derbyshire, being an account of the flowering plants, ferns, and characeae found in the county, London: Bell, 1889
  7. Review, J.E. Bagnall, Journal of Botany, 1899, 318
  8. "A History of the Rectory of St. James'". Diarsip saka sing asli ing 2011-08-28. Dibukak ing 2013-03-21.