Gedhang kepok

Saka Wikipédia Jawa, bauwarna mardika basa Jawa
(Kaelih saka Gêdhang kepok)
Loncat ke navigasi Loncat ke pencarian
Gedhang Kepok
Kepok banana Indonesia.JPG
Klasifikasi ngèlmiah
Dhivisi: Spermatophyta
Klas: Monocotyledoneae
Ordho: Zingiberales
Famili: Musaceae
Génus: Musa
Spésies: Musa paradisiaca. L.
Jeneng binomial
Musa paradisiaca. L.

Gedhang kepok iku salah sawijiné jinis gedhang sing duwé jeneng ilmiah Musa paradisiaca. Gedhang iki asalé saka Asia Tenggara lan wis nyebar ing Indonesia. Gedhang kepok dhapuré rada gèpèng lan rada kothak, kulite uga rada kandel tinimbang gedhang jinis liyané. Werna kulité kuning rada ijo. Padatan gedhang kepok diolah kanthi cara digorèng, digodhog, dibakar, utawa digawé kolak. Jinisé gedhang kepok ana loro, ya iku gedhang kepok kuning lan gedhang kepok putih. Saka dhapuré arep padha, nanging bedané ing daging buahé. Kepok kuning wernané rada kuning, yèn kepok putih wernané rada pucet. Déné rasané, kepok kuning luwih legi tinimbang kepok putih. Mula, padatan kepok putih didadékaké panganan manuk. Kamangka kandhutan gizi kekaroné padha.

Kandhutan Nutrisi[besut | besut sumber]

Kandhutan nutrisi saben 100 gram gedhang kepok ya iku kalori 79 kkal, karbohidrat 21,2 gram, protèin 1,1 gram, lemak 0,2 gram, banyu 75,5 gram, vitamin A 0,022 gram, vitamin C 0,0094 gram, tiamin 0,001 gram, lan riboflavin 0,002 gram.

Kulité kang Mupangati[besut | besut sumber]

Kulit gedhang kepok duwé kandhutan vitamin C, B, kalsium, protèin, lemak, ngandhut banyu 68,90 % lan karbohidrat 18,50 %. Miturut panalitèn mahasiswa Biologi Institut Teknologi Sepuluh November (ITS), kulit gedhang kepok ngandhut baktèri Acetobacter, ya iku baktèri kang duwé mupangat kanggo panguripané manungsa lan kanggo perkembangan Bioteknologi. Baktèri kang ana ing kulit gedhang kepok iku bisa ngasilaké asem asetat non sintetis kang akèh minangka prodhuksi serat lan kain. Nanging, ing indhustri panganan kanggo ngatur tingkat kekecutan (keasaman) panganan. Kulit gedhang kepok iku bisa digawé dadi ombénan cuka gedhang kanthi cara fèrmèntasi. Ombénan iki séhat banget amarga ngandhut akèh nutrisi kaya ta asem amino lan serotonin kanggo nyelarasaké mood lan nyéhataké retina mripat.[1]. Kulit gedhang kepok sing wis garing uga bisa mbeningaké lenga klenthik sing wis dadi jlantah amarga kulit gedhang kepok duwé daya serap sing dhuwur lan bisa ngresiki regedan ing lenga jlantah.

Debogé kanggo Bahan Nggawé Cuka[besut | besut sumber]

Kejaba kulité sing bisa digawé cuka, debog gedhang kepok uga bisa digawé cuka. Debog gedhang kepok sing isih teles ngandhut karbohidrat 11,6 gram lan debog sing wis garing ngandhut karbohidrat 66,2 gram, saéngga bisa didadèkaké bahan baku kanggo nggawé cuka kanthi cara fèrmèntasi. Iki didadèkaké salah siji cara kanggo nggenepi kabutuhan cuka sing saya nambah, kamangka cuka dibutuhaké banget ing indhustri panganan, laboratorium, lan pabrik farmasi. Cuka ya iku kondimen sing digawé saka bahan-bahan legi utawa ngandhut pati kanthi cara fermentasi alkohol lan diterusaké fermentasi asetat. Cuka iku larutan asem asetat ing banyu sing duwé cita rasa, zat warna, lan substansi sing keekstrak, asem buah, ester-ester, lan uyah-uyah organik saka buah. Cuka duwé paédah kanggo ngatur kekecutan ing indhustri panganan.

Khasiat[besut | besut sumber]

Gedhang kepok duwé khasiat kang manéka warna, tuladhané ya iku kanggo nambani lara maag. Salah sawijiné tetamba alternatif kang alami kanggo lara maag ya iku mangan gedhang kepok kanthi rutin. Gedhang kepok uga apik banget kanggo mbeneraké tatu ing organ pencernaan.[2]. Gedhang kepok ngandhut antasida alami sing bisa netralaké gangguan pencernaan. Tuladhané, asem lambung sing kakéhan bisa njalari rasa nyeri ing ulu ati. Yèn parah lan suwé, asem lambung sing kakéhan mau bisa nggawé dinding lambung iritasi. Kanthi mangan gedhang kepok bisa ngudhunaké kadar asem lambung lan bisa nglapisi dinding lambung kanthi kandhutan zat antasida alami. Gedhang kepok uga bisa ngelongi rasa nyeri ing weteng nalika lagi lara mèncrèt (diaré) amarga gedhang kepok duwé fungsi normalaké sistem pencernaan.

Uga delengen[besut | besut sumber]

Gedhang

Cathetan sikil[besut | besut sumber]