Labu siam

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Langsung menyang: pandhu arah, pados
Labu siam
Labu siam didol ing Réunion
Klasifikasi èlmiah
krajan: Plantae
divisio: Magnoliophyta
kelas: Magnoliopsida
ordo: Violales
kulawarga: Cucurbitaceae
Genus: Sechium
Species: S. edule
Jeneng binomial
Sechium edule
(Jacq.) Swartz, 1800

Labu siam utawa jipang (Sechium edule, basa Inggris: chayote) yaiku tanduran saka suku labu-labuan (Cucurbitaceae) kang bisa dipangan woh lan pucuké (pupus) kang isih enom.

Ing Indonesia, labu siam kagolong salah siwijiné janganan (sayuran) kang akèh didol ana ing pasar . Wohé bisa digodhog kanggo ngilangi tlutoh (getah) lan bisa kanggo lalapan karo sambel, uga bisa dicampur jangan bening utawa jangan bobor. Wohé bisa uga dirajang kanggo campuran ngémpikake siomay. Labu siam ing Mexico dadi panganan pokok. Ing tlatah Australia, woh labu siam diiris, diwènèhi glepung panir, banjur digorèng.

Labu siam ing tlatah Indonésia asring kasebut labu siam amarga tanduran iki asalé saka Thailand (Siam, jeneng Thailand jaman biyèn). Ing tlatah Basa Sundha dijenengaké lèjèt lan wong Jawa asring nyebut jipang (Jawa Tengah), manisah (Jawa Wetan), lan waluh siam (Jawa Kulon).[1] Déné ing Inggris diarani chayote, ing Perancis diarani christophene, lan ing China diarani chowchow.


Dhèskripsi[sunting | sunting sumber]

Tanduran labu siam mrambat ana ing lemah (siti) utawa ana ing lanjaran lan padatan dikembangaké ana ing tegalan utawa ana ing kebon, padatan urip ana ing cedhak banyunan kayata ing pinggir kolam utawa ing pinggir kali (pèrèngan).[2] Wohé nggantung (gémbandul ana ing pang). Godhongé awujud kaya segi telu lan ana wuluné utawa ana rambut alusé.[2]

Woh labu siam bentuké bunder ing arah ngisor.[3] Ana alur ing kulit njaba kang rada mèmper kaya pambagéyan ruang ing njero woh.[3] Kulité brenjol ora aturan. Kulit wohé tipis kanthi daging kang kandel.[3] Nalika dioncèki, metu tlutuhé. Mula, nalika arep ngolah labu siam kudu dikum sedhela nganggo banyu.[3]

Kandhutan Gizi[sunting | sunting sumber]

Labu siam nduwèni kandhutan Vitamin C kang dhuwur, sithik kalori, sithik sodium, ora ngandhut kolesterol, lan uga sumber serat sing apik. Kandhutan gizi ing labu siam sing migunani kanggo kasarasan badan, yaiku :

  • Folat, yaiku Vitamin B sing migunani banget kanggo wong wadon sing lagi ngandhut lan kanggo kasarasan kardiovaskuler.
  • Vitamin C, yaiku salah sawijiné antioksidan kuat sing bisa ngayomi sel saka karusakan amarga radikal bébas.
  • Tembaga, kang mbantu yodium njaga kasarasan tiroid.
  • Vitamin K, kang mbantu njaga kasarasan balung lan untu.
  • Kalium, kang migunani kanggo kerja otot lan simpul saraf. Kalium bisa nglancaraké pangiriman oksigèn tumuju utek uga nglancaraké kaseimbangané cairan saéngga badan bisa luwih seger.

Paédah Labu Siam[sunting | sunting sumber]

  • Ngudhunaké tekanan darah. Labu siam nduwèni èfèk diuretik kang bisa ngudhunaké kadar uyah ing jero getih kang kebuwang saka uyuh. Sudané kadar uyah mau nduwèni sipat nyerep utawa nanggon banyu sing bisa ngènthèngaké kerja jantung anggoné mompa getih, saéngga tekanan darah bisa mudhun.[4]
  • Ngudhunaké kolesterol. Kandhutan kalium ing labu siam nduwèni paédah kanggo ngudhunaké tekanan darah lan ngresikaké karbondioksida ing jero getih. Kalium nglancaraké pengiriman oksigen menyang utek lan mbantu nglancaraké kasalarasané cairan, saéngga awak dadi luwih seger. Labu siam uga nduwèni kandhutan Vitamin B3 sing bisa ngudhunaké prodhuksi kolesterol.[4]
  • Nyegah kanker. Labu siam nduwèni kadar serat sing apik, yaiku 1,7 g per 100 gram. Konsumsi serat sing cukup apik banget kanggo ngelongi risiko lara kanker amarga sistem pencernaan sing ora sampurna.[4]
  • Ngobati asam urat. Èfèk diuretik saka labu siam nglancaraké proses mbuwak uyuh, saéngga kaluwihan asam urat bisa ditokaké saka badan.[4]
  • Panganan apik kanggo ibu sing lagi ngandhut. Asam folat penting banget kanggo ibu sing lagi ngandhut amarga bisa ngelongi risiko bayi lair cacat. [5]
  • Apik kanggo wong kang kena penyakit Diabetes mellitus, ing labu siam ana kandhutan karbohidrat kang cukup dhuwur, saéngga wong kang kena diabetes ora prelu mangan panganan pokok kang akèh. Mangan labu siam kukus kanthi rutin bisa maregi lan nggantèkaké panganan pokok.[4]
  • Nambani gusi kang getihen, nambani sariawan, lan bisa uga nambani tungkak kang ireng.[4]

Budidaya Labu Siam[sunting | sunting sumber]

Labu siam kagolong taneman sing gampang ditandur, saguh adaptasi karo kurangé banyu nalika mangsa ketiga lan kaluwihan banyu nalika mangsa rendheng. Labu siam bisa urip apik ing lemah garing, drainase lan aerasené apik, gembur, lan akèh kandhutan bahan organik. [3]

Winih labu siam dikasilaké saka wiji woh sing wis tuwa tenan. Wiji kuwi banjur didèlèhake ing panggonan sing anyep lan ditunggu nganti thukul trubusé. Sawisé thukul trubus, banjur ditandur ing lemah lan dirumati, diwènèhi rabuk, lan digawékaké lanjaran kanggo mrambat. Labu siam bisa dipanèn yèn umuré udakara wis 4 sasi.[3]

Cathetan sikil[sunting | sunting sumber]



Sumber artikel punika saking kaca situs web: "http://jv.wikipedia.org/w/index.php?title=Labu_siam&oldid=829366"