Dewan Perwalian PBB

Déwan Perwalian PBB kuwi sawijining sistem perwalian internasional sing wis diadegaké déning anggota PBB kanggo ngatur pamaréntahan dhaérah-dhaéerah sing didèlèh ing sangisoré pangawasan PBB ngliwati pasetujon-pasetujon perwalian individual. (dhaérah-dhaérah sing mangkono banjur diarani “dhaérah-dhaérah perwalian”).

Ancas

1. miara perdamaian lan kaamanan internasional
2. ngusahakaké kamajuan pedunung dhaérah perwalian supaya bisa gawé pamaréntahan dhéwé utawa kamardikan
3. mènèhi surungan supaya ngakoni lan ngurmati hak-hak manungsa saka rakyat-rakyat ing donya
4. mesthèkaké perlakuan sing padha ing dhaérah perwalian djroning bab sosial, ekonomi, lan komersial kanggo kabèh anggota PBB lan kabangsan-kabangsané, sarta perlakuan sing padha kanggo kabangsan kabèh anggota jroning ngatur kaadilan ing dhaérah-dhaérah sing di jupuk saka negara-negara mungsuh akibat perang donya kaloro lan liya-liyané sing sacara sukarela didèlè ing sangisoré sistem perwalian. Ora ana siji waé negara sing dadi anggota PBB bisa diatur pamaréntahané ing sangisoré sistem perwalian.

Tugas lan hak Déwan Perwalian

Déwan Perwalian duwé tugas kanggo nglakokaké kewajiban Majelis Umum ing bab-bab sing magepokan karo dhaérah-dhaérah perwalian, kajaba dhaérah-dhaérah strategis sing diurus déning Dewan Keamanan. Adhedhasar panyerahan kuwasa iku Déwan Perwalian diwènèhi hak kanggo :

1. Nimbang laporan-laporan sing dikirim déning negara-negara panguwasa
2. Nampa layang-layang panyuwunan banjur nyelidhiki sacara bebarengan karo negara-negara panguwasa
3. Ngayahi kunjungan kala-kala menyang dhaérah perwalian sing disetujoni déning Negara panguwasa
4. Nglakokaké pegawéyan-pegawéyan kanthi syarat-syarat pasetujon perwalian

Kaanggotaan

Déwan Perwalian dumadi saka 3 golongan anggota ,yaiku :

1. Anggota-anggota sing nguasani dhaérah perwalian
2. Anggota-anggota tetep dewan keamanan sing ora nguasani dhaérah perwakilan (Rusia lan Tiongkok)
3. Sawetara anggota sing dipilih kanggo 3 taun déning majelis umum saéngga anggota-anggota sing nyekel perwalian padha gunggungè karo anggota-anggota sing ora nyekel perwalian