Zōni

Saka Wikipédia, Bauwarna Mardika abasa Jawa / Saking Wikipédia, Bauwarna Mardika abasa Jawi
Jujug: pandhu arah, pados
salah satunggaling variasi zōni, panggang mochi persegi wonten ing duduh bening godhogan daging pitik.

Zōni (雑煮?) (bentuk honorifik: o-zōni) inggih punika masakan Jepang arupi sup mawi isi mochi lan bahan jangkepan ingkang dipungodhog sesarengan. Sup punika paling utami dipunsajekaken nalika perayaan taun énggal ing Jepang [1].

Bentuk mochi, bahan jangkepan, lan caranipun masak punika bènten-bènten miurut laladan lan tradisi kulawarga. Bahan sanèsipun ingkang dipunlebetaken dhateng sup punika kadosta : tahu, uwi, tugelan daging pitik, godhong werni ijo (komatsuna, horenso), bahan mawi warna ingkang menarik kadosa (wortel, kamaboko, urang), lan rempah kados yuzu utawi godhong mitsuba. Mochi kagem zōni ing wewengkon Kanto awujud persegi, déné wonten ingwewengkon Kansai awujud bunder. Ing wewengkon Kanto, duduh sup punika bening lan ngagem sekedhik kecap asin minangka penyedap. Kejawi punika ing wewengkon Kanto, mochi dipunpanggang rumiyin sadèrèngipun mlebet ing sup, déné mochi ing wewengkon Kansai boten dipunpanggang namung dipungodhog ing sup dumugi mateng [2].

Sajarah[sunting | besut sumber]

Dokumen paling tua ingkang nyathet babagan zoni (雑煮) inggih punika Cathetan kulawarga Suzuka (鈴鹿家記 Suzuka-ke Ki?) ingkang dipunserat nalika zaman Muromachi.

Sajian resmi samurai[sunting | besut sumber]

Zōni khas Hakata, sup saking kaldu daging ikan terbang lan lawuh arupi tugelan ulam buri (sunglir).

Sup punika rumiyin dhaharan kalangan samurai nalika nembé perang ing alam ingkang tinarbuka. Mochi dipunmasak kalihan janganan lan bahan dhaharan ingkang sampun dipungaringaken supados awèt. Nalika zaman Heian, tradisi dhahar mochi ing dinten taun énggal dipuntepangi ing astana kanthi wujud upacara hagatame (歯固 nguwataken waja?) kanggé ngrayakaken dawa umur. Wonten ing upacara ingkang dipunwontenaken saben tanggal 3 taun énggal, masakan ingkang atos kados mochi, daikon, daging babi wana, daging rusa, lan yakitori dipundhahar supados waja dados kuwat. Kalangan samurai kagungan tradsisi dhahar hōzō nalika upacara resmi. Salajengipun tradisi kasebut dados wiyar ing kalangan tiyang biasa. Sajian punika dados salah satunggaling menu wonten ing honzen ryōri, lan kalebet sajian wajib wonten ing pesta dhahar ing kalangan samurai.

Variasi miturut laladan[sunting | besut sumber]

  • Ing Tokyo lan sekitaripun, padatan sup punika mawi isi tugelan daging pitik lan godhong komatsuna. Duduh sup punika bening, kapendhet saking kaldu kezuribushi. Tradisi mlebetaken daging pitik punika kalebet tradisi énggal amargi boten kepanggihaken wonten ing buku-buku saking zaman Edo.
  • Ing prefektur ingkang caket kalihan Laut Jepang utawi prefektur ingkang kondhang awit saking asiling segara kadosta Prefektur Iwate lan Prefektur Toyama, zōni mawi isi tugelan daging ulam utawi dhaharan olahan saking asiling segara. Lajeng, zōni ing laladan ingkang tebih saking segara langkung kathah ngginakaken janganan minangka isinipun.
  • Ing bagéyan timur laut Prefektur Chiba, duduh dipundamel kanthi ngginakaken kecap asin (koikuchi), lan dipundhahar sareng kalihan jinising nori (habanori).
  • Ing kutha Shibata, Prefektur Niigata, sup punika isinipun manéka warni antawisipun: ulam salmon asin, tigan ulam (ikura), lobak, daging pitik, lan kamaboko.
  • Ing saperangan Prefektur Shimane lan Prefektur Tottori, mochi dipunlebetaken dhateng godhogan kacang azuki lan dipunsebat (azuki zōni). Ing laladan sanèsipun ing Jepang, sajian ingkang sami dipunwastani zenzai.
  • Ing kutha Shimabara, Prefektur Nagasaki dipunkenal sajian anama guzōni, lan dipundhahar boten namung nalika taun énggal.
  • Ing sapérangan wewengkon Prefektur Kagawa lan Prefektur Tokushima, sup punika dipunlebeti mochi ingkang katutup kacang azuki. Tiyang désa paredèn ing prefektur ingkang sami malah boten ngginakaken mochi lan sup piyambakipun namung mawi isi taro, tahu, lan suiton.
  • Ing Prefektur Miyazaki, sajian punika mawi isi daging babi wana.

Cathetan suku[sunting | besut sumber]

  1. ^ (id) Jepang, (dipunakses tanggal 14 Februari 2013)
  2. ^ (id) Hangat Sedap Sup Ozoni, Lambang Keberuntungan, (dipunakses tanggal 14 Februari 2013)
Sumber artikel punika saking kaca situs web: "https://jv.wikipedia.org/w/index.php?title=Zōni&oldid=1015686"