Luis Garcia
 García main kanggo Liverpool ing 2005 | |||
| Katerangan priangga | |||
|---|---|---|---|
| Jeneng dawa | Luis Javier García Sanz | ||
| Tanggal lair | 24 Juni 1978 | ||
| Papan lair |
Badalona,  Spanyol | ||
| Dhuwur | 1.76 m (5 ft 9 in) | ||
| Posisi main | Swiwi, Glandhang | ||
| Katerangan klub | |||
Tim saiki | Pénsiun | ||
| Angka | 10 | ||
| Karir nom | |||
| 1984–1988 | Badalona | ||
| 1988–1990 | Sant Gabriel | ||
| 1990–1997 | Barcelona | ||
| Karir sénior* | |||
| Taun | Tim | Main | (Gul) |
| 1997–2002 | Barcelona B | 73 | (25) |
| 1998 | Barcelona | 0 | (0) |
| 1999–2000 | → Valladolid (loan) | 6 | (0) |
| 2000 | → Toledo (loan) | 17 | (4) |
| 2000–2001 | → Tenerife (loan) | 40 | (16) |
| 2001–2002 | → Valladolid (loan) | 25 | (7) |
| 2002–2003 | Atlético Madrid | 30 | (9) |
| 2003–2004 | Barcelona | 25 | (4) |
| 2004–2007 | Liverpool | 77 | (18) |
| 2007–2009 | Atlético Madrid | 48 | (2) |
| 2009–2010 | Racing Santander | 15 | (0) |
| 2010–2011 | Panathinaikos | 14 | (1) |
| 2011–2012 | Puebla | 32 | (12) |
| 2012–2013 | UNAM | 37 | (4) |
| 2014 | Atlético Kolkata | 13 | (2) |
| 2016 | Central Coast Mariners | 10 | (2) |
| Gunggung | 462 | (106) | |
| Tim nasional | |||
| 2005–2008 | Spain | 20 | (4) |
| 2001–2008 | Catalonia | 5 | (3) |
|
* Gunggung main lan gul ing klub sénior tumrap liga dhomèstik iki mligi lan patitis per pukul 16:21. | |||
Luis Javier Garcia Sanz utawa asring tinepung Luis Garcia yaiku salah sawijining pamain bal-balan aguna saka Spanyol kang naté main kanggo klub kawentar saka Inggris, Liverpool FC. Dhèwèké lair ing Badalona surya ping 24 Juni 1978 (umur 42 taun) kang mapan ing posisi glandhang utawa swiwi nanging uga kadhang kala dipasang minangka panyerang. Luis Garcia duwé dedeg piadeg 177 cm lan duwèni piyandel sikil kiwa kang mumpuni nalika isih main bal-balan. Nalika isih dadi pamain bal-balan dhèwèké kapétung bela klub-klub Éropa kayata Barcélona B, Real Valladolid, CD Toledo, Atlético Madrid, Racing Club, Panathinaikos, Puebla, Atl. Kolkata, lan Central Coast.[1][2]
Karir
[besut | besut sumber]Lelakon karir Luis Garcia kalebu ora lumrah, dhèwèké bisa dikandhakaké luwih suksès bebara ing jaban rangkah tinimbang ing tanah wutah getihé dhéwé. Nalika isih cilik ngangsu kawruh ana ing Catalan banjur jenengé wiwit kondhang nalika bélani Atlético Madrid lan kasih ngrengkuh gelar-gelar pangaji bareng Liverpool FC, salah sijiné yaiku gelar Liga Champions 2004-05. Luis Garcia sabubaré kuwi kober bali menyang Atlético Madrid rong taun suwéné, banjur alihan menyang Racing Santander lan nganglang jagat béla klub kang ana ing nagara Yunani, Mèksiko, Indhia, lan Ustrali. Déné saiki dhèwèké wis pénsiun lan kapatah dadi duta La Liga Spanyol, ora gumun saliyané tilas pamain kang mumpuni, Luis Garcia uga dadi wong kang pinter kandha lan nawakaké apa kang dipréntah dadi gatiné.[3]
Nyitak "Gol Hantu"
[besut | besut sumber]Legéndha bal-balan donya, Luis Garcia naté nyitak gol kang kebak déning wewadi ing Liga Champions mangsa 2004-05 kepungkur, nanging saiki dhèwèké malah uga dadi duta liga kasebut. Luis Garcia nyitak "gol hantu" nalika ing tetandhingan kapindho Liverpool lumawan Chelsea ing stadhion Anfield sajroning babak semifinal. Lantaran ing tetandhingan sepisan tetandhingan kaloro tim kapungkasan seri utawa imbang. Menang ing tetandhingan kasebut bakal nguntabaké salah siji tim lumebu final kang ginelar ana Istanbul, Turki. Wektu semana Liverpool dilatih déning Rafael Benitez lan Chelsea dilatih déning Jose Mourinho kang péngin buktèkaké dhiri dadi raja Éropa. Benitez masang pamain kang paling apik kayata John Arne Riise, Xabi Alonso, Steven Gerrard, lan Milan Baros kang disengkuyung déning para pandhemen ing tribun The Kop. Liverpool langsung anggempur Chelsea lumantar Steven Gerrard kang awèh operan mumbul marang Milan Baros kang ana kahanan sela, Baros kang sadhar banjur lumayu ngoyak bal menyang gawang Petr Cech kang mèlu maju saperlu arep nyekel bal nanging isih kalah langkah déning Baros. Baros kasil nendhang bal nanging awaké tinubruk déning Cech, Luis Garcia kang lagi bebas nendhang bal ajag menyang arah gawang, nanging tendhangan aloné kasil disapu William Gallas. Kanthi pédhé Luis Garcia banjur nggaya yèn bal wis ngliwati garis gawang, wasit Lubos Michel milih ngesahaké "gol hantu" kasebut. Senadyan pamain-pamain Chelsea padha protès nanging tetandhingan panggah lumaku lan Liverpool kasil maju menyang final. Ing final ora dinuga Liverpool uga bisa ngasoraké AC Milan kanthi tos-tosan adu pinalti lan menangi gelar Liga Champions 2005.[4]
Bebungah
[besut | besut sumber]Mèh kabèh gelar kang rinengkuh déning Luis Garcia diolèhi nalika dadi pamain Liverpool, mula mokal yèn dhèwèké sinebut minangka legéndha Liverpool lan kerep disubya-subya déning para pandhemen Liverpool. Bebungah kang kasil dimenangi Luis Garcia ing antarané yaiku kayata:
- Liga Champions Éropa 2004-05.[5]
- Piyala Super Éropa 2005-06.[5]
- Piyala FA 2006.[5]
- Community Shield 2006.[5]
- Liga Super Indhia 2014.[5]
Rujukan
[besut | besut sumber]- ↑ Transfermarkt, Admin (2016-07-01). "Profil Pamain Luis Javier Garcia Sanz (Saka Basa Inggris)". Transfermarkt. Dibukak ing 2021-01-16.
- ↑ Bola Net, Admin (2009-09-09). "Profil Pamain Luis Garcia (Saka Basa Indonésia)". Bola.net. Dibukak ing 2021-01-16.
- ↑ Hermani & Noor, Billi Pasha & Roshi Finza (2020-06-11). "Wawan Pangandikan Luis Garcia Yakin Xabi Alonso lan Steven Gerrard dadi Palatih Elok (Saka Basa Indonésia)". Kumparan Bola. Dibukak ing 2021-01-16.
- ↑ Nugroho, Tiyo Bayu (2019-05-24). "Luis Garcia Duta Liga Champions kang Nate Nyitak "Gol Hantu" (Saka Basa Indonésia)". Indosport. Diarsip saka sing asli ing 2021-01-22. Dibukak ing 2021-01-16.
- ↑ a b c d e Transfermarkt, Admin (2016-07-01). "Gelar-gelar Luis Garcia (saka Basa Inggris)". Transfermarkt. Dibukak ing 2021-01-16.