Usus rolas driji
Usus rolas driji utawa duodenum iku péranganing usus alus kang papané sawisé lambung lan nggandhengak karo usus kosong (jejunum). Pérangan usus rolas driji wujud pérangan paling cendhak saka usus alus, diwiwiti saka bulbo duodenale lan pungkasané ing ligamentum Treitz.
Usus rolas driji iku organ retroperitoneal, kang ora kabungkus kabèh déning selaput peritoneum. pH usus rolas driji kang normal kisarané ing sangang drajat.
Jeneng duodenum asalé saka basa Latin duodenum digitorum, kang tegesé rolas driji.
Fungsi
[besut | besut sumber]Usus rulas driji duwé tanggung jawab kanggo nyaluraké panganan nuju usus alus. Sacara histologis, ana klanjer Brunner kang ngasilaké yiyid. Dhindhing usus rolas driji kasusun saka lapisan-lapisan sel kang tipis banget kang mbentuk mukosa otot.
Pérangan-pérangan
[besut | besut sumber]Usus rolas driji kapérang dadi patang pérangan kanggo nggampangaké pamaparan.
Pars superior
[besut | besut sumber]Pérangan kapisan, ya iku pars suoerior diwiwiti saka pungkasané pilorus. Banjur saluran bakal mbelok ning lateral tengen. Pérangan iki dawané 5 cm.
Pars descendens
[besut | besut sumber]Pérangan kapindho, pars descendens nerusaké pérangan kapisan. Pérangan iki wanguné saluran lurus mudhun.
Ing pérangan iki ana muara saka duktus pankreatikus lan duktus biliaris communis kang nyawiji dadi duktus hepatopankreatika. Saliyané iku, ana uga sawijining tonjolan kang karan papilla duodeni.
Pars horizontalis
[besut | besut sumber]Pérangan katelu, pars horizontalis wanguné saluran lempeng dhatar, ngliwati vena cava inferior, aorta, lan balung mburi.
Pars ascendens
[besut | besut sumber]Pérangan paling akir, pars ascendens wanguné saluran munggah lan pungkasané ing awal usus kosong (jejunum).