Taman Nasional Segara Hallyeo Haesang

Saka Wikipédia, bauwarna bébas basa Jawa
Taman Nasional Laut Hallyeo Haesang
Jeneng Koréa
Hangul 한려해상국립공원
Hanja 閑麗海上國立公園
Alihaksara sing Disampurnakaké Hallyeohaesang gungnip gongwon
McCune–Reischauer Hanryǒhaesang kungnip kongwǒn
Sesawangan Taman Nasional Segara Hallyeo Haesang ing Tongyeong

Taman Nasional Segara Hallyeo Haesang (Hallyeohaesang Maritime National Park) inggih punika taman nasional ingkang ngliputi kawasan Pulo Geoje, Pulo Hansan lan kepuloan wonten ing sakitaripun, ing propinsi Gyeongsang Selatan.[1] Dipunjuluki minangka salah satunggal saking 8 papan kanthi sesawangan paling èndah wonten ing Korea, Hallyeo Haesang sampun dados objèk wisata populer. Hallyeo Haesang dipuntetepaken minangka taman nasional wonten ing taun 1968 lan dados taman nasional segara ingkang angka sekawan wonten ing Korea Selatan.[2]

Ekosistemipun kasusun saking ewunan pulo lan perairan ingkang anteng, mbentang sadawaning 120 km saking Geoje ing Gyeongsang Selatan dumugi Yeosu wonten ing Jeolla Selatan.[2] Wiyaripun wewengkon 545,63 km² kanthi 72% kasusun saking toya.[2] 69 pul ingkang boten wonten penghuninipun lan 30 ingkang sampun dipunhuni.[2]

Watu-watu sedimen Hallyeo Haesang ingkang asalipun saking pèriode Mesozoikum mbentuk rerangkèning gunung ingkang mbentang saking lèr dhateng kidul. Ing salebeting kacipta kathah tanjung, pulo alit lan ujung.[2]

Wonten ing Taman Nasional Hallyeo Haesang wonten 1.142 spesies taneman kanthi mayoritas kasusun saking cemara abrit, cemara cemeng, kamelia, oak serrata, oak cork lan spesies ingkang langka kados Sedirea japonica (nadopungnan), Cymbidium nipponicum (daehongnan) sarta winter hazel Korea.[2] Spesies fauna kasusun saking 25 jinis mamalia, 115 jinis manuk, 16 jinis reptil, 1.566 jinis serangga, lan 24 jinis ikan air tawar.[2] Spesies mamalia umum antawisipun berang-berang, luak lan kucing liar talingan alit.[2]

Pulo-pulo[besut | besut sumber]

Pulo-pulo wonten gugusan Taman Nasional Hallyeo Haesang:

  • Pulo Geoje (Geojedo) inggih punika pulo paling ageng angka 2 wonten ing Korea.[3] Dumunung 26,5 km sisih wètan kutha Tongyeong, 150,9 km tenggara Busan. Dipungayutaken kanthi daratan Ujung Korea kaliyan Jembatan Geoje wonten ing tanggal 8 April 1971. Pasisir wonten ing Geoje kasusun saking pasir pethak, krikil bunder lan watu-watu karang. Bagèyan paling unik awujud watu-watu karang manéka bentuk saèngga dipunjuluki minangka Haegeumgang utawi Gunung Geumgang ing segara.
  • Pulo Somaemul (Somaemuldo), dipunjuluki minangka pulo kanthi sesawangan paling èndah wonten gugusan Hallyeo Haesang.
  • Pulo Saryang (Saryangdo), pulo ing tengah-tengah Hallyeo Haesang. Kasusun saking 2 pulo, Pulo Sang lan Pulo Ha ingkang kapisahekan selat sempit kanthi arus deres sadawan 1.500 mèter.
  • Pulo Hansan (Hansando), minangka bagèyan saking Tongyeong. Wonten ing periode Perang Pitung Taun inggih punika markas angkatan segara ingkang dipunpimpin Laksamana Yi Sun-sin. Ing caket Pulo Hansan wonten pulo Bambu (Jukdo) ingkang dipuntanem déning Laksamana Yi kanggé damel panah.
  • Pulo Bijin (Bijindo), dumunung 13 km sisih tenggara Kutha Tongyeong. Kasusun saking formasi watu-watuan lan pasisir ingkang dawanipun 1 km. Suhu rata-rata ing pulo punika sadanguning taun namung 25 °C saèngga dados papan tuwuuhipun flora, kembang kamelia, magnolia, melati lan cemara cemeng.
  • Pulo Oe (Oedo), dumunung 15 menit perjalanan kanthi prau saking Geoje. Kasusun saking formasi watu-watu karang.

Cathetan suku[besut | besut sumber]

  1. ^ (ko)한려해상국립공원, essentour. Dipunundhuh:17-03-2013.
  2. ^ a b c d e f g h (en)Hallyeohaesang National Park, knps. Dipunundhuh:17-03-2013.
  3. ^ (en)Geoje Island, knps. Dipunundhuh:17-03-2013.