Pad Thai
Pad Thai inggih punika salah satunggaling olah-olahan tumisan mi beras ingkang limrahipun dipuncawisaken minangka jajanan wonten ing pinggiring margi lan wonten ing restoran lokal wonten ing Thailand. Dhaharan punika dipundamel saking mi beras garing ingkang dipunkum, salajengipun dipuntumis kaliyan tigan lan irisan tahu lajeng dipunparingi bumbu kaliyan asem jawa, kécap ulam, ebi, bawang, brambang, lombok abang, lan gula aren. Dhaharan punika dipuncawisaken kaliyan irisan jeruk nipis lan ugi cincangan sayuran sanesipun kadosdene taoge, godhong kucai, acar lobak utawi lobak Cina lan lalap kembang gedhang. Masakan punika ugi saged ngginakaken urang ingkang tasih seger, yuyu, cumi-cumi, daging ayam utawi protéin sanesipun. Saperangan ageng, bahan-bahan kasebat dipuncawisaken kanthi dipunpisah minangka cocolan kadosta lombok abang, irisan jeruk nipis, kacang panggang, taogé, lan sayuran ingkang tasih seger sanesipun.[1] Ingkang vèrsi végétarian punika ngginakaken kécap asin minangka gantosipun kécap ulam lan ugi boten ngginakaken urang.
Sajarah[besut | besut sumber]
Olah-olahan tumisan saking mi beras punika dipunprakirakaken dipuntepangaken wonten ing Ayutthaya nalika zaman Kerajaaan Ayutthaya déning tiyang dagang ingkang asalipun saking Tionghoa[2] ingkang lajeng dipunréka kalih raosan Thailand.[3]. Sawetawis wonten prakiraan ugi bilih dhaharan punika asalipun saking Vietnam[4] kados saking katon wonten étimologi nama olah-olahanan niki.[5][6][7].
Nalika perang donya ingkang kaping kalih, Thailand punika nglampahi krisis beras amargi wonten perang lan banjir. Kangge ngirangi anggénipun ngonsumsi beras dhomestik, pramila pamarentah Thailand wonten ing sangandhapipun pamarentahan Mahamantri Plaek Phibunsongkhram nyuwun supados warganipun dhahar mi. Wondéné, mi ingkang dipundamel saking gandum punika kondhang sanget wonten ing Thailand, Phibunsongkhram paring panjurung supados nama negaranipun dipunéwahi saking Siam dados Thailand. Piyambakipun ugi pados cara supados saged promosi babagan nasionalisme Thailand lan ngicalaken pengaruh saking Tiongkok. Pamarentahanipun promosi mi beras lan paring panjurung supados mbentuk dhiri pribadi Thailand. Asilipun punika jinis mi enggal ingkang dipunsebat sen chan (dipunpendhet saking nama provinsi Chantaburi). Wiwit saking punika, pad thai dados salah satunggaling olah-olahan nasional Thailand.[8] Samenika wonten sapérangan ingkang nambahaken daging babi kanggé nambah rasa (sinaosa wonten ing resep aslinipun boten ngginakaken daging babi amargi pamarentahipun ingkang mastani boten nasionalis). Saperangan ingkang nyadé dhaharan punika ugi tasih wonten ingkang ngginakaken resèp asli.
Rujukan[besut | besut sumber]
- ↑ "7-Steps to Properly Eating Pad Thai". luxevoyageasia.com. Dibukak ing 2017-05-29.
- ↑ "The Truth About Pad Thai". BBC. 2015-04-28.
- ↑ "Pad Thai". Ec-padthai.com. Diarsip saka sing asli ing February 18, 2013. Dibukak ing 2013-02-23.
- ↑ "History discovered in a staple dish". Bangkok Post. 2014-02-16. Dibukak ing 2015-02-08.
- ↑ Ferdman, Roberto A. "The strange and potentially stolen origins of pad Thai". Quartz. Atlantic Media Company. Dibukak ing 15 April 2014.
- ↑ "Pad Thai". Kasma Loha-unchit, Thai Food and Travel Blog. 2009-11-26. Dibukak ing 2015-02-08.
- ↑ "Finding Pad Thai". Gastronomica. 2009. Dibukak ing 2015-10-29.
- ↑ SEARCH (2011-08-15). "Thai National Foods". Ifood.tv. Diarsip saka sing asli ing 2013-06-05. Dibukak ing 2013-02-23.