Minggu

Saka Wikipédia Jawa, bauwarna bébas abasa Jawa
(Dilih saka Ngaat)

Ngahad utawa Ngakad iku dina kang kapisan sajeroning kalèndher Jawa, ya iku sawisé dina Setu lan sadurungé dina Senèn. Jeneng Ngaat iku asalé saka basa Arab Ahad kang tegesé siji utawa dina kang kapisan. Sajeroning kalèndher Jawa, dina Ngaat iki neptuné 5. Neptu iku angka kang diduwèni saben dina, pasaran, wulan lan taun, kanggo pétungan golèk dina apik (Wariga Gemet, upamané kanggo miwiti kagiyatan kang wigati kaya déné arep palakrama, lelungan adoh lan sapanunggalané.

Ing kalèndher Masèhi dina iki diarani dina Minggu. Dina Ngaat iki minangka dina libur, lan tumrapé umat agama Kristen lan Katulik minangka dina kanggo ngayahi ibadah ing gréja. Jeneng liya kanggo dina iki ya iku Aditya, Raditya, Redité utawa Dité kang dijupuk saka basa Sanskreta kang maknané srengéngé, mèmper karo pangertên ing basa-basa ing Éropah, kaya ta ing basa Inggris: Sunday, ing basa Walanda:Zondag, basa Jerman: Sonntag kang tegesé padha ya iku dina srengéngé.

Uga delengen[besut | besut sumber]

Pranala njaba[besut | besut sumber]