James Danandjaja

Saka Wikipédia Jawa, bauwarna mardika basa Jawa

James Danandjaja utawa Tan Soe Lien (jeneng asli: James Tan ; lair ing Jakarta Kulon, 13 April 1934 – pati ing Cilodong, Depok, 21 Oktober 2013 ing umur 79 taun ) yaiku salah sawijining antropolog kang ana ing Indonésia . Dhèwèké minangka ahli folklor (pérangan kabudayan kaya ta carita rakyat, legenda, lan seni rupa ) Indonésia. Danandjaja dadi dosèn antropologi ing Universitas Indonesia wiwit taun 1960 . Dhèwèké uga naté dadi dosen ing Fakultas Psikologi ing Universitas Kristen Krida Wacana, Jakarta, mulang bab Folklor lan Antropologi Psikologi. James uga aktif ing Paguyuban Marga Tionghoa Indonésia (PMTI).

Mangsa Urip[besut | besut sumber]

James uga dadi pambeksa balet priya Indonésia, dhèwèké wiwit sinau mbeksa marang Puck Meijer nalika umur 14 taun. [1] Dhèwèké banjur olèh beasiswa saka British Council kanggo sinau balet ing Royal Ballet School London ing taun 1950-an lan dadi pambeksa balet priya kang wiwitan ing Indonésia. [2] James dikenal minangka guru pambeksa lan koreografer karya 'The Gamelan Player' (1960). [3]

James Danandjaja ngrampungaké kuliahé ing taun 1963 ing Jurusan Antropologi, Fakultas Sastra, Universitas Indonesia, banjur nyinaoni bab folklor ing Universitas California-Berkeley, Amérikah Sarékat nalika taun 1969 kanthi beasiswa Fullbright. Tesise banjur didadèkaké buku kanthi irah-irahan Annotated Bibliography of Folklore Java . Dhèwèké éntuk gelar Doktor Psikologi Antropologi saka Universitas Indonesia ing taun 1977, kanthi disertasi Kebudayaan Petani Desa Trunyan di Bali ing taun 1980. Dh`wèké uga naté dadi guru besar tamu ing Universitas California-Berkeley, AS, ing taun 1981-1982. Wong kang seneng beksan lan seni petunjukan iki dadi panaliti ing Kalimantan, Nias-Sumatra, lan Terunyan-Bali.

Karya[besut | besut sumber]

Karya James Danandjaja ing antawisipun:

  • Folklor Indonesia (1984) nampa penghargaan saka Yayasan Buku Utama ing taun 1987.
  • Pantomim Betara Berutuk suci saka Trunyan, Bali (1985)
  • Upacara Lingkaran Urip ing Trunyan, Bali (1985)
  • Antropologi Psikologi (1988)
  • Humor Mahasiswa (1988)
  • Folklor Jepang (1997)
  • Folklor Amèrikah (2003)
  • Folklor Cina (2007)

Pati[besut | besut sumber]

James tilar donya ing Rumah Sakit Bhakti Yudha, Depok, ing dina Senèn, 21 Oktober 2013. [4] Sawise diberkati ing misa requiem ing omahé, layoné dikubur ing Kalimulya, Cilodong jam 2 awan.

Pangaji[besut | besut sumber]

James pikantuk pangaji Satya Lencana saka Pamarèntah RI ing taun 2002 lan minangka Guru Besar Emeritus ing taun 2005.

Rujukan[besut | besut sumber]

  1. Profil James Danandjaja Archived 2014-10-22 at the Wayback Machine.. Diakses 22 Oktober 2014.
  2. Tokoh-tokoh etnis Tionghoa di Indonesia Oleh Sam Setyautama, Jakarta 2008
  3. Profil James Danandjaja Archived 2015-09-24 at the Wayback Machine.. Diakses 22 Oktober 2014.
  4. http://www.tempo.co/read/news/2013/10/21/173523312/James-Danandjaya-Ahli-Folklor-Tutup-Usia