Fatamorgana

Saka Wikipédia Jawa, bauwarna bébas abasa Jawa
Fatamorgana ing padhang pasir

Fatamorgana ya iku salah siji kadadèyan utawa fenomena optis kang lumrahé ana ing panggonan kang amba kaya ta padhang gesik utawa padhang ès.[1] Fatamorgana bisa diarani gambaran kang diwangun déning hawa utawa udara.[2] Fatamorgana disebabaké amarga salapis udara kang panas lan tipis ing sandhuwuré panggonan, hawa iki nekuk utawa mbéngkokaké cahya saka langit saéngga katon teka saka dalan.[2] Saka prastawa iki katon kaya pantulan kang katon kaya ana banyu ing sandhuwuré panggonan kang panas.[2] Miturut ngèlmu fisika, fenoména optik iki kadadéan amarga cahya kang kuwat dibengkokaké nalika ngliwati lapisan hawa kang duwé suhu kang panas ing lapisan atmosfer.[2]

Fatamorgana uga ditemtokaké déning titik pangamatan.[2] Sangsaya dhuwur titik pangamatan, fatamorgana saya ora cetha.[2] Fatamorgana cetha nalika manggon ing titik pengamatan kang cendhèk.[2] Para pelaut lumrahé ngertèni pulo kang nglayang ing udara, iki kadadéan nalika para pelaut ngematna sesawangan laut saka kapal kanthi panggonan kang dhuwuré loro utawa telung mèter ing sandhuwuré segara lan uga saka panggonan kang rata.[2]

Umpamané ing gunung pasir, fatamorgana arupa tlaga utawa banyu utawa kutha.[1] Iki sabeneré ora nyata.[1] Fatamorgana disebabaké pantulan saka langit kang dipantulaké hawa panas.[1] Hawa panas iki gunané kanggo dadi kaca utawa pengilon kang mantulaké kahahan ing salah siji panggonan.[1] Amarga ora kadadéan kang sabeneré mulané fatamorgana uga diarani apusan mata.[2]

Ora mung ing gunung pasir kang panas, fatamorgana uga kadadéan ing wajan kang isiné lenga kang panas lan ing dalan kang panas nalika wayah awan.[2] Fatamorgana uga bisa kadadéan ing kutub.[2] Lumrahé kadadéan nalika kahanan lagi cerah lan hawané rada panas ing panggonan kang ana lapisan ès.[2] Lapisan ès iki marakaké hawa dadi mudhun.[2]

Tembung fatamorgana dijupuk saka basa Italia.[1] Tembung iki asalé saka jeneng duluré wadon Raja Arthur ya iku Faye le Morgana.[1] Dhèwèké arupa peri utawa widodari kang bisa malih wujud.[1]

Cathetan sikil[besut | besut sumber]

  1. ^ a b c d e f g h artikata.com(diaksès tanggal 3 Juli 2011)
  2. ^ a b c d e f g h i j k l m wartawarga.gunadarma.ac.id(diaksès tanggal 3 Juli 2011)

Pranala njaba[besut | besut sumber]