Eri

Saka Wikipédia Jawa, bauwarna bébas abasa Jawa
Jump to navigation Jump to search

Eri iku istilah umum (generik) kanggo nyatakaké pérangan tetanduran utawa sato kéwan kang pucuké landhep lan cukup atos saéngga bisa agawé tatu ing kulit utawa pérangan awak liyané. Eri, kaya déné uga "swiwi", dudu istilah biologi lan kanthi ontogeni, eri bisa tuwuh saka jaringan kang béda-béda.

Eri ing tetanduran[besut | besut sumber]

Gambar:Eri mawar.jpg
Eri ing wit mawar.

Ing tetanduran, eri bisa ditemoni ing manéka organ. Eri minangka organ aksesori lan fungsiné minangka piranti perlindungan dhiri saka pemangsa (gegremet utawa hèrbivor). Eri bisa asal saka modifikasi godhong utawa minangka organ aksesori sajati.

Eri minangka modifikasi godhong[besut | besut sumber]

Ing kaktus lan sawetara tetanduran tlatah garing liyané (xerofit), eri minangka modifikasi saka godhong. Fungsi metabolisme godhong dilakoni ing epidermis wit lan godhong owah dadi eri kanggo ngurangi transpirasi.

Eri minangka aksesori[besut | besut sumber]

Eri minangka aksesori ditemoni ing wit, godhong, sarta woh. Eri wit paling gampang tinemu ing wit mawar. Eri ing lumahing godhong racaké awangun cilik-cilik. Eri ing woh ditemoni upamané ing kulit woh durèn.

Eri ing sato kéwan[besut | besut sumber]

Permukaan kéwan wulu babi kang mawa eri

Panyebutan "eri" sajeroning donya sato kéwan bisa ditemoni ing landhak, iwak, lan gegremet.

Eri ing landhak sakbeneré rambut kang kamodifikasi dadi gedhé lan atos. Eri landhak kasusun saka bahan kang padha karo rambut ya iku keratin, sajinis protéin.

Eri ing iwak ditemoni ing betok, mujair, lélé, lan bandeng. Eri ing iwak iku balung. Ing iwak betok lan mujair, kang dimaksud eri mligi balung kang nyusun sirip dorsal lan sirip insang. Ing iwak lélé, kang dimaksud eri ya iku patil, sawijining organ aksesori ing pérangan dhadha ventral minangka piranti pertahanan.

Eri ing gegremet lumrahé minangka tonjolan-tonjolan landhep. Conto kang bisa dideleng ing sikil walang.