Donat

Saka Wikipédia Jawa, bauwarna bébas abasa Jawa
Donat

Donat kalebu jajanan kang digawé saka trigu.[1] Saliyané iku ana uga donat kang digawé saka kenthang lan bahan liyané.[1] Donat lumrahé bentuké bunder lan ana bolongan ing tengahé.[1] Ananging ana uga donat kang ora ana bolongané tengahé.[1] Gawé donat kudu teliti, yèn ora, donat bisa ora dadi utawa mbegedat lan ora bisa ngembang.[1]

Ana aturan kang kudu digatégaké yèn arep nggawé donat.[1] Ragi kang arep kanggo nggawé donat kaya ta donat kenthang ora kena dicampur uyah utawa mentéga, awit raginé bisa mati.[1] Ragi kang mati ora bisa ngembangaké adonan.[1] Déné uyah lan mentéga dicampuraké sawisé adonan setengah kalis.[1] Carané ngoreng uga kudu ati-ati supaya ora gosong.[1] Yèn donat wis katon kuning rada coklat kudu rikat diwalik, mundhak gosong.[1] Yèn arep mènèhi margarin, coklat utawa méses kanggo rerenggan kudu ngenténi donat adem.[1] Tujuwané supaya méses utawa margarin ora léléh.[1] Yèn kepéngin nggawé donat kang bunder, carané bisa nganggo sumpit.

Donat Kenthang[besut | besut sumber]

Donat kenthang ya iku donat kang digawé saka kenthang.[1] Bahan lan carané nggawé donat kenthang ora béda adoh karo donat kang digawé saka trigu, ananging kanggo bahan dhasaré diganti kenthang.[1] Kenthang digodhog nganti empuk.[1] Sawisé iku banjur diocéki lan diuleg utawa dialusaké nganti kalis.[1] Kenthang kang wis dadi adonan banjur dicampur karo bahan-bahan liyané kaya ta gula, endhog, mentega cair kang wis dipanasaké. Yèn wis kabèh bahan dicampuraké banjur diulèni nganti kalis ora kelet ing tangan. Banjur ditutupi nganggo lap utawa kain teles kang resik supaya donate bisa ngembang. Adonan kang wis kalis dijarke nganti 2 jam suwéné. Yèn wis ngembang banjur dibentuk lan digoreng utawa diopen.[1] Donat kenthang uga bisa dihias karo coklat, meses, kèju, selé stroberi, sele nanas, mocca, lan liya-liyané.

Donat Ubi[besut | besut sumber]

Saliyané kenthang, ubi utawa téla rambat uga kena digawé donat.[1] Téla rambat uga kena dikonsumsi déning wong kang kena diabétes. Ubi (Ipomoea batatas) kerep diolah dadi jajanan, kaya ta goréngan.[1]

Kanggo bahan dhasar nggawé donat, téla rambat nduwéni tékstur kang lembut. Donat saka tela rambat iki uga diprodhuksi ing Cimahi, Jawa Barat.[1] Ora mung kanggo jajanan, téla rambat uga bisa gawé wareg.[1] Téla rambat uga nduwéni manfaat tumrap kaséhatan. Saliyané ngandhut serat, téla rambat uga ngandhut beta karoten, vitamin A, lan antioksidan kang bisa nangkal radikal bébas. Beta karoten mliginé ana ing tela rambat kang rupané oranyé. Déné antioksidan akèh tinemu ing téla rambat kang rupané ungu. Saliyané iku téla rambat uga nduwéni oligosakarida kang fungsiné kanggo prebiotik lan uga ngandhut vitamin A, B6, E, lan K.

Donat saka téla rambat luwih empuk lan lembut teksturé tinimbang donat kenthang.Wernané uga warna-warna miturut werna téla rambat kang dianggo. Donat iki duwé ganda ubi kang khas.

Donat Coklat[besut | besut sumber]

Donat coklat ya iku donat kang dihias utawa diwénéhi coklat ing pérangan ndhuwur donat. Dadi separoné donat dihias karo coklat cair. Sawisé iku donat bisa diwuwuri karo meses, kacang, kacang almon, coklat putih cair, kena uga biskuit utawa mari. Saliyané iku uga kena diwènèhi woh kaya ta anggur, jeruk, utawa woh kalèng liyané.

Jinise Donat[besut | besut sumber]

Gladri[besut | besut sumber]

Cathetan suku[besut | besut sumber]

  1. ^ a b c d e f g h i j k l m n o p q r s t u v www.resep-resepmasakan.com(dipunundhuh tanggal 6 Mèi 2011)
  2. ^ http://resep.gramediamajalah.com/(dipunundhuh tanggal 6 Mèi 2011)