Wayang Révolusi

Wayang Révolusi iku wayang kang njupuk carita jaman kamardhikan Indonésia. Jaman mbiyen, wayang iki kanggo awèh panyuluhan marang warga apa pentinge urip tanpa dijajah. Saiki, wayang iki wis arang digelar manèh.

Wayang iki wiwitane digawé déning Raden Mas Sayid saka Pura Mangkunagaran, Surakarta. Nalika Konggres Pemuda ing Madiun, Jawa Wétan, 1947, para aktivis kamardhikan sarujuk supaya nganggo wayang kanggo sesuluh. Pisanane, wayang-wayang iku nganggo kertas karton kang ditempeli gambar-gambar tokoh nasional saka guntingan, kaya ta Soekarno lan Mohammad Hatta. Gandheng iki uga magepokan kalawan Walanda, mula ana uga wayang-wayang saka bangsa Walanda. Wayang iki banjur digawé kaya déné wayang lumrahe, ya iku nganggo kulit kéwan.

Ing taun 1960, saperangkat wayang mau dituku déning Museum voor Volkenkunde, Rotterdam, Walanda. Wayang-wayang mau bisa mulih manèh ing Indonésia taun 1995. Wayang-wayang mau saiki dadi koleksine Museum Wayang ing Jakarta. Museum iki uga nggawé salinan sawatara wayang kang naté ana.