Appa
Appa yaiku salah sawijining karakter fiktif kang ana ing serial animasi telvisi Nickelodeon kanthi irah-irahan Avatar: The Legend of Aang . Ing seri kasebut, Appa mujudaké siji-sijiné bison sing isa miber kang isih urip. Swarane ing televisi diisi déning Dee Bradley Baker . Bagéyan tambahan ing DVD, kang nggawé serial kasebut, Michael Dante DiMartino lan Bryan Konietzko, nggambaraké yèn Appa kuwi gabungan saka kéwan banthèng / bison lan manatee .[1] Akèh episodé kang nuduhaké Appa seneng mangani damèn.
Ringkesan Garis Carita
[besut | besut sumber]Jaman Enom
[besut | besut sumber]Ing episode "Dina Ilangé Appa", ana babagan kang nyaritakaké cilikané Appa. Wektu iku sepisanan dhèwèké ketemu karo Aang. Dicaritakaké yèn bison mabur kuwi senadyan ta isih cilik nanging uwis bisa mabur. Ibuné Appa ndhawuhi para anaké supaya mudhun nemoni para pandhita enom kang bakal dadi kanca salawasé urip. Ing episode kasebut, ora dijlèntrèhaké hubungan kaum pengembara udara karo bison kang bisa mabur; mung dimangertèni yèn para bison kang bisa mbur raket banget karo kaum pengendali udara lan jurus pengendalian udara. Nalika Appa medhun nemoni Aang, dhèwèké banjur nawani Appa apel. Amarga Aang mangertèni yèn kéwan kuwi seneng karo apel, banjur diwènèhi jeneng "Appa" kang asalé saka tembung "apel".[2] Sawisé kedadéyan kuwi kekaroné dadi kanca raket. Kasunyatan ngenani karaketan Appa karo Aang digambaraké ing èpisodé "Dina Ilangé Appa".
Nalika Aang ngertèni yèn dhèwèké bakal dipisah karo pandhita kang banget ditrèsnani, dhèwèké banjur lunga menyang kutub kidul bareng karo Appa. Ing dalan, kekaroné nemoni prahara. Nalika kagulung ombak, Aang nyiptakaké bal kang isiné hawa kanggo nylametaké dhèwèké karo Appa, banjur kekaroné keturon ana kono nganti 100 taun suwéné.
Petualangan
[besut | besut sumber]Bal isi hawa kang ngemot Aang karo Appa kagawa nganti kutub kidul ditemokaké déning Katara lan Sokka, remaja saka Suku Banyu sisih Kidul . Amarga kedadéyan kasebut, dhèwèké dadi kanca raket. Appa uga dadi anggota klompok utama amarga digunakaké kanggo tunggangané Aang lan kanca-kancané. Kanthi nunggang Appa, Aang sakanca lunga ngallih-ngalih panggon kanggo golèk guru supaya Aang bisa nyinaoni ilmu pangendalian patang unsur. Ing lelungan kasebut, Appa olèh kanca anyar, kaya ta Momo lan Toph . Sokka mènèhi jeneng rombongan kasebut "Tim Avatar".
Saliyané dadi tunggangan, Appa uga didadékaké banthèng kang bisa nglindhungi rombongan, amarga ukuran awaké kang gedhé. Contone, nalika Appa nggusah beruang platipus ing èpisodé "The Fortuneteller" utawa nalika nglawan Shirshu ing èpisodé "Bato of the Water Tribe".
Ing èpisodé "The Library" kacaritakaké nalika Aang sakanca ngumbara ing Kerajaan Bumi, dhèwèké mara ing pabukon wadi duwéné Wan Shi Tong kang ana ing tengah Gurun Si Wong. Nalika Aang sakanca lumebu ing perpustakaan, Appa lan Toph nunggu ana jaba. Sawetara wektu, perpustakaan kasebut diklelepaké ing wedhi déning Wan Shi Tong amarga mangertèni yèn ilmu kasebut bakal digunakaké déning Sokka kanggo perang. Ing kahanan kang kaya mengkono, Appa dicolong déning para pangendali wedhi. Toph ora bisa nulungi amarga dheweke nylametaké pabukon kang mbaka sithik klelep wedhi.
Ilangé Appa
[besut | besut sumber]Ing èpisodé "Dina Ilangé Appa" dicaritakaké yèn Appa didol menyang Negara Geni déning para pangontrol wedhi. Wong kang bisa nglulutaké kéwan galak saka sawijining sirkus nuku Appa kanggo didadèkaké kèwan panglipur. Amarga ing sirkus Appa disiksa, dhèwèké minggat. Banjur, Appa ngumbara ing Kerajaan Bumi nganti tekan ing Pulo Kyoshi . Ing kana, dhèwèké sepisanan ditemokaké déning Suki, pangarsa para Prajurit Kiyoshi. Appa diwènèhi mangan lan diresiki awaké déning para Prajurit Kiyoshi. Suki meksa Appa bali marang Aang sawisé Azula teka nyerang Pulo Kyoshi. Appa kepengin mènèhi pitulung, nanging Suki meksa supaya Appa lunga nemoni Aang.
Sawisé ninggalaké Pulo Kyoshi, Appa lunga menyang Kuil Udara Wétan . Ing kana dhèwèké ngaso lan ngudarasa kèlingan jaman kepungkur. Dhèwèké ketemu karo guru tuwa kang duwèni asma Guru Pathik kang lagi semedi. Kanthi cara maca raketé anggoné Appa kekancan karo Aang, Guru Pathik mangertèni ana ing endi Aang saiki. Banjur Guru Pathik nulis surat kang ditalikaké ana ing sunguné Appa. Sawise iku, dhèwèké dhawuh supaya Appa langsung menyang Ba Sing Se, kanggo nemoni Aang. Appa nurut waé, nanging ana ing kana dhèwèké dicolong déning Long Feng.
Baliné Appa
[besut | besut sumber]Appa dikunjara ana ing sawijining panggon wadi kang ana ing Tlaga Laogai. Nalika Aang sakanca lumebu ing panggon wadi kasebut, Zuko duwèni rerenggan nyekel Aang nggunakaké Appa minangka pancingan. Nanging, sawise olèh pitutur saka Iroh, Zuko nggubah pamikirané lan ngeculaké Appa. Banjur Appa bali nalika Aang prang tandhing mungsuh Dai Li ing Tlaga Laogai. Aang banget bungahé ngertèni Appa bali. Kanthi nunggangi Appa, Aang sakanca lumebu ana ing Kerajaan Bumi kanggo nemoni Raja Kuei. Supaya raja bisa precaya yèn lagi ana perang, Aang ngajak raja nunggangi Appa kanggo mriksani tembok Ba Sing Se kang wis dijebol para Prajurit Negara Geni. Sawisé mangertèni yèn kahanan kerajaané lagi kadhesek, raja mrintahaké supaya para prajurit nggawé strategi, nanging gagal amarga ana kudeta. Pungkasané, Karajan Bumi kalah karo Kerajaan Geni. Raja kerajaan bumi uga Aang sakanca lunga nunggangi Appa.
Lelungan ing Negara Geni
[besut | besut sumber]Appa mesthi ngancani nèng endi waé Aang lunga, kalebu nalika ing Negara Geni. Aang nutupi awaké Appa nganggo awan nalika mabur, supaya ora konangan mungsuh. Sawisé kalah nalika prang tandhing ing wektu grahana srengéngé, Appa nggawa Aang sakanca menyang Kuil Udara Kulon. Ing kana dhèwèké narima Zuko minangka guruné Aang bab pangontrol geni, Appa isih rumangsa duwèni utang budi marang Zuko amarga wis mbebasaké dhèwèké ing Ba Sing Se. Appa uga nggawa lunga Aang lan Zuko menyang Kuil Prajurit Matahari kanggo ngèlmu ngontrol geni kang sejati. Sawisé kuwi nggawa Katara lan Zuko nggolèki pangontrol geni kang matèni ibuné Katara lan Sokka.
Watak lan Kapribadèn
[besut | besut sumber]Ing sèri Avatar, ora akèh kang bisa dijlèntrèhaké ngenani kapribadèn lan wataking Appa amarga dhèwèké ora bisa ngomong. Senadyan ta kaya mangkono, nanging Appa bisa mangertèni kareping manungsa, kaya kang digambaraké ing sawetara èpisodé. Kita bisa nangkep yèn Appa duwèni watek kang ora gampang ngarani ala marang liyan, sadurungé ngalami kedadéyan ala ing èpisodé "Dina Ilangé Appa". Biyèn dhèwèké ora nolak nalika diwènèhi apel déning Aang, ananging sawisé lunga saka panggon sirkus kang nyiksa dhèwèke, saiki Appa dadi luwih ati-ati.[3]
Nalika ing sirkus Appa dikurungi, dipeksa nindakaké apa kang ora diwanèni. Iki sing jalari Appa lara ati lan trauma. Ing èpisodé "Dina ilangé Appa", Guru Patik ngandharaké yèn Appa iku kèwan kang duwèni sipat adhem, ayem, lan tentrem. Ananging amarga tau pisah karo Aang lan dikunci ing sirkus ndadékaké Appa dadi kèwan kang wedinan lan kesepèn.[2] Iki bisa dimangertèni nalika Appa sepisanan ketemu karo Suki, kamangka Suki kanca raketé Aang kang uwis mènèhi pambiyantu ngliwati jalur Naga kang mbebayani. Nanging, sawisé Suki nepangaké, Appa bali dadi apikan menèh.
Ing èpisodé "The Cave of Two Lovers", Appa kewedèn yèn kudu lumaku ing ngisor lemah lan wedi karo geni. Rasa wedining Appa marang geni bisa amarga kedadéyan kang dialami Appa ing sirkus utawa amarga gawan saka jinis spèsiès kasebut. Minangka bison, Appa bisa dadi kèwan kang galak.[4] Iki dicaritakaké ing èpisodé "Bato of the Water Tribe" lan "Appa's Lost Days".
Kabisan
[besut | besut sumber]Appa duwèni kabisan mabur, mula diarani bison mabur. Buntuté Appa kaya dadi piranti utama kanggo mabur, nanging sejatiné tutuké uga bisa dienggo mabur. Amarga gedhéné awaké Appa, dibutuhaké tenaga kang akèh supaya bisa mabur. Mula kuwi, Appa ora bisa mabur suwé-suwé lan kudu ngaso.[5] Ing èpisodé pambuka, digambaraké dhèwèké uga mahir nglangi,[3] senajan ta luwih asring diketokaké dhèwèké lumaku utawa mabur. Senajan Appa duwèni sipat kang adhem ayem nanging dhèwèké tetep bisa prang tandhing nalika kepèpèt. Kanthi kabisan kang diduwèni, Appa bisa nggawé angin gedhé kanthi cara ngobahaké buntuté kang bisa nyebabaké lawané uwal.[4]
Kekancan
[besut | besut sumber]Aang
[besut | besut sumber]Ing séri Avatar, Aang kekancan karo Appa wiwit cilik. Wong loro wisngliwatimanéka kedadéyan, kalebu turu ing jero es 100 taun suwéné. Anggoné kekancan antara Aang karo Appa banget raketé, mula kuwi Guru Patik bisa mangertèni Aang ana ing endi kanthi cara ngrasakaké energi kang ana ing awaké Appa. Ing èpisodé "The Dessert", nalika pengontrol wedhi ngandharaké yèn dhèwèké wis nyolong Appa, Aang muntab. Pungkasane, muntabing Aang bisa dileremaké Katara. Ing sikepané Katara, Aang nangis amarga rumangsa wis kélangan sigaraning nyawa. Lan uga ing episode "City of Walls and Secrets", nalika Tim Avatar tekan Ba Sing Se, Aang ngomong, "Dhèwèké (Appa) ana ing kéné, aku bisa ngrasakaké".
Rujukan
[besut | besut sumber]- ↑ Bryan Konietzko and Michael Dante DiMartino. (2006, 2006-09-19). Book 1: Water, Box Set [DVD].
- ↑ a b "Appa's Lost Days". Director: Giancarlo Volpe; Writer: Elizabeth Welch Ehasz. Avatar: The Legend of Aang. Nickelodeon. 2006-10-12. No. 16, season 2.
- ↑ a b "The Boy in the Iceberg". Director: Dave Filoni; Writers: Michael Dante DiMartino, Bryan Konietzko. Avatar: The Legend of Aang. Nickelodeon. 2005-02-21. No. 1, season 1.
- ↑ a b "Bato of the Water Tribe". Director: Giancarlo Volpe; Writer: Ian Wilcox. Avatar: The Legend of Aang. Nickelodeon. 2005-10-07. No. 15, season 1.
- ↑ "The Chase". Director: Giancarlo Volpe; Writer: Joshua Hamilton. Avatar: The Legend of Aang. Nickelodeon. 2006-05-26. No. 8, season 2.