Candhi Sambisari
Koordhinat: 7°45′45″S 110°26′50″E / 7.7624609°S 110.4472285°E
Candhi Sambisari inggih punika salah satunggalipun candhi tilaran mangsa kajayaanipun agami Hindhu ing Pulo Jawa ingkang miturut administrasinipun wonten ing wewengkon Dusun Sambisari Kalurahan Purwomartani Kacamatan Kalasan Kabupatèn Sléman, Provinsi Daerah Istimewa Yogyakarta (DIY).[1] Candhi punika kalebet candhi aliran Syiwaistis ingkang dipunyasa ing abad X déning Wangsa Syailendra.[1] Candhi Sambisari nembé dipunpangggihi ing taun 1966 déning tiyang tani ingkang namanipun Karyoniangun ingkang nembé macul sabinipun.[1][2]
Awit pamanggihan Candhi punika, Balai Arkeologi Yogyakarta lajeng ngawontenaken panalitén lan ékskavasi.[1] Adhedhasar panaliten bab géologis watu candhi lan siti ingkang sampun ngurug candhi sadangunipun atusan taun, candhi kanthi inggil 7,5 méter punika kinten-kinten kaurug déning material Gunung Merapi ingkang mbledhos ing wulan 1006 Maséhi.[1][3] Salajengipun, saking asil panalitèn ingkang dipunwontenaken ing wulan Juli 1966, pikantuk asil bilih wewengkon kasebat panci satunggalipun situs candhi.[1] Nalika taksih prosès panalitèn (pangerukan) ugi kapanggih kathah piranti ingkang gadhah sajarah, kados tembikar, emas, lan prasasti ingkang dipundamel saking emas.[1] Miturut tim ingkang neliti, pamanggihan kathah piranti kasebat dados indhikasi bilih Candhi Sambisari dipunyasa déning Raja Rakai Garung.[1][2] Sasampunipun ékskavasi dipunwontenaken, lajeng dipunwiwiti prosés panataan (panyusunan) malih candhi ingkang ing wekdal samanten taksih misah-misah.[1] Awit saking punika, situs candhi kasebat lajeng dipundadosaken minangka wewengkon suaka budaya.[1]
Taun 1987, Balai Arkeologi Yogyakarta ngawontenaken pamugaran lan rekonstruksi candhi.[1] Saking prosés rekonstruksi kasebat, pikantuk asil bilih wontenipun Candhi Sambisari punika ing jero 6,5 méter saking siti sisih nginggil.[1] Amargi punika, déning masarakat ing mrika, candhi punika dipunsebat minangka Candhi Salebeting Siti.[1]
Cathetan suku
[besut | besut sumber]- ↑ a b c d e f g h i j k l m Candhi Sambisari[pranala mati permanèn] dipunundhuh tanggal 12 Agustus 2011)
- ↑ a b 21 Tahun Merangkai "Puzzle" Candhi Sambisari dipunundhuh tanggal 12 Agustus 2011)
- ↑ Candhi Sambisari dipunundhuh tanggal 12 Agustus 2011)
Pranala njawi
[besut | besut sumber]Candhi Sambisari[pranala mati permanèn]
Candhi | ||
|---|---|---|
 | ||
| Artikel iki minangka artikel rintisan. Kowé bisa ngéwangi Wikipédia ngembangaké. |