Wikipédia:Artikel pilihan/2011 12
Sinterklas iku sawijining tokoh suci sajroning agama Kristen sing miturut ujaring kandha, tresna banget lan mesthi maringi hadiah marang bocah-bocah ing sawetara dina-dina wigati, utamané ing dina ambal warsané, yaiku tanggal 6 Desember. Sinterklas ing budaya Jawa lan uga ing budaya Indonésia sacara umum iku kasil saka pangaribawa budaya Walanda ing Nuswantara. Ing basa Walanda diarani Sinterklaas. Banjur jroning basa liya uga ditepungi kanthi jeneng Santa Klaus, Santo Nikolas, Santo Nick, Bapak Natal, Kris Kringle, Santy, utawa Santa. Ing budaya liya saliyané budaya Walanda, tokoh iki dicritakaké minangka paraga sing mènèhi hadiah marang bocah-bocah cilik, utamané ing Dina Natal.
Santa asalé saka tokoh jroning crita rakyat ing Éropah asal saka tokoh Nikolas saka Myra, lair watara taun 280 M ing Patara ora adoh saka Myra (Demre) sing saiki papané ing negara Turki. Bapaké wong Arab sing asmané Epifanius déné ibuné Nonna. Nikolas iku sawijining uskup sing mènèhi hadhiah marang wong mlarat.
Tokoh Santa sabanjuré dadi bagéyan wigati ing tradhisi Natal ing donya kulon lan uga ing Amérika Latin, Jepang lan bagéyan liya ing Asia Wétan.
Dina Sinterklas dipèngeti ing saindenging donya saben tanggal 6 Desember.