Taman Budaya Tegal
Taman Budaya Tegal utawi asring dipuncekak TBT inggih punika salah satunggalipun komplèks gedhong kagunganipun Pamérintah Kutha Tegal, Provinsi Jawa Tengah, Indonesia. Gedhung punika dipunadegaken saperlu kanggé nyawisi panggènan pagelaran seni, gladhèn, pangembangan seni, wawan rembag, pamèran, dhokumentasi pakaryan para seniman. Komplèks ingkang wiyaripun satunggal hektar punika papan dunungipun wonten Jalan Jalan Kolonel Sugiono Kutha Tegal, dipunkepyakaken surya 19 Dhésèmber 2012 déning Wali Kutha Tegal (rikala samanten) Ikmal Jaya, S.E., Ak.
Latar wingking
[besut | besut sumber]Jagat seni Kutha Tegal, awit saking dasawarsa 1970-an, sampun ngetawisaken karegenganipun. Teater RSPD, Teater Puber, lan Teater Massa Hisbuma inggih punika pakumpulan seni ingkang paling asring ndhèrèk lelabetan ngramèkaken khasanah kasenian Kutha Tegal dumugi dasawarsa 1990-an. Kacathet ugi, sapérang seniman/grup skal (cakupan) nasional ingkang naté rawuh lan méntasaken pakaryanipun, kados ta W.S. Rendra, Bengkel Teater, Teater Lingkar, Teater Tetas, ADA Band, Kerispatih, Déwa 19, Ari Lasso, Ari Sutedja (pianis), Luluk Purwanto, lan taksih kathah sanèsipun. Kajawi saking punika, sapérang panaliti saking manca nagari naté ngawontenaken panalitènipun mawulan-wulan ing ngriki saperlu kanggé nyusun disertasi, kados ta Anton Lucas (panganggit buku sesirah buku Peristiwa Tiga Daerah) lan Richard Curtis saking Australia.[1] Mindhakipun kiprah seni para seniman ingkang mboten kairing déning kacawisaken panggènan pagelaran ndadosaken kaprihatinan. Sawetawis punika, Gedhung Kesenian Tegal ingkang rikala samanten kirang saé amargi sampun sami risak. Pramila ing taun 2009, sapérang seniman sesarengan kaliyan Dewan Kesenian Tegal, kairing staf saking Dinas Perhubungan Pariwisata dan Kebudayaan ngawontenaken pangangsu kawruh (studhi bandhing) wonten Taman Budaya Jawa Tengah ing Kutha Surakarta. Lan kasilipun, kanthi njiplak sumangatipun saking Taman Budaya Jawa Tengah, panyusunan usulan pambangunan gedhong taman budaya dipunsarujuki déning pamaréntah Kutha Tegal. Kala mangsa taun 2010 dumugi 2012 Taman Budaya Tegal dipunadegaken, kanthi wragad dumugi Rp. 5 milyar.[2]
Paméntasan ingkang sampun kalaksanan
[besut | besut sumber]Sadèrèngipun dipunkepyakaken, Taman Budaya Tegal sampun kaginaaken minangka sarana paméntasan antawisipun Resital piano Golden Finger déning Jelia (Jakarta) lan Michael Gunadi Wijaya (Tegal).[1] Para mahasiswa saking Universitas Negeri Semarang inggih naté ngawontenaken paméntasan ing adicara Seni Ruparupa. Salajengipun, nalika paresmèn Teater Arena ing surya 19 Désèmber 2012, wonten Semenjana Voice, kelompok beksan Kusuma Wijaya, lan koor saking SMA Pius Tegal. Kajawi punika Teater RSPD lan Teater Q sesarengan CressindO ugi nampilaken pakaryanipun wonten mriku. Kajawi saking punika, pambabaran buku kempalan carita cekak sesirah Tunas, anggitanipun Eko Tunas, kasil ngempalaken malih balung pisah sekawan rencang inggih punika Eko Tunas, Ebiet G. Ade, Emha Ainun Nadjib, lan E.H. Kartanegara. Wondéné saking kalawarta sastra Horison, naté ngintun Putu Wijaya, Agus R. Sardjono, Iman Soleh, lan Joni Ariadinata saperlu mangarsani adicara wawan rembag Sastrawan Bicara Siswa Bertanya (SBSB).[3]
Ugi pirsani
[besut | besut sumber]Rujukan
[besut | besut sumber]- ↑ a b Yono Daryono. "Kutil, Kardinah, Dan Bu Sardjoe". Kompas.com. Dibukak ing 27 Januari 2015.
- ↑ "Kota Tegal Akan Bangun Taman Budaya". Tempo.co. Dibukak ing 27 Januari 2015.
- ↑ "Reuni 4E: Nostalgia Persahabatan Empat Dekade". Beritasatu.com. Dibukak ing 27 Januari 2015.
