Swiké
 Swiké Kodok Oh, pupu kodok ing duduh tauco | |
| Jeneng liyané | Swikee |
|---|---|
| Ajangan | Tetedhan utama |
| Panggonan asal | Indonesia |
| Tlatah utawa praja | Purwadadi, Jawa Tengah |
| Digawé | Tionghoa Indonesia |
| Hawa ajangan | Panas |
| Woworan pokok | Pupu kodok |
 Buku masakan: Swiké  Médhia: Swiké | |
Swiké utawi Swikee inggih punika Masakan Tionghoa Indonesia ingkang dipundamel saking pupu kodok. Dhaharan punika saged kapanggih wonten ing wujud sup, dipungoreng garing, utawi dipunoseng. Aslinipun dhaharan punika asalipun saking masakan Tionghoa ingkang mlebet dhateng Indonesia. Istilah "swikee" asalipun saking dhialèk Hokkian (水雞, (Pe̍h-ōe-jī: súi-ke) sui (toya) lan ke (ayam) ingkang kalebet slang utawi pengalusan kanggé nyebat kodok minangka "ayam toya". Padatanipun dhaharan punika dipungayutaken kaliyan kutha Purwodadi, Jawa Tengah.[1] Bahan utama dhaharan punika sikil kodok (padatanipun saking "kodok ijo" utawi "kodok ijo" (Jw.) kanthi bumbu bawang, jae, tauco, sarem lan lada. Dipunsajèkaken kaliyan bawang ingkang dipungorèng lan godhong slèdri ing dhuwuripun, swike ugi dipunsajèkaken kaliyan sekul.
Wonten ingkang gadhah pamanggih bilih rasa lan tèkstur swike punika gabungan antawisipun ayam lan ulam. Padatanipun namung pérangan pupu kodok ingkang dipundadosaken swike, nanging pérangan kulitipun saged dipundamel garing lajeng dipungorèng dados kripik kulit kodok. Cara anggènipun ngolah swike sanèsipun punika "pepes kodok", daging kodok tanpa balung dipunmasak wonten ing wungkusan godhong gedhang minangka pèpès.
Kajawi wonten ing Purwodadi, swike ugi saged kapanggih ing sapérangan kutha ing Indonesia, kados Jakarta, Bandung (salah satunggaling gerai restoran kondhang punika "Swikee Jatiwangi"), Yogyakarta, Semarang lan Surabaya. Padatanipun restoran-restoran swike ing Indonesia nyebat piyambakipun minangka restoran "Swike Purwodadi" utawi "Swike Jatiwangi". Indonesia punika pengèkspor sikil kodok paling ageng ing donya, kanthi ngèkspor langkung saking gangsal èwu ton daging pupu kodok saben taunipun, kathahipun panyuwun saking Perancis, Bèlgi lan Luksemburg.[2] Kala rumiyin caranipun pikantuk kodok punika kanthi mburu ing alam kados nyekel wonten ing sawah. Kodok gampil kapanggih mliginipun nalika mangsa rendheng. Sapunika sapérangan usaha ternak kodok kanggé dipunekspor kanggé nuruti panyuwunipun pasar luar nagari mliginipun Perancis.
Variasi
[besut | besut sumber]
Swike saged dipunmasak lan dipunsajèkaken kanthi manéka cara. Saed dipungodhog kanggé manéka dhaharan mawi duduh, dipunoseng, utawi dipungorèng miturut saos lan bumbu piyambak-piyambak.
- Swike oh utawi Kodok oh, pupu kodok dipunmasak wonten ing duduh tauco kanthi bumbu bawang.
- Swike goreng mentega, pupu kodok dipungorèng ing mentega utawi margarin.
- Swike kecap, pupu kodok dipuntumis mawi kecap ingkang legi.
- Swike saus tomat, pupu kodok dipuntumis kaliyan saos tomat.
- Swike asem manis, pupu kodok dipuntumis kaliyan saos asem manis.
- Swike goreng tepung, pupu kodok dipunparingi adonan glepung lajeng dipungorèng.
- Swike goreng mayones, pupu kodok dipungoreng mawi glepung lan dipunsajèkaken kaliyan mayones
- Pepes swike, daging kodok tanpa balung dipunbumboni lajeng dipunolah ing wungkusan godhong gedhang minangka pepes. Variasi sanèsipun punika pèpès tigan kodok, tigan kodok ingkang dipunmasak pèpès.