Sosis Sala

Saka Wikipédia Jawa, bauwarna mardika basa Jawa
Menyang navigasi Menyang panggolèkan
Sosis Sala
Sosis solo goreng.jpg
Sosis Sala gorèng
Jeneng liyanéSosis Solo
AjanganNyamikan
Panggonan asalIndonésia
Tlatah utawa prajaSurakarta, Jawa Tengah
Hawa ajanganpanas
Woworan pokokKulit, Isèn-isèn
VariasiSosis gorèng lan sosis teles
Buku masakan: Sosis Sala  Médhia: Sosis Sala

Sosis Sala sing kawentar kanthi jeneng Sosis Solo minangka sawijining panganan goréngan sing kawentar saka kutha Surakarta. Bahan dhasar gawè sosis iki ya iku endhog lan isèn-isèn sing arupa iwak pitik lan markuni. Masiyo panganan iki sinebut sosis, ananging wujudé ora kaya sosis saka bawana Èropah utawa Amèrikah sing racaké ana ing jero hot dog utawa dadi isèn-isèn pizza. Sosis Sala praupané rada mirip lumpia ananging isiné beda, luwih cilik lan luwih lembut kulité. Sosis iku asring dipangan karo lombok jemprit lan saos sambel. Ana 2 jinis sosis Sala ya iku sosis gorèng lan sosis teles (sosis basah). Sosis goréng iku diolah kanthi cara digoréng ing lenga akèh lan kulité werna soklat uga luwih kriuk. Déné sosis basah iku diolah kanthi cara di dang (dikukus) lan kulité werna kuning uga luwih lembut. Sosis teles iki luwih cendhak kolèsterol amarga ora nganggo lenga goréng. Sosis iki racaké disuguhaké nalika ana temantèn, ana pasamuwan, kondangan lan uga didol mawa jajanan ing pinggir dalan. Sak bagèyan masarakat mliginé ing ndesa, menawa ana temu temantèn iku panganan sosis minangka suguhan wajib. Menawa ora ana sosis rasané kurang sreg.

Cara nggawé[besut | besut sumber]

Sosis Sala kalebu panganan sing mbutuhaké wektu suwé nalika nggawéné. Panganan iki uga mbutuhaké kasabaran lan katlatènan kang setiti. Supaya luwih cepet, racaké nggawéné luwih saka wong siji supaya bisa ngrewangi.

Piranti sing dicawisaké[besut | besut sumber]

Kulit dadaran endhog[besut | besut sumber]
  • Glepung gandum 200 gram
  • Banyu mateng 150 ml
  • Endhog pitik 5 wiji
  • Uyah 1 sendhok tèh
  • Lenga gorèng 5 sendhok pangan
  • Glepung pathi 2 sendhok pangan (supaya ora gampang suwèk)
Sosis Sala teles (sosis basah)
Isèn-isèn[besut | besut sumber]
  • Iwak pitik giling 250 gram
  • Wortel rajang kothak 100 gram
  • Markuni 100 gram
  • Loncang utawa godhong brambang 5 lonjor dirajang
  • Bawang Bombay
  • Bawang 4 wiji
  • Brambang 6 wiji
  • Uyah 1 ½ sendhok tèh
  • Gula 1 sendhok tèh
  • Kaldhu bubuk 1 sendhok tèh
  • Mrica bubuk ¼ sendhok tèh
  • Mertèga 2 sendhok pangan
  • Banyu putih 50 ml

Cara ngolah[besut | besut sumber]

  1. Pecahaké endhog pitik ing mangkok gedhe utawa tembor.
  2. Udhak endhog nganti nyawiji, prayogané nganggo mesin pancampur utawa mixer supaya kacampur kanthi sampurna
  3. Suntak banyu, glepung lan bahan liya ing kocokan endhog banjur diudhak nganti kacampur nganti ora nggrenjel.
  4. Saring adhonan mau nganggo saringan sing rapet.
  5. Panasaké teplon ora kelèt kang dhiamèteré paling sethithik 30 cm.
  6. Sakwisé panas, jupuk 1 irus adhonan lan suntak ing teplon. Adhonan iku diratakaké supaya bundher sampurna kanthi ngowah-owahaké teplon.
  7. Menawa tengahé wis radha garing, langsung diangkat lan ora perlu dibalik amarga mengko isih diolah manèh.
  8. Lakokaké cara iki nganti adhonan mau entèk. Dadaran endhog mau didèlèh papan amba kaya tampah supaya ora ngembun lan cepet adhem.
  9. Panasaké wajan lan wènèhi mertega.
  10. Lebokaké bawang bombay, bawang lan brambang lan osèng nganti arum ambuné.
  11. Lebokaké iwak giling lan markuni, tambahaké banyu lan tunggu nganti umub
  12. Tambahaké bahan liya banjur udhak nganti kacampur.
  13. Entèni  nganti banyuné angslup banjur dientas. Isèn-isèn prayogané di lèr supaya cepet adhem.
  14. Wanci ngisèkaké prayogané ing papan sing rata kaya tepak utawa tampah.
  15. Jupuk 1 lembar kulit, banjur dèlèhaké 3 sendhok pangan isèn-isèn lan dilempit kaya gawé lumpia.
  16. Kelètaké pinggir kulit nganggo putih endhog lan ditata supaya pèni.
  17. Menawa amèh gawé sosis teles: cepakaké dandang lan banyu ing jeroné. Dèlèhaké sosis lan kukus kurang luwih 20 menit banjur diangkat lan dipindhah ing piring.
  18. Menawa amèh gawé sosis gorèng: cepakaké wajan lan lenga gorèng 250 ml. cemplungaké sosis nalika lenga panas. Goréng kanthi diwolak-walik nganti wernané kasoklatan. Angkat lan wènèhaké piring.
  19. Sosis wis dadi lan bisa dipangan. Tambahaké gegenep arupa saos sambel lan lombok jemprit ing pinggiré.

Pranala njaba[besut | besut sumber]

Resèp masak sosis Sala

Videyo masak sosis Sala