Shabu-shabu

Shabu-shabu

Shabu-shabu (しゃぶしゃぶ) utawa shabu shabu iku panganan saka Jepang jinis Nabemono wujud irisan daging sapi kang tipis banget kang dicelupaké menyang panci mirunggan isiné banyu panas ing sadhuwuring méja mangan, lan dicelupaké menyang kuwah kaping pirang-pirang sadurungé didhahar karo saus (tare) ngandhut wijèn kang diarani gomadare utawa ponzu. Ing sajeroning panci padatan ana jejanganan, tahu, utawa kuzukiri.

Saliyané irisan daging sapi kang tipis banget, daging liyané uga didhahar kanthi cara shabu-shabu kaya déné daging pitik, daging wedhus nom, iwah fugu, gurita lan iwak kakap. Gyūshabu iku sesebutan kanggo shabu-shabu kang nganggo daging sapi. Ing Hokkaido, shabu-shabu daging wedhus nom diarani Ramushabu. Shabu-shabu daging babi diarani Tonshabu utawa Butashabu. Ing Nagoya ditepungi shabu shabu kanthi ayam Nagoya Kōchin kang diarani Niwatorishabu.

Sajarah

Ing Beijing lan ing laladan lor-wétan Tiongkok ditepungi panganan kang diarani shuan yang rou (Hanzi:涮羊肉) wujud irisan tipis daging wedhus nom kang dimasak ing panci isiné banyu umub lan padatan didhahar ing mangsa atis. Panganan iki banjur digawa menyang Jepang déning wong Jepang kang tau manggon ing Manchuria.

Sing duwé rumah makan Jūnidanya kang ngadol Ochazuke lan Mizutaki ing Kyoto keprungu babagan pakulinan dhahar ing Tiongkok saka wong-wong kang tau manggon ing kana. Sing duwé rumah makan banjur duwé ide arep nyelehake irisan tipis daging sapi ing sadhuwuring sega lan didhahar kanthi cara Ochazuke kanthi cara nggebyurake teh ijo panas ing dhuwure.

Ing taun 1952, restoran Suehiro ing Osaka wiwit nyajekake masakan saka irisan tipis kang diarani Shabu-shabu lan bisa ngasilaké éntuk merek dagang kanggo masakan iki ing taun 1955.

Ing jaman biyèn, shabu-shabu dimasak ing dhuwure kompor areng, mula ing tengah-tengah panci shabu-shabu pancen digawé bolongan kanggo cerobong kanggo nglebukake areng. Ing Tiongkok, panci kaya mangkene diarani huo guo zi (Hanzi:火鍋子).