Sadikin

Sadikin utawa Kolonèl Sadikin (lair 11 April 1916 ing Purwakerta lan séda 1 Maret 1986 ing Jakarta) iku bintara Heiho kang kondhang minangka proklamator kapisan kamardikan lan wadya nasional Indonésia. Proklamasiné kondhang amarga diadani sadurungé proklamasi kamardikan Indonésia ing tanggal 17 Agustus 1945 lan sadurungé lairé Tentara Nasional Indonesia ing tanggal 5 Oktober 1945.^[1]

Kauripan

Sadikin lair ing Purwakerta tanggal 11 April 1916. Kawit taun 1939 nganti Jepang ngejègi Indhiya-Nèderlan, dhèwèké ngasta sersan ing Koninklijk Nederlandsch-Indisch Leger (KNIL). Nalika Jepang kuwasa, dhèwèké gabung Heiho ing babagan artilèri gegana lan tinugasan ing Jakarta, Surabaya, lan Semarang.

Proklamasi kamardikan lan wadya nasional

Nalika tanggal 16 Agustus 1945 utawa sadina sadurungé dina proklamasi kamardikan, Sadikin kang kala ika minangka bintara Heiho olèh kabar manawa Jepang nindakaké kapitulasi utawa nyerah marang Sekuthu. Dhèwèké sakanca banjur nyuwun marang wadya Jepang supaya panggah ing kantor. Upacara gendéra abang-putih tumuli digelar kanthi dipandhégani dhèwèké. MIturut Abdul Harris Nasution, ing upacara mau Sadikin mbiwara yèn Indonésia wis mardika lan ngukuhaké PETA lan Heiho dadi wadya nasional Indonésia.^[2] Awit tumindaké iku, dhèwèké luwih ndhisik mbiwara mardikané Indonésia tinimbang Soekarno kang nalika samana isih mangu-mangu.^[3] Dhèwèké uga ngukuhaké wadya nasional sadurungé lairé Tentara Nasional Indonesia ing tanggal 5 Oktober 1945.

Proklamasi wadya nasional kang ditindakaké Sadikin mau banjur tiniru Inspèktur I Moehammad Jasin, minangka kumendhan Polisi Istimewa. Dhèwèké tumuli ngukuhaké pulisi nasional ing markas Polisi Istimewa ing Surabaya nalika tanggal 21 Agustus 1945.

Jaman révolusi

Ing jaman révolusi, dhèwèké ngasta kumendhan ing Resimen 6 Cikampek. Sawisé iku, dhèwèké kadhapuk kumendhan manèh tumrap Brigade 4 Divisi Siliwangi ing Tasikmalaya, tumuli tinanggenah minangka kumendhan manèh mungguh ing Brigade 2 Divisi Siliwangi kang ngalih lan manggon ing Surakarta. Dhèwèké banjur kapatah minangka kumendhan wewengkon militèr Madiun sawisé ngleremaké kadadéan PKI ing Madiun. Kuncarané, dhèwèké ngasta panglima ing Divisi Siliwangi (1949-1951) lan panglima Tanjungpura (1951-1956). Wusana, dhèwèké ngasta inspèktur jéndral téritorial lan panglawaning rakyat ing markas gedhé Angkatan Darat.

Mangsa pènsiyun

Ing mangsa pènsiyuné, Sadikin ngasta présidhèn dhirèktur PT Bank Internasional Indonesia lan lurah Badan Pembina Citra (BPC) Siliwangi kang leloroné manggon ing Jakarta. Dhèwèké séda ing Jakarta nalika tanggal 1 Maret 1986.^[1]

Réferènsi

↑ ^a ^b Isnaeni, Hendri F. (2014-09-30). "Sadikin, Proklamator Tentara Nasional Indonesia". historia.id . Dibukak ing 2017-12-02.
↑ Nasution, Abdul Haris (1997). Bisikan Nurani Seorang Jenderal: Kumpulan Wawancara dengan Media Massa. Bandung: Mizan. ISBN 9794331376. OCLC 39508408.
↑ Prasetyo, Stanley Adi; Hadad, Toriq, èd. (1998). Jenderal tanpa Pasukan, Politisi tanpa Partai: Perjalanan Hidup A.H. Nasution. Jakarta: Pusat Data dan Analisa Tempo dan Institut Studi Arus Informasi. ISBN 9789799065025. OCLC 39322328.

[:0-1] Isnaeni, Hendri F. (2014-09-30). "Sadikin, Proklamator Tentara Nasional Indonesia". historia.id . Dibukak ing 2017-12-02.

[2] Nasution, Abdul Haris (1997). Bisikan Nurani Seorang Jenderal: Kumpulan Wawancara dengan Media Massa. Bandung: Mizan. ISBN 9794331376. OCLC 39508408.

[3] Prasetyo, Stanley Adi; Hadad, Toriq, èd. (1998). Jenderal tanpa Pasukan, Politisi tanpa Partai: Perjalanan Hidup A.H. Nasution. Jakarta: Pusat Data dan Analisa Tempo dan Institut Studi Arus Informasi. ISBN 9789799065025. OCLC 39322328.

[1]

[2]

[3]