Murtidjono
K.R.T. Martinus Joseph Murtidjono utawi langkung misuwur kanthi asma Murtidjono (lair ing Salatiga, Jawa Tengah, 10 Juli 1951 – pati ing Surakarta, Jawa Tengah, 3 Januari 2012 ing umur 60 taun) inggih punika salah satunggalipun sastrawan lan budayawan saking Indonésia. Murtidjono kalebet salah satunggalipun tokoh ingkang mandhégani ngadegipun Taman Budaya Jawa Tengah, ingkang salajengipun dados pangarsa wonten mriku selangkung taun.[1] Sesarengan Halim HD, Arief Budiman, lan Ariel Heryanto, piyambakipun mandhégani wontenipun adicara Sastra Kontekstual ingkang dipun-cakaken ing Monumen Pers Nasional, Kutha Surakarta surya 28 dumugi 29 Oktober 1984. Adicara punika ngasilaken satunggalipun buku sesirah Perdebatan Sastra Kontekstual.
Latar wingking[besut | besut sumber]
Murtidjono lair ing Kutha Salatiga, Jawi Tengah surya 10 Juli 1951, nanging nglampahi gesang wonten Kutha Surakarta, awit taksih setengah taun. Piyambakipun punika putra saking Sri Hunon lan Murdiyo Djungkung, tokoh Tentara Pelajar rikala samanten. Murtidjono nglampahi pendhidhikan dhasar lan manengah ing Surakarta, lajeng nerasaken kuliyah ing Fakultas Filsafat, Universitas Gajah Mada Yogyakarta. Taun 1982, piyambakipun sesémahan kaliyan Ningsri Sadiarti, lan dipunparingi putra tiga. Murtidjono miwiti padamelanipun saking 3A punggawa nagari sipil (PNS) taun 1979 ing Akademi Seni Karawitan Indonesia minangka dhosèn Filsafat Seni, lan mungkasi kanthi golongan 4A minangka Kepala Taman Budaya Jawa Tengah ing Surakarta. Awit saking katrésnanipun dhumateng seni, pamikiran, lan pangabektènipun, taun 1994 Murtidjono nampi gelar kebangsawanan saking Sri Susuhunan Pakubuwono XIII kanthi asma Kanjeng Raden Tumenggung Sujonopuro. Murtidjono sampun nglairaken pakaryan sastra antawisipun buku kempalan geguritan Umpatan-Tuyul, Cermin Buram, sesarengan Sosiawan Leak, lan satunggal album lagu asesirah Rock Gaek.[2][3][4]
Tilar donya[besut | besut sumber]
Murtidjono tilar donya surya 3 Januari 2012 ing Griya Sakit Dr. Sardjito, Yogyakarta awit saking nandhang sakit leukimia. Sadèrèngipun kasarèkaken, jasadipun dipunsemayamaken wonten tigang panggènan inggih punika ing griyanipun, Taman Budaya Jawa Tengah, lan gréja ingkang ndhèrèkaken lumantar misa requiem. Minangka pakurmatan tumrap lelabetanipun Murtidjono, atusan panggurit saking sapérang kutha ing Indonesia makempal lan nggelar adicara pambabaran buku kempalan geguritan Requiem bagi Rocker, 21 April 2012.[5]
Ugi pirsani[besut | besut sumber]
Rujukan[besut | besut sumber]
- ↑ Mengenang Murtidjono, kapundhut 5 Maret 2015
- ↑ Budayawan Murtidjono dimakamkan, kapundhut 5 Maret 2015
- ↑ Selamat jalan, Murtidjono Archived 2015-04-02 at the Wayback Machine., kapundhut 5 Maret 2015
- ↑ The Jakarta Post Archived 2016-03-10 at the Wayback Machine., kapundhut 5 Maret 2015
- ↑ Murtidjono tutup usia , kapundhut 5 Maret 2015