Panjebar Semangat

*Panjebar Semangat*
	Samak PS Edis 8 taun 2007
Kategori	aktualitas dan budaya Jawa
Frekuensi	minggon
Terbit sepindhahan	1933
Negara	Indonésia
Bahasa	Basa Jawa
Situs web	Situs resmi

Panjebar Semangat ya iku kalawarti (kalawarta) basa Jawa kang terbit pisanan tanggal 2 September 1933. Kalawarti iki isih tetep terbit minggon nganti saiki. Panjebar Semangat digunakaké dr. Soetomo kanggo nyengkuyung kamardikan Indonésia kanthi sesanti Suradira jayaningrat lebur déning Pangastuti. Ing jaman nalika kababar, Panjebar Semangat dianggep ora lumrah amarga migunakaké basa Jawa ngoko. Soetomo, pangadeg Boedi Oetomo, nduwé panemu yèn basa ngoko bisa gampang diserep déning wong cilik lan luwih égalitèr. Sekawit, kalawarta iki dipanggedhèni déning Imam Soepardi nganti sédané ing taun 1963. Saiki, Panjebar Semangat (kang asring dicekak dadi PS) kapimpin déning Moechtar.

Kalawarti iki kalebu institusi pers tuwa dhéwé sing isih urip tekan saiki ing Indonésia. Mangsa-mangsa awal mung bisa nyithak 2.000 èksemplar. Nanging ing taun 1936, Panjebar Semangat bisa nyithak 6.000-12.000. Mula ora anèh yèn kalawarti iki onja ing antarané médhia liyané.

Ing jaman Jepang, Panjebar Semangat kudu tutup sawatara wektu lan lagi bisa kacithak manèh ing taun 1949. Terbitané sansaya ndedel dadi 88.000. Ing taun 2000, kalawarta iki nyithak 20.000-an èksemplar.

Majalah iki kasebar ora mung ing Jawa utawa Indonésia waé, nanging uga nganti Suriname, Kaledonia Anyar, Malaysia, Thailand, Burma, lan Vietnam.

Ing warsa 2013 Panjebar Semangat pikantuk bebungah saking Musèum Rékor Donya Indonésia minangka kalawarti kang nggunakaké basa laladan tuwa dhéwé ing Indonésia. Bebungah iki diparingaké déning MURI ngepasi ing dina ambalwarsa Panjebar Semangat kang kaping 80, ing tanggal 2 September 2013.^[1]