Gaplèk

Gaplèk ya iku ketéla pohung kang wis diawètaké kanggo pasadiyan panganan. Cara ngawètaké ketéla diocèki saka kulité lan di pecah-pecah utawa disigrak-sigrak dadi akèh, banjur dipépé ana ing ngisor panasé srengéngé supaya bisa rikat garing. Sawisé garing, gaplèk bisa disimpen kanggo dipangan sajroning setaun. Gaplèk dadi sumber panganan pokok ing tlatah Gunungkidul nalika jaman biyèn, kanthi diolah dadi thiwul utawa gathot. Nanging saiki nalika jaman wis maju thiwul wis ora dadi panganan pokok, nanging iya uga isih ana kang nggawe thiwul minangka panguri-uri panganan tradhisional. Ana ing tlatah Pathi utawa ing tlatah pantura gaplèk saliyané kanggo panganan uga duwé mumpangat digawé glepung kanji/tapioka. Gaplèk kang garing didheplok ing lumpang / lesung supaya lembut lan banjur bisa digawé panganan kaya ta roti, bubur, krupuk lan sapanunggalé. Glepung tapioka saka gaplèk bisa uga digawé sega thiwul kang rasané énak lan gurih. Sega thiwul misuwur ing masarakat tlatah Pagunungan Kidul, Kabupatèn Gunungkidul, Wanagiri nganti tlatah Kabupatèn Pacitan.