Cheonggukjang

Saka Wikipédia Jawa, bauwarna bébas abasa Jawa
Cheonggukjang
Cheonggukjang dipunmasak dados Cheonggukjang jjigae
Jeneng Koréa
Hangul 청국장
Hanja
Alihaksara sing Disampurnakaké cheonggukjang
McCune–Reischauer ch'ŏnggukchang

Cheonggukjang inggih punika doenjang, pasta dangsul Koréa ingkang dipundamel pinten dinten kemawon, julukanipun punika "pasta dansgul rikat".[1]

Cheonggukjang katingal sami kaliyan doenjang saking penampilan ananging cara lan wekdal anggènipun damel ingkang bènten saéngga rasa lan aromanipun ugi bènten. Nalika pasta dangsul dumugi dados meju (pasta garing) kirang langkung 2-3 dinten sampun saged dipun-ginakaken kanggé masak jjigae.[2]

Sajarah[besut | besut sumber]

Wonten manéka téyori ingkang nyebataken asal usul cheonggukjang, ing antawisipun saking periode Tiga Kerajaan Koréa (57 SM-935 M).[3] Tiyang Goguryeo ingkang nitih jaran minangka piranti trasnportasi mbeta dangsul godhog ingkang dipungandhulaken ing celakipun sadel jaran minangka dhaharan nalika lelampahan. Amargi dangsul kénging awakipun jaran (38-40 derajat Celcius) saéngga damel dangsul kasebut nglampahi fermentasi kanthi alami. Cheonggukjang ugi dipunsebat wonten ing sajarah Silla kanthi istilah yeomsi.

Adhedhasar dokumen saking Dinasti Joseon ingkang dipunserat déning sarjana kanthi nama Hong Man-seo kanthi irah-irahan Sanrimgyeongje (Buku Kehutanan dan Ékonomi), nama wiwitan cheonggukjang punika jeongukjang utawi pasta dangsul perang ingkang saged dipundamel wonten ing periode perang. Miturut Jeungbosanrim gyeongje (Buku Rincian Kehutanan dan Ékonomi), cheonggukjang dipundamel 3 dinten kanthi cara dangsul ingkang sampun dipunkumbah lan dipungodhog kasebut dipunfermentasi lajeng dipunbungkus ngginakaken damen pari. Téyori sanèsipun nyebataken bilih cheonggukjang punika asalipun saking Cina ingkang dipuntepangaken nalika masa pamaréntahan Raja Yeongjo taun 1760.[1] Tembung cheong ing cheonggukjang tumuju dhateng Dinasti Cheong (Qing).[1]

Caranipun damel[besut | besut sumber]

Dangsul utawi dhelé ingkang sampun dipunkom ing toya 12 jam lajeng dipungodhog ing mawi geni ingkang ageng. Nalika sampun umub, geninipun dipunkirangi dumugi dangsul kasebut warninipun dados coklat. Lajeng dangsul kasebut dipunparingaken ing damèn lan dipunbungkus ngginakaken gombal sapados saged fermentasi. Prosès fermentasi dipunwontenaken 2 dumugi 3 dinten kanthi suhu ingkang anget. Wonten ing prosès punika medal bakteri Bacillus ingkang mengurai protein dangsul dados asam amino. Bibar 3 dinten, dangsul kasebut dados radi ireng lan medalaken cuwèran kados keju. Prosès punika ugi ngasilaken sekedhik amonia ingkang damel ambunipun cheonggukjang langkung krasa sanget tinimbang doenjang. Sapunika cheonggukjang sampun saged dipun-ginakaken kanthi cara dipuntumbuk alus lan dipunparingi bumbu jae, bawang, sarem, lada, lan lombok abang.

Mupangat kanggé kasarasan[besut | besut sumber]

Laré-laré lan priyantun enèm sapérangan ageng nyingkiri dhaharan ingkang mawi bahan cheonggukjang. Sanajan makaten, panalitèn nedahaken bilih cheonggukjang punika dhaharan ingkang damel awak waras. Bakteri ingkang paring mupangat punika anama Bacillus Subtlis ingkang urip wonten ing njeronipun lan saged mengurai protein dangsul dados asam amino lan saponin. Saponin saged nahan sèl-sèl kanker, nebihaken saking stroke lan demensia.

Cathetan suku[besut | besut sumber]

  1. ^ a b c Sŏ, Chŏng-su; Bernard Rowan, Yoon-jung Cho (2004). Encyclopedia of Korean culture. Seoul: Hansebon. ISBN 8-9747-6148-3.  Cite nganggo paramèter lawas |coauthors= (pitulung)
  2. ^ Korean Food: Stews, lifeinkorea.
  3. ^ Cheonggukjang-jjigae, hansik.