Wikipédia:Artikel pilihan/2013 11
Doctor Who (basa Inggris kanggo 'Doktor Sapa') iku sawijining sérial télévisi fiksi sains Britania Raya lan diproduksi déning BBC. Acara TV iki nggambaraké caritané sawijining 'Adipati Kala' (Inggris Time Lord). Adipati Kala iki jenengé sajinising makluk njaba akasa (alien). Banjur acara TV iki nyritakaké pangulandarané sawijining Adipati Kala sing ndarbèni peparab 'Sang Doktor' (The Doctor). Sang Doktor iki bisa ngumbarani jagat raya numpak sawijining wahana mesin wektu. Mesin wektuné iki jenengé TARDIS lan bisa njlajahi ruang lan wektu serta rupané kaya 'bilik pulisi' saka London taun 1963. Taun iki yaiku kapisané acara TV iki ditayangaké. Sang Doktor iki dikancani rowangé lan ngadhepi mungsuh werna-werna karo nyambi nylametaké kabudayan, nulungi wong-wong lan mbenakaké apa-apa sing luput.
Sang Doktor sing asli dimainaké déning William Hartnell nganti taun 1966, nalika iku Sang Doktor kapisan ambruk lan mèh tilar donya lan nudhuhaké dayané kanggo 'regenerasi' (regeneration) lan bisa nitis ing sajroning awak anyar. Ing awaké sing anyar iki Sang Doktor rupané dadi séjé lan wateké uga séjé. Dadi senadyan awaké lan rainé owah, nanging pancèn sejati wong sing isih padha amerga mémoriné lan katrampilané panggah padha. Sawisé Hartnell (1963-1966), sang Doktor dimainaké déning Patrick Troughton (1966-1969), Jon Pertwee (1970-1974), Tom Baker (1974-1981), Peter Davison (1982-1984), Colin Baker (1984-1986), Sylvester McCoy (1987-1989, 1996), Paul McGann (1996), Christopher Eccleston (2005), David Tennant (2005-2010) lan Matt Smith (2010-saiki).
Mungsuh utamané Doctor Who sing kerep muncul iku sawijining ras alien sing kudu obah mawa wahana wesi lan diarani Dalek, makluk separo manungsa, separo robot utawa cyborg sing diarani Cyberman lan sawijining Adipati Kala liya sing ala wateké lan ngarani awaké dhéwé The Master ('Sang Bendara').
Sérial Doctor Who wiwit ditayangaké ing taun 1963 nganti taun 1989. Sawisé iku uga ana film televisi sing ditayangaké ing taun 1996. Banjur sérial TV dianakaké manèh wiwit taun 2005. Ing taun-taun awal sérial Doctor Who utamané diélingi para pamirsa déning caritané sing menarik lan èfèk spésialé sing murah nanging kréatif. Doctor Who iku bisa dianggep minangka sawijining ikon budaya populèr Britania.
Sérial iki mlebu Guinness Book of World Records minangka sérial fiksi ngèlmiah suksès dhéwé ing sejarah télévisi, menawa ditilik saka suwéné séri iki, gunggungé DVD, vidéo lan buku sing payu didol lan lalu lintas ing iTunes.