Kuku

Saka Wikipédia Jawa, bauwarna bébas abasa Jawa
Anatomi kuku

Kuku iku bagéan awak kéwan sing ana utawa thukul lan tuwuh ing pucuk driji. Kuku tuwuh saka sèl mèmper gel lembut sing mati, saya atos, lan banjur kabentuk nalika wiwit tuwuh saka pucuk driji. Kulit ari ing pangkal kuku duwé fungsi ngreksa saka regetan. Fungsi utama kuku ya iku ngreksa pucuk driji sing lembut lan kebak urat saraf, sarta ndhuwuraké daya sentuh. Sacara kimia, kuku padha karo rambut sing antarané kabentuk saka keratin protein lan akèh kandhungan sulfur é.

Ing kulit sangisoré kuku ana akèh pambuluh kapiler sing duwé suplai getih kuwat saéngga nimbulaké werna kaabang-abangan. Kaya balung lan untu, kuku arupa bagéan paling atos saka awak amarga kandhungan banyuné sithik banget.

Tuwuhing kuku driji tangan seminggu rata-rata 0,5 - 1,5 mm, ping papat luwih rikat tinimbang tuwuhing kuku driji sikil. Tuwuhing kuku uga dipengaruhi déning panas awak.

Nutrisi sing becik wigati banget kanggo tuwuhing kuku. Sawalikké, yèn kekurangan gizi utawa kena lelara anoreksia nervosa, tuwuhing kuku alon banget lan rapuh.

Diagnosa lelara[besut | besut sumber]

Kawit biyèn, wis ana tèhnik ndhiagnosis lelara liwat kuku. Saliyané liwat kuku, lelara uga bisa dideteksi liwat mata, ilat, pamriksanan getih, faeses lan uyuh. Panafsiran lelara liwat kuku iki sakbeneré wis dilakoni wong wiwit jaman Hippocrates.

Sapérangan kajanggalan kuku sing bisa mbiyantu dhokter ndhiagnosis sawijining lelara:

  • Werna rada biru ing pangkal kuku nandhaaké kurang beresé sirkulasi getih lan arupa gejala lelara jantung.
  • Yèn separo bagéan cerak pucuk kuku wernané jambon utawa coklat sauntara kulit ari wernané putih, iku arupa gejala lelara gagal ginjal kronis.
  • Yèn muncul kerutan horizontal lan kuku katon kusem, iku nandhaaké kurang gizi utawa gejala sawijining lelara kaya campak, cacar banyu, gondhok, jantung sarta kondisi kaya sindrom Reynaud (kejang ing urat driji tangan lan sikil amarga kadhemen banget).
  • Lapisan abang mbujur ing kuku, nandhaaké pendarahan ing pembuluh kapilér. Garis-garis ndobel arupa gejala lelara getih dhuwur (hipertensi).
  • Menawa tuwuhing kuku katon alon, kandel lan saya atos sarta wernané rada kuning, nandhaaké gangguan getah bening utawa lelara pancernan kronis.
  • Timbulé bintik-bintik ora maaturan ing kuku, nandhaaké anané lelara psoriasis (lelara kulit kronis).
  • Yèn ana plengkungan kakèhen ing pangkal kuku lan sekitar pucuk kuku, iku nandhaaké gejala lelara TBC, emfisema (gangguan ing paru-paru), lelara kardiovaskuler utawa ati.