Hanindawan
| Hanindawan Sutikno | |
|---|---|
| Barkas:Hanindawan.JPG Hanindawan |
Hanindawan Sutikno utawi langkung misuwur kanthi asma Hanindawan (lair ing Surakarta, Jawa Tengah, 4 Dhésèmber 1959; umur 65 taun) inggih punika salah satunggalipun seniman saking Indonésia ingkang nglampahi kiprahipun ing jagat kasusastran lan téater. Piyambakipun dados pangarsanipun Téater Gidag Gidig Sala awit taun 1982. Hanindawan ugi musuwur minangka seniman ingkang mandhégani regengipun golongan-golongan téater ing Surakarta lumantar saking pakaryanipun. Sapunika, piyambakipun kacathet minangka salah satunggalipun pegawé ing Taman Budaya Jawa Tengah ing divisi teater. Awit saking kaprigelanipun, Hanindawan dipunpracaya déning Présidhèn Republik Indonesia, Jokowi ngarahaken ing babagan pidhato.[1][2][3]
Latar wingking
[besut | besut sumber]Hanindawan lair ing Kutha Surakarta, Jawi Tengah surya 4 Dhésèmber 1959. Awit taksih alit piyambakipun sampun tuhu nresnani jagat seni. Griyanipun ingkang boten tebih saking Radio Republik Indonesia Surakarta ingkang asring méntasaken pagelaran seni nuwuhaken kekajengan tansah mirsani. Rikala samanten, Hanindawan taksih sekolah dhasar, manggèn kaliyan éyang putrinipun, lan mboten ndhèrèk ramanipun wonten Jakarta.[4]
Rikala samanten RRI Surakarta dados panceripun kagunan (seni) ing Surakarta. Saben dalu dipunwontenaken paméntasan wayang kulit, wayang wong, kethoprak, pamaosan geguritan, keroncong, lan sanèsipun. Ing kalangan kados punika Hanin wiwit tepang kaliyan kesenian. Piyambakipun mirsani wonten panggung RRI kanthi mbludhus (mlebet mboten tumbas karcis.[5]
Nalika mlebet SMAN 4 Surakarta, 1977, awit saking dipuntawani kaliyan réncangipun, Hanindawan nyawiji kaliyan kelompok téater remaja ingkang sedaya anggotanipun murid SMA ing mriku, inggih punika Teater Gidag Gidig, ingkang dipunadegaken surya 21 Dhésèmber 1976, déning Bambang Sugiarto minangka sutradharanipun. Sasampunipun SMA, 1980, Hanindawan nerasaken ing Jurusan Sastra Indonesia, Fakultas Sastra Universitas Sebelas Maret Sala. Kangmangka samangsa ing SMA piyambakipun saking jurusan IPA. Sastra Indonésia kapilih amargi caket sanget kaliyan karemenanipun, téater. Ing pawiyatan luhur, kiprahipun Hanin sansaya kathah. Taun 1982, Hanin kepara dipunpracaya mangarsani Téater Gidag Gidig déning Bambang Sugiarto. Gidag Gidig salajengipun, angggotanipun mboten namung saking murid-murid SMA 4, nanging ugi saking jawi. Awit taun 1990, Hanindawan kacathet minangka pegawé Taman Budaya Jawa Tengah Surakarta ing Komite Téater ingkang tanggel jawabipun nggulawenthah sedaya kagiyatan téater ing Taman Budaya Jawa Tengah. Sesarengan Téater Gidag Gidig, Hanindawan naté nampi dana hibah saking Yayasan Kelola.
Pakaryan
[besut | besut sumber]- Dag Dig Dug, Dor (2004)
- Bukan Boneka Patah (1998)
- Merdeka Sakit (1994)
- Pedati Kita Di Kubangan (1993)
- Wabah (1993)
- Obrok Owok-Owok, Ebrek Ewek-Ewek/Danarto
- Tengul, Umang-Umang, Mega Mega, Kucak Kacik, Kapai Kapai (Arifin C. Noer)
- Karto Luwak
Ugi pirsani
[besut | besut sumber]Rujukan
[besut | besut sumber]- ↑ Antara News: Hanindawan, pemoles gaya pidato Jokowi, kapundhut 22 Fèbruari 2015
- ↑ Kelola Art: Biografi Hanindawan Archived 2015-07-03 at the Wayback Machine., kapundhut 22 Fèbruari 2015
- ↑ Soloraya: Hanindawan: Teater di Ruang Keluarga, kapundhut 17 Mèi 2017
- ↑ Beritane: Teater di ruang keluarga[pranala mati permanèn], kapundhut 22 Fèbruari 2015
- ↑ Bentara Budaya: Pembacaan naskah drama karya Hanindawan Archived 2015-02-22 at the Wayback Machine., kapundhut 22 Fèbruari 2015
- Kabèh artikel mawa pranala njaba sing mati
- Artikel mawa pranala njaba sing mati kawit October 2023
- Articles with invalid date parameter in template
- Artikel mawa pranala njaba sing mati permanèn
- Articles using infobox templates with no data rows
- Pages to import images to Wikidata
- Pages using infobox artist with unknown parameters
- Seniman Indonésia
- Sastrawan Indonésia
- Tokoh saking Surakarta