Ganmodoki

Saka Wikipédia Jawa, bauwarna bébas abasa Jawa
Ganmodoki

Ganmodoki (がんもどき?) ya iku panganan olahan saka Jepang kang digawé saka tahu. Jenenge panganan iki kerep dicekak dadi ganmo.

Panganan iki digawé kanthi cara meres tahu nganti banyune metu. Sawise iku, tahu dicampur karo umbi yamaimo, wortel, gobo, jamur, rumput laut, wiji woh gingko, lan sapanunggale. Adonan digawé bunder-bunder lan digoreng. Ganmodoki kerep dianggo ing masakan kaya oden utawa nimono.

Asal-usul[besut | besut sumber]

Ganmodoki wiwitane digawé kanggo nggenteni daging ing masakan Buddhis (shōjin ryōri). Ana saperangan panemu ngenani asal-usul jeneng ganmodoki. Rasane jare kaya daging banyak kang diarani ganmodoki. Ing basa Jepang, gan tegese banyak liar, dene modoki tegese barang palsu. Saliyane iku, panganan iku mbokmenawa diarani ganmodoki amarga mirip karo panganan olahan kang diarani gan, digawé saka daging manuk kang dialusake lan digawé kaya bal-bal cilik. Ing basa Jepang, gan (?) tegese bal. Panemu liya ngandharake yèn irisan alus kombu ing ganmodoki katon kaya banyak (gan) mabur. Kombu pancen kerep dianggo gentine kikurage (jamur kuping abang garing) minangka bahan ganmodoki.

Ing Kansai, ganmodoki diarani hiryūzu, hiriuzu, hirousu, utawa hiryōzu. Tembung hirousu asale saka tembung filhós ing basa Portugis. Filhós ya iku kuweh saka adonan glepung lan endhog kang digoreng. Nganti pungkasan zaman Edo, jeneng "ganmodoki" uga dianggo ing masakan konnyaku.

Logo Wikimedia Commons
Pirsani galeri bab Ganmodoki ing Wikimedia Commons.


Sumber artikel punika saking kaca situs web: "https://jv.wikipedia.org/w/index.php?title=Ganmodoki&oldid=1074138"