Pekarangan

Saka Wikipédia Jawa, bauwarna bébas abasa Jawa
Pekarangan arupa taman.

Pekarangan utawa pelataran utawa latar iku aréal lemah ing saubengé omah, sing biasané arupa lemah utawa ditanduri suket utawa diatosaké nganggo semèn utawa bata. Sawetara bagéan saka pekarangan kerep uga diolah dadi taman utawa kebon sing ditanduri pethètan utawa kembang. Pekarangan uga kerep ditanduri tanduran-tanduran kang migunani, contoné tanduran sing ngasilaké bahan kanggo gawé panganan kaya ta: kaérut lan ganyong ngiras kanggo pager tapel wates pekarangan karo omah. Saliyané iku pekarangan utamané ing karang padésan biyasa ditanduri tanduran obat kulawarga utawa kerep dicekak TOGA, minangka apotik hidup. Sing ditandur ing apotik hidup iki antarané tetanduran sing biyasa digawé bumbu lan obat, kaya ta: jaé, kencur, temulawak, kunir, blimbing wuluh lan sapanunggalané.

Pekarangan sing cukup jembar uga kerep dadi papan panggonan dolanan bocah cilik, kaya ta dolanan bal-balan, umbul, benthik, pasaran, bedhil-bedhilan lan sapanunggalané.