Lynn Hill

Saka Wikipédia Jawa, bauwarna mardika basa Jawa
Lynn Hill
Hill in Stavanger 2015
Lair (1961-01-03) Januari 3, 1961 (umur 63)
Detroit, Michigan
BangsaU.S.
PakaryanAtlet
Dhuwur5 ft 2 in (1.57 m)
Bobot110 lb (50 kg) (1993)

Carolynn Marie Hill utawa Lynn Hill (lair ing Detroit, Michigan, Amérika Sarékat, 3 Januari 1961), ya iku salah sawijining atlit munggah tebing kang kondhang saka Amérika Sarékat.[1] Lynn Hill uga dadi salah sawijining atlit wadon kang suksès amarga dhèwèké dadi atlit munggah tebing kang paling apik ing donya. Lynn Hill wiwit kondhang amarga dhèwèké tau nglakokaké munggah tebing bébas kapisan kang médané angèl ing Lembah Yosemite, Amérika Sarékat. Dhèwèké nglakokaké kagiyatan kuwi kurang saka wektu 24 jam. Amarga saka kagiyatan kang dilakokaké déning dhèwèké kuwi mau, Lynn Hill dadi atlit munggah tebing kang kondhang lan paling apik ing Amérika Sarékat lan ing donya.[2]

Kauripan[besut | besut sumber]

Lynn Hill lair ing Detroit, Michigan, Amérika Sarékat. Dhèwèké ora gedhé ing Michigan, nanging ing dhaérah California, Amérika Sarékat. Kawit cilik, Lynn Hill wis mulai nuduhaké yèn dhèwèké bisa dadi atlit munggah tebing kang apik amarga dhèwèké kawit cilik wis bisa mènèk saka wit siiji menyang wit liyané. Saliyané kuwi, dhèwèké uga bisa munggah ana ing lampu-lampu dalan.[3] Ibuké Lynn Hill makarya dadi hygene waja lan bapaké dadi insinyur kedirgantaraan.[4] Sadurungé dadi atlit munggah tebing, Lynn Hill wis tau dadi atlit senam lantai. Dhèwèké sinau senam lantai nalika umur 8 taun. Lynn Hill ora bisa nerusaké pasinaonan ing babagan senam lantai amarga dhèwèké ora seneng olahraga senam. Miturut Lynn Hill, senam lantai kuwi olahraga kang biyasané dilakokaké déning bocah-bocah utawa wong wadon lan kudu mèsem nalika nglakokaké olahraga. Amarga alesan kuwi mau, Lynn Hill ora seneng nglakokaké senam lantai.[5]

Munggah tebing kapisan kang dilakoni déning Lynn Hill ya iku ing taun 1975. Wektu kuwi, Lynn Hill kenal karo olahraga munggah tebing amarga seduluré kang ngenalaké dhèwèké karo olahraga ing babagan pendakian. Sawisé dhèwèké munggah tebing kang kapisan, Lynn Hill dadi kepincut marang olahraga kuwi lan nerusaké olahraga munggah tebing. Miturut Lynn Hill, munggah tebing dadi olahraga kang bisa gawa rasa katentreman ing atiné lan bisa dadi sarana kanggo panglipur lara amarga bapak ibuké pisah.[6] Nalika umuré 15 taun, Lynn Hill lumebu ana ing Camp 4 lan dadi siji-sijiné wong wadon kang mèlu munggah tebing. Lynn Hill nglakokaké kagiyatan munggah tebing kang kapisan ana ing Lembah Yosemite. Lembah Yosemite ya iku papan kang éndhah lan apik ing Taman Nasional Yosemite, ing barisan pegunungan kang ana ing dhaérah California, Amérika Sarékat.[4]

Lynn Hill kalebu atlit munggah tebing kang nduwèni watak kang ndableg lan bebel. Lynn Hill uga kalebu atlit munggah tebing kang kuat lan unik. Dhèwèké kuwi alit kang nduwé bakat apik lan ora tau wedi marang apa waé. Buktiné, dhèwèké tau munggah tebing ing tebing lembah Yosemite kang dhuwuré kurang luwih 650 mèter.[7] Nalika umuré durung ana 17 taun, Lynn Hill wis miwiti olahraga munggah tebing ing Half Dome. Lynn Hill bisa wani munggah tebing kang dhuwur amarga dhèwèké wani lan nekat nglakokaké olahraga kuwi.[7]

Taun 1984, nalika Lynn Hill lunga menyang New York, Amérika Sarékat, dhèwèké ketemu déning atlit munggah tebing kang asalé saka Ruslan, ya iku Russ Raffa. Lynn Hill lan Russ Raffa dadi kanca munggah tebing lan dhèwèké kabèh banjur palakrama ing tanggal 22 Oktober 1988.[8] Nanging, sesambungan antarané Lynn Hill lan bojoné ora suwi. Lynn Hill lan bojoné pisah ing sasi Maret taun 1991.[8]

Munggah tebing[besut | besut sumber]

Lynn Hill ing Texas, 2006

Taun 1988, Lynn Hill wiwit nglakokaké kagiyatan munggah tebing saka lomba-lomba munggah tebing. Ing wektu kuwi, Lynn Hill dadi siji-sijiné utawa wong wadon kapisan kang bisa munggah Ophir Broke ing dhaérah Ophir, Colorado. Munggah tebing kang dilakokaké déning Lynn Hill ing Ophir Broke kuwi mau kalebu munggah tebing bebas, ya iku kang migunakaké piranti kaslametan, ya iku tali lan piranti-piranti kaslametan liyané. Lynn Hill miwiti olahraga munggah tebing ing Lembah Yosemite. Nanging, sawisé kuwi, Lynn Hill isih nerusaké olahraga munggah tebing amarga dhèwèké seneng marang olahraga munggah tebing. Lynn Hill banjur munggah tebing ing papan-papan liyané. Dhèwèké tau nglakokaké munggah tebing ing lembah-lembah kang ana ing Éropah.[7] Saliyané munggah tebing ing Amérika lan Éropa, Lynn Hill uga tau munggah tebing ana ing dhaérah Asia, ya iku ing nagara Viètnam, Tanah Thai, Jepang, lan Républik Rakyat Cina. Lynn Hill uga tau munggah tebing ing dhaérah Ostrali lan Maroko.[9]

Lynn Hill didadékaké atlit kang profésional ing babagan munggah tebing ing taun 1988. Lynn Hill uga dadi juru omong ing babagan olahraga munggah tebing, Dhèwèké bisa dadi atlit profésional kang kondhang ing donya ora mung amarga dhèwèké nglakokaké kagiyatan munggah tebing bébas. Nanging, dhèwèké uga mèlu ing lomba-lomba munggah tebing kang dianakaké. Miturut Lynn Hill, kagiyatan munggah tebing bébas kuwi béda karo kagiyatan lomba munggah tebing. Lomba munggah tebing kuwi bisa didelok déning akèh wong, nanging yèn munggah tebing bébas ora didelok déning wong akèh. Amarga kuwi, nalika mèlu lomba munggah tebing, Lynn Hill kudu bisa katon apik.[10]

Lynn Hill kalebu siji-sijining atlit wadon kang bisa menang ana ing Piala Donya munggah tebing taun 1990. Dhèwèké bisa menang amarga dadi siji-sijining atlit wadon kang bisa munggah tekan pucuk tebing. Dhèwèké bisa ngalahaké para atlit wadon liyané ing Piala Donya. Nalika kuwi, atlit wadon kang mèlu ana telu cacahé, kalebu Lynn Hill.[6] Lynn Hill olèh bayaran saka munggah tebing lan sponsor kanggo nguripi dhèwèké dhéwe. Nanging, kuwi mau sipaté ora instan lan gampang, amarga Lynn Hill kudu sregep lan giat nglakokaké kagiyatan munggah tebing lan lomba-lomba. Gerakan munggah tebing kang dilakokaké déning Lynn Hill uga kudu apik lan mbutuhaké konsèntrasi kang dhuwur supaya bisa katon apik nalika munggah tebing. Sasuwéné dadi atlit munggah tebing, Lynn Hill nduwé pirang-pirang pangaji-aji. Antarané taun 1986 tekan 1992, Lynn Hill kalebu atlit munggah tebing kang paling apik ing donya. Lynn Hill duwé jejulukan atlit munggah tebing paling apik ing donya amarga dhèwèké wis menang lima lomba ing Arco Rock Master. Saka lomba-lomba kuwi, Lynn Hill uga menang pirang-pirang gelar.[7][11]

TV lan filem[besut | besut sumber]

Sasuwéné taun 1980-an, Lynn Hill tau diundang ing acara game show, ya iku The Guinness Game. Lynn Hill uga katon ing acata That's Incredible! Acara kuwi awujud reality show lan ing acara kuwi, Lynn Hill nyaritakaké nalika dhèwèké munggah ing balon udara kang dhuwuré 6000 ft.[4] Lynn Hill uga tau katon ana ing acara TV kang irah-irahané ya iku Survival of The Fittest. Saliyané kuwi, ing taun 1999, Lynn Hill uga tau main ing filem babagan olahraga, ya iku Extreme. Ing fiem kuwi, Lynn Hill katon lagi munggah ana ing Indian Crack Falley, Utah. Lynn Hill uga katon ana ing vidéo dokumènter, ya iku Vertical Frontier. Vidéo kuwi digawé nalika Lynn Hill munggah tebing ing Lembah Yosemite, California, Los Angeles, Amérika Sarékat. Taun 2002, Lynn Hill nulis buku kang nyaritakaké awaké dhéwé. Buku kuwi judulé ya iku Climbing Free: My Life in the Vertical World.[12]

Rujukan[besut | besut sumber]

  1. ↑ "Lynn Hill". IMDb. Dibukak ing 2020-02-07.
  2. ↑ "Biography". Lynn Hill Climbing (ing basa Inggris Amérika Sarékat). Dibukak ing 2020-02-10.
  3. ↑ Woolum, Janet, 1955- (1998). Outstanding women athletes : who they are and how they influenced sports in America (édhisi ka-2nd ed). Phoenix: Oryx Press. ISBN 1-57356-120-7. OCLC 38879316. {{cite book}}: |edition= has extra text (pitulung)CS1 maint: multiple names: authors list (link)
  4. ↑ a b c Hill, Lynn, 1961- (2002). Climbing free : my life in the vertical world (édhisi ka-1st ed). New York: W.W. Norton & Co. ISBN 0-393-04981-7. OCLC 48837836. {{cite book}}: |edition= has extra text (pitulung)CS1 maint: multiple names: authors list (link)
  5. ↑ Mills, Merope (2002-11-29). "Women: Rock chick". The Guardian (ing basa Inggris Karajan Manunggal). ISSN 0261-3077. Dibukak ing 2020-02-07.
  6. ↑ a b Taylor, Joseph E., III, (2010). Pilgrims of the vertical : Yosemite rock climbers and nature at risk. Cambridge, Massachusetts: Harvard University Press. ISBN 978-0-674-05860-6. OCLC 705930004.{{cite book}}: CS1 maint: extra punctuation (link) CS1 maint: multiple names: authors list (link)
  7. ↑ a b c d "Nekat. Berontak. Bebas. - Semua Halaman - National Geographic". nationalgeographic.grid.id (ing basa Indonesia). Dibukak ing 2020-02-11.
  8. ↑ a b Roberts, David (2004-05-02). "And the Best Woman Sport Climber is..." Outside Online (ing basa Inggris). Dibukak ing 2020-02-11.
  9. ↑ "Lynn Hill". Van Heyst. 2012-07-06. Diarsip saka sing asli ing 2012-04-15. Dibukak ing 2020-02-12.
  10. ↑ National Geographic Society (U.S.); Banff Centre for Mountain Culture. (2000). Voices from the summit : the world's greatest mountaineers on the future of climbing. Washington, D.C.: Adventure Press, National Geographic, in association with the Banff Centre for Mountain Culture. ISBN 0-7922-7958-1. OCLC 44425382.
  11. ↑ O'Connell, Nicholas. (1993). Beyond risk : conversations with climbers. Seattle, WA: The Mountaineers. ISBN 0-89886-296-5. OCLC 28183878.
  12. ↑ "Lynn Hill". www.greatoutdoors.com. Diarsip saka sing asli ing 2012-12-30. Dibukak ing 2020-02-12.
Dijupuk saka "https://jv.wikipedia.org/w/index.php?title=Lynn_Hill&oldid=1645876"